JONI 16

1“Au sa tukuna na veika oqo vei kemudou, mo dou kakua kina ni tarabe. 2Era na vakatabui kemudou mai na nodra veivalenilotu: ka na yaco mai na gauna e na nanuma kina ko koya e vakamatei kemudou, ni sa qarava tiko kina na Kalou. 3Era na kitaka tiko na veika oqo vei kemudou, ni ra sega ni kilai Tamaqu se i au. 4Ia au sa tukuna rawa tiko na veika oqo vei kemudou, me na qai yaco mai na kena gauna, dou na nanuma ni'u a sa tukuna oti vei kemudou. “Au a sega ni tukuna e liu na veika oqo vei kemudou, ka ni'u a sa tiko vata voli ga kei kemudou. 5Ia oqo au sa na lako vei koya ka a talai au mai; ka sega mada ni bau dua vei kemudou me taroga na vanua au lako tiko kina. 6Ia oqo ni'u sa tukuna vei kemudou na veika oqo, sa luvuci na lomamudou e na rarawa. 7Ia e dina na ka sa tukuna oqo vei kemudou: e na vinaka vei kemudou me'u lako tani, ni na sega ni lako mai vei kemudou na Dauveivuke kevaka au sega ni lako tani. Ia ke'u sa na lako, au na talai koya mai ki vei kemudou. 8Ia ni sa na lako mai ko koya e na vakatakila ki vuravura na nodra cala me baleta na i valavala ca, kei na ka e dodonu, kei na lewa sa vakatauci. 9Me baleta na i valavala ca, e na nodra sega ni vakabauti au; 10me baleta na ka e dodonu, e na noqu sa lako vei Tamaqu, ka dou na sega ni raici au tale; 11ka vaka kina me baleta na lewa sa vakatauci, e na nona sa lewai na tui ni vuravura oqo. 12“E se vo tiko e vuqa na ka me'u tukuna vei kemudou, ia dou na sega ni se kila rawa e na gauna oqo. 13Ia ni sa lako mai ko koya, na Yalo ni dina, e na tuberi kemudou ki na vei vakavuvuli dina kece, ni na sega ni mai tukuna na nona vakasama ga vakai koya, ia e na mai tukuna ga na ka kece ga e na rogoca, ka na tukuna tale ga vei kemudou na veika e ra sa bera tiko ni yaco mai. 14E na vakalagilagi au ko koya; ka ni na dau taura na ka e noqu, ka la'ki tukuna vei kemudou. 15Sa noqu na veika kece ga e nei Tamaqu, oya na vuna au kaya kina, ni na dau taura ko koya na ka e noqu, ka na la'ki tukuna vei kemudou. 16“E na sega ni dede, dou sa na sega tale ni raici au; ka na sega tale ni dede, dou sa na raici au tale.” 17E ratou a mani kaya dina vakai iratou e so na nona tisaipeli, “A cava beka na i balebale ni nona kaya, ʻE na sega ni dede, dou sa na sega tale ni raici au ka na sega tale ni dede, dou sa na raici au tale: baleta ni'u sa na lako vei Tamaqu?’ “ 18E ratou a kaya tale ga, “A cava e kaya kina ko koya ni ʻna sega ni dede’? E sega sara ga ni matata na ka e kaya ” 19Sa kila ko Jisu ni ratou via tarogi koya tiko ka mani kaya kina vei iratou, “Ko dou veitarotarogitaka tiko li na noqu a kaya, ʻE na sega ni dede, dou sa na sega tale ni raici au, ka na sega tale ni dede, dou sa na raici au tale’? 20Au kaya vakadodonu vei kemudou, dou na tagi ka tagiyaso, ia e na reki ko vuravura. E na rarawa na lomamudou, ia e na vuki me reki na nomudou rarawa. 21Ni sa taratara e dua na yalewa, sa ka rarawa vua, ni sa yacova tiko mai na kena gauna. Ia, ni sa sucu rawa na gone, sa sega tale ni nanuma ko koya na rarawa, e na kena rekitaki ni sa sucu mai ki vuravura e dua na tamata. 22E vaka kina na nomudou rarawa e na gauna oqo. Ia, au na raici kemudou tale, ka na qai reki na lomamudou, ka na sega ni dua e na kauta tani rawa na nomudou marau. 23E na siga koya dou na sega tale ni tarogi au e na dua na ka. Au kaya vakadodonu sara vei kemudou, na ka kece ga dou na kerea vei Tamaqu, e na yacaqu, e na solia vei kemudou ko koya. 24Me yacova mai oqo, dou sega mada ni sa bau kerea e dua na ka e na yacaqu. Dou kerekere, ka na yaco vei kemudou, me ka taucoko kina na nomudou marau. 25“Au a sa tukuna oti vei kemudou na veika oqo e na vosa vakatautauvata: ia sa lako tiko mai na gauna au sa na sega tale ni vosa kina vei kemudou e na vosa vakatautauvata, ni'u sa na vosataka vakamacala ga vei kemudou na veika e baleti Tamaqu. 26E na siga koya dou na kerekere e na yacaqu; ia e sega ni yaga me'u tukuna vei kemudou ni'u na masuti Tamaqu e na vukumudou, 27ka ni ko Tamaqu sara ga vaka i koya e lomani kemudou. E lomani kemudou ko koya me vaka ni ko dou sa lomani au, ka vakabauta ni'u a lako mai vua na Kalou. 28Au a lako mai vei Tamaqu, ka lako mai ki vuravura; ia oqo au sa biuti vuravura tale, ka lako vei Tamaqu.” 29E ratou sa qai kaya vua na nona tisaipeli, “Raica, oqo ko ni sa qai vosa vakamatata, ka sega tale ni ko ni vosa tiko e na vosa vakatautauvata. 30Keitou sa qai kila oqo ni ko ni sa kila na veika kece ga, ka ni sa sega tale ni yaga me dua e vakatarogi kemuni. Na ka oqo keitou sa vakabauta kina ni ko ni a lako mai vua na Kalou ” 31A qai sauma vei iratou ko Jisu, ka kaya, “Dou sa qai vakabauta, ne? 32Raica, sa lako tiko mai na gauna, ka dou vavaca sara tu ga oqo, ko dou na dui veiseyaki kina; na tamata yadua ki na nona vale, ka biuti au duadua me'u tiko ga. Ia au sega tale ga ni na tiko duadua, ka ni sa tiko vata kei au ko Tamaqu. 33A veika oqo au sa tukuna vei kemudou, me rawa kina ni nomudou na vakacegu ni ko dou sa tu vei au. Dou na kunea e vuravura na rarawa: ia mo dou vakacegu ga; au sa vakamalumalumutaki vuravura oti!”

will be added

X\