JONI 18

1Ni sa cavuta oti na masu koya ko Jisu, sa qai lako kei iratou na nona tisaipeli ki na tai kadua ni wai ko Kitironi. E tiko kina e dua na loga ni senikau, ka ratou a la'ki curu kina, ko koya kei iratou na nona tisaipeli. 2E kila tu ko Jutasa, na tisaipeli ka a qai bukiveretaki Jisu, na vanua koya; ka ni ratou a dau la'ki soqoni vakawasoma kina ko Jisu kei iratou na nona tisaipeli. 3Sa qai yaco sara yani kina ko Jutasa, ka kauti ira tiko yani na matasotia kei ira e so na ovisa ka ra talai mai vei ira na bete levu kei ira na Farisi. Era a kau tabucagi tiko yani kei na cina tutuvaki, ka ra kau i yaragi tale ga. 4Ia ko Jisu, ni sa kila na veika kece e na vakarau yaco vua, sa qai lako yani ka kaya vei ira, “Ko ni vakasaqarai cei?” 5Era sa kaya, “Ko Jisu na kai Nasareci ” Sa qai kaya vei ira ko koya, “Sa i au sara ga oqo ” E a tiko tale ga e na kedra maliwa ko Jutasa, o koya ka bukiveretaki Jisu. 6Ia ni sa kaya vei ira ko Jisu, “Sa i au sara ga oqo,” era sa qai vakasukasuka ka bale sobu ki na qele. 7Sa qai tarogi ira tale ko koya ka kaya, “Ko ni vakasaqarai cei?” Era sa kaya tale, “Ko Jisu na kai Nasareci ” 8A sauma tale ko Jisu, ka kaya, “Au sa tukuna oti vei kemuni ni sa i au sara ga ko ni vakasaqara tiko. Ia, kevaka sa i au ko ni vakasaqara tiko ni laivi iratou oqo me ratou lako.” 9A vosa vaka oqo me vakayacori sara kina na vosa ka a tukuna ko koya, “Au sa sega ni vakayalia e dua vei iratou ko ni a solia mai vei au.” 10Sa qai ucuna mai ko Saimoni Pita na i seleiwau ka tiko vua, ka taya kina na tamata ni Bete Levu, ka taya laivi sara na daligana i matau. Na yaca ni tamata koya ko Maliko. 11Sa qai kaya kina vei Pita ko Jisu, “Daramaka na nomu i seleiwau ki na kena taga, me'u sa na kakua li ni gunuva na bilo ka solia vei au ko Tamaqu?” 12Era sa qai vesuki Jisu ko ira na mata sotia, kei na nodra turaganivalu, kei ira na nodra ovisa yadra na Jiu, 13ka ra kauti koya taumada vei Anasa; ka ni vugoi Kaiafa ko koya; ia ko Kaiafa e Bete Levu e na yabaki koya. 14Ko Kaiafa oqo ka a vakasalataki ira na Jiu, ni sa ganita me mate e dua na tamata e na vukudra na tamata. 15E rau a muri Jisu tiko ko Pita kei na dua tale na tisaipeli. E kilai koya vinaka na tisaipeli koya na Bete Levu, ka a mani curu vata kina kei Jisu ko koya ki na loma ni bai ni vale ni Bete Levu; 16ia ko Pita e a la'ki tu cake tu ga e na taudaku ni katuba. A mani curu tale mai kina ki tuba na tisaipeli kadua, o koya ka kilai koya tiko na Bete Levu, ka vosa vua na yalewa ka vakatawa tiko na katuba, ka vakacurumi Pita yani ki loma. 17Sa qai kaya vei Pita ko koya na vada ka vakatawa tiko na katuba, “Ko iko tale ga e dua vei iratou na nona tisaipeli na tamata oqo?” A qai sauma ko Pita ka kaya, “E sega ni o i au!” 18E a batabata na vanua, ka ra a mani vakawaqabuka toka na dauveiqaravi ka ra mai tu wavolita yani na buka ka tatalai. Sa mani gole yani ko Pita ka la'ki tatalai vata kei ira. 19E a qai vakatarogi Jisu na Bete Levu me baleti ira na nona tisaipeli, kei na nona i vakavuvuli tale ga. 20A sauma vua ko Jisu, ka kaya, “Au a sa dau vosa oti e na matana levu; au a dau veivakatavulici tiko e na veivalenilotu kei na Valenisoro, na vanua era dau soqoni vata kina ko ira kece na Jiu. Au a sega ni kaya vakavuni e dua na ka. 21A cava tale ko qai vakatarogi au kina? Tarogi ira ga ka ra a sa rogoca oti, se cava soti au a dau kaya vei ira: era kila tu na ka au a dau kaya ” 22la ni sa vosa oti vaka oya, sa qai sabici koya e dua vei ira na ovisa, ka kaya, “E vaka tu oqori na nomu sauma na nona vosa na Bete Levu?” 23A sauma vua ko Jisu, ka kaya, “Kevaka au a vosataka e dua na ka ca, tukuna mai se na ka ca cava koya; ia kevaka e dodonu na ka au kaya, a cava ga ko qai sabici au kina?” 24Ni oti koya sa qai vakauti Jisu sara ko Anasa vei Kaiafa, na Bete Levu; ka a vesu tu ga na ligana. 25A se tu cake tu ga ko Pita ka tatalai tiko. Era sa qai kaya vua, ko ira ka tu vata kaya, “E sega li ni ko dua tale ga vei iratou na nona tisaipeli ko iko?” A qai cakitaka ko koya, ka kaya, “E sega ni o i au!” 26Sa qai kaya vua e dua na tamata ni Bete Levu, e dua ka weka i koya ka a taya laivi na daligana ko Pita, “E sega beka ni'u a raici kemudrau vata e na loga ni senikau?” 27A cakitaka tale ko Pita, ka sa tagi sara na toa. 28E na mataka caca ni siga ka tarava era sa qai kauti Jisu tani mai vei Kaiafa ki na i tikotiko ni kovana, de ra na vakadukadukalitaki kina, ka na qai sega kina ni rawa me ra kania na magiti ni Lakosivia. 29Sa qai curu vei ira ki tautuba ko Pailato, ka kaya, “A cala cava ko ni beitaka vua na tamata oqo?” 30Era a qai sauma ka kaya vua, “Kevaka e a sega na cala e cakava na tamata oqo, ke keimami a sega ni kauti koya mai vei kemuni ” 31Sa qai kaya vei ira ko Pailato, “Ni kauti koya, ka la'ki veilewaitaki koya ga me vaka na nomuni lawa ” Era sa qai kaya vua ko ira na Jiu, "E sega ni tara vei keimami me keimami vakamatea e dua na tamata” 32(Oya me vakayacori sara kina na vosa i Jisu ka a cavuta me vakatakila kina na i tovo ni mate e na mate kina.) 33Sa qai curu tale ki na valeniveilewai ko Pailato, ka kacivi Jisu, ka kaya vua, “Ko iko li na nodra Tui na Jiu?” 34A sauma ko Jisu, ka kaya, “Oqori li na ka ko kaya vakataki Iko ga, se ra tukuna vei iko ko ira na tani me baleti au?” 35Sa qai kaya tale ko Pailato, “Au Jiu beka o i au? O ira ga na kai nomu kei ira na bete levu ka ra a soli iko mai vei au. A cava o cakava?” 36Sa qai sauma ko Jisu, ka kaya, “Na noqu matanitu e sega ni matanitu ni vuravura oqo; kevaka e ka ni vuravura oqo, ke ra na vala na noqu tamata, me'u kakua kina ni soli vei ira na Jiu. Sega, e sega ni wili e ke na noqu matanitu ” 37Sa qai kaya tale vua ko Pailato, “Ko iko bagi e dua na tui?” A sauma ko Jisu ka kaya, “Ko sa kaya ni'u sa dua na tui. A ka ga oqo au a sucu mai kina, na ka tale ga oqo au sa lako mai kina ki vuravura, me'u dau tukuna na dina. Ko koya ga sa dau dina, e na dau rogoca na noqu vosa.” 38Sa qai kaya vua ko Pailato, “A cava na dina?” Ni sa vosa oti vaka koya ko Pailato, sa qai curu tale ki tautuba ki vei ira na Jiu, ka kaya vei ira, “Au sa sega ni kunea e dua na nona cala. 39Ia e dua tiko na nomuni i vakarau, oya me'u na sereka e dua na kai vesu ki vei kemuni e na gauna ni Lakosivia. Sa lomamuni li me'u sereka vei kemuni na nodra Tui na Jiu.” 40Era a qai qoqolou tale kina, ka ra kaya, “Me kakua na tamata oqo, ko Parapa ga?” Ia ko Parapa oqo e dua na daubutako.

will be added

X\