JONI 15

1“Ko i au na vaini dina, ka sa i taukei ni were ko Tamaqu. 2Sa dau kauta laivi na tabaqu kece ga e sega ni vua ko koya, ka samaka na tabaqu kece ga e vua, me rawa ni ra vua vakalevu sara. 3Dou sa samaki oti e na vosa au a vosataka vei kemudou. 4Dou tiko vei au, ka'u na tiko vei kemudou. Me vaka ga ni na sega ni rawa ni vua vaka i koya na taba ni vaini kevaka e sega ni tiko e na vaini; e na sega tale ga vaka kina ko i kemudou kevaka dou sega ni tiko vei au. 5“Ko i au na vaini, ko i kemudou na tabaqu: ko koya e tiko vei au, ka'u tiko vua ko i au, e na vua vakalevu; ke dou tawase tani vei au dou na sega ni rawata e dua na ka. 6Kevaka e sega ni tiko vei au e dua na tamata, sa na biu laivi me vaka na taba ni vaini; ka sa na malai mai; ka ra na qai tomika na tamata ka biuta ki na bukawaqa ka vakama. 7Kevaka dou sa tiko vei au, ka sa tiko vei kemudou na noqu vosa, dou kerea na ka kece ga dou vinakata, ka na vakayacori vei kemudou. 8E na vakalagilagi ko Tamaqu e na nomudou vua vakalevu, ka dou sa na qai yaco kina mo dou noqu tisaipeli. 9Au sa lomani kemudou me vaka sa lomani au ko Tamaqu; dou tiko ga e na noqu loloma. 10Kevaka dou na dau vakayacora tiko na noqu i vakaro kece ga dou na tiko ga e na noqu loloma, me vaka ga na noqu dau vakayacora tiko na i vakaro kece ga i Tamaqu, ka tiko ga e na nona loloma. 11“Au sa tukuna na veika oqo vei kemudou, me rawa ni'u rekitaki kemudou tiko ga kina, ka me sinai tale ga kina na nomudou reki ko i kemudou. 12Oqo na noqu i vakaro: dou veilomani, me vaka au sa lomani kemudou. 13E sega na loloma me na uasivi cake mai na nona solia na nona bula e dua na tamata e na vukudra na wekana. 14Dou sa qai wekaqu dina kevaka dou sa dau cakava na veika au sa vakarota vei kemudou. 15Au sa sega ni vakatokai kemudou tale mo dou noqu tamata, ka ni sega ni dau kila na tamata na ka e cakava tiko na nona turaga; ia au sa vakatokai kemudou mo dou wekaqu, ni'u sa vakatakila vei kemudou na ka kece ga au a rogoca mai vei Tamaqu. 16Dou a sega ni digitaki au, ia au a digitaki kemudou, ka lesi kemudou mo dou lako ka vua, ka me tudei na vuamudou, me solia kina vei kemudou ko Tamaqu na ka kece ga dou na kerea vua e na yacaqu. 17Sa i koya gona oqo na noqu i vakaro vei kemudou: dou veilomani. 18“Kevaka e cati kemudou ko vuravura, dou kila ni a sa cati au e liu ni bera ni cati kemudou. 19Kevaka dou sa nei vuravura, ke na lomani kemudou ko vuravura me vaka sa dau lomana na ka e nona. Ia au a digitaki kemudou mai na vuravura oqo; ko dou sega ni wili kina; oya na vuna e cati kemudou kina ko vuravura. 20Dou nanuma tiko na vosa au a cavuta vei kemudou, ʻE sega ni levu cake na bobula mai vua na nona turaga.' Kevaka e ra sa vakacacani au, e ra sa muria na noqu vosa, e ra na muria tale ga na nomudou vosa. 21Ia e ra na cakava na veika kece ga oqo vei kemudou me baleta ni ko dou noqu, ka ni ra sega ni kilai koya ka a talai au mai. 22Kevaka au a sega ni lako mai ka mai vosa vei ira, ke ra a sega ni valavala ca: ia oqo sa sega na i ulubale ni nodra i valavala. 23Ko koya sa cati au, sa cati Tamaqu tale ga. 24Kevaka au a sa sega ni mai cakava e na kedra maliwa na veicakacaka ka sa sega mada ni dua e sa cakava oti, ke a sega na nodra i valavala ca. Ia oqo era sa raica na veika au sa cakava, ka ra sa cati keirau kei Tamaqu. 25Sa vakayacori sara kina na ka e volai tu e na nodra Lawa, ʻEra a cati au, ia e sega sara ga na vuna e ra cati au kina.’ 26“E na lako mai na Dauveivuke, koya na Yalo Tabu, o koya ka mai vakatakila na veika dina me baleta na Kalou. Sa lako mai vei Tamaqu ko koya. Io au na talai koya mai vei Tamaqu, ka na mai tukuni au ko koya. 27Dou na dau tukuni au tale ga koi kemudou, ni dou a sa tiko vata kei au mai na kena i vakatekivu.

will be added

X\