JONI 17

1Ni sa cavuta oti na vosa koya ko Jisu, sa qai tacake ki lomalagi ka kaya, “I Tamaqu, sa yaco mai na kena gauna, mo ni vakalagilagia na Luvemuni, me qai vakalagilagi kemuni tale ga kina na Luvemuni. 2Me vaka ko ni solia vua na lewa me baleti ira na tamata kece ga, me na solia tale ga ko koya na bula tawa mudu vei ira yadua ko ni sa solia vua. 3Sa i koya oqo na bula tawa mudu, me ra kilai kemuni na Kalou dina duadua ga, kei Jisu Karisito, o koya ko ni a tala mai. 4Au sa vakalagilagi kemuni e vuravura, ka'u sa vakaotia na cakacaka ko ni a solia mai vei au me'u cakava. 5Ia oqo, Tamaqu, ni'u sa tu e na matamuni ni vakalagilagi au e na lagilagi ka a tu vei kemuni kei au ni sa bera ni buli na vuravura. 6“Au sa vakatakila na yacamuni vei iratou ko ni a soli iratou vei au mai vuravura. E ratou sa nomuni, ka ko ni sa soli iratou vei au; ka ratou sa dau muria na nomuni vosa. 7E ratou sa qai kila ni a taka dina ga mai vei kemuni na veika kece ko ni a solia vei au. 8Au sa solia vei iratou na vosa ko ni a solia vei au, ka ratou sa vakabauta, ka kila dina sara ni'u a lako mai vei kemuni, ka ratou sa vakadinata ni ko ni a talai au mai. 9“Au masulaki iratou. Au sega ni masulaki vuravura, au masulaki iratou ga ko ni a soli iratou vei au; ka ni ratou sa nomuni. 10Sa nomuni tale ga na veika kece ga e noqu, ka sa noqu na ka e nomuni, ka'u sa vakalagilagi e na vukudratou. 11Au sa na sega tale ni tiko e vuravura, ia ko iratou oqo e ratou sa tiko ga e vuravura; ko i au, au sa lako yani vei kemuni. I Tamaqu yalo savasava, ni maroroi iratou e na yacamuni ko iratou ko ni sa soli iratou vei au, me ratou duabau ga me vakataki kedaru. 12Ni'u a sa tiko vata voli kei iratou, au a dau maroroi iratou e na kaukauwa ni yacamuni, ko iratou ko ni a soli iratou vei au. Au a taqomaki iratou, ka a sega ni dua vei iratou e yali, ia ko koya ga e a sa dodonu me rusa, me vakayacori kina na i Vola Tabu. 13Ia oqo au sa lako tiko yani vei kemuni, ka'u sa vosataka na veika oqo e vuravura, me vakasinaiti sara kina na lomadratou e na noqu marau. 14“Au sa solia vei iratou na nomuni vosa; ka sa cati iratou ko ira na kai vuravura, ni ratou sega ni nei vuravura, me vaka ga ni'u sega ni nei vuravura ko i au. 15Au sega ni masulaka mo ni kauti iratou tani mai vuravura, ia mo ni maroroi iratou ga mai vua na Vunica. 16E ratou sega ni nei vuravura, me vaka ga ni'u sega ni nei vuravura ko i au. 17Tawasei iratou yani ki vei kemuni e na dina: sa dina na nomuni vosa. 18Me vaka na nomuni a talai au mai ki vuravura, au sa talai iratou vaka tale ga kina ki vuravura. 19Ka'u sa tawasei au yani vei kemuni e na vukudratou, ka me ratou tawasei iratou dina kina ko iratou ki vei kemuni. 20“Ia au sega ni masulaki iratou wale ga oqo, au masulaki ira tale ga e ra na qai vakabauti au e muri e na vuku ni nodratou vosa; 21me ra na qai duabau kece ga. Me vaka ko ni sa tiko vei au Tamaqu, ka'u sa tiko vei kemuni ko i au; me ra na tiko tale ga vei kedaru ko ira: me na qai vakabauta kina ko vuravura ni ko ni a talai au mai. 22Au sa solia vei ira na lagilagi ko ni a solia mai vei au; me ra duabau kina me vaka ga e daru sa duabau ko i kedaru. 23Me'u tiko vei ira, ka mo ni tiko vei au, me qai taucoko kina na nodra duabau; me qai kila kina ko vuravura ni ko ni a talai au mai; ka ni ko ni sa lomani ira me vaka ko ni sa lomani au. 24“I Tamaqu, au vinakata me ra tiko tale ga kei au e na vanua au tiko kina ko ira ko ni sa solia vei au; me ra raica na noqu lagilagi na lagilagi ko ni sa solia vei au: ka ni ko ni a lomani au ni sa sega ni tekivu ko vuravura. 25I Tamaqu yalo dodonu, e sega ni kilai kemuni ko vuravura, ia au sa kilai kemuni ko i au; ka ratou sa kila ko iratou oqo ni ko ni a talai au mai. 26Au sa vakatakila vei iratou na yacamuni, ka'u na vakatakila tiko ga, me tiko kina vci iratou na loloma ko ni a lomani au kina, ka me'u tiko tale ga vei iratou ko i au.”

will be added

X\