JONI 14

1“Dou kakua ni lomaleqa. Dou vakabauta tiko ga na Kalou, dou vakabauti au tale ga. 2E levu na tikina e lala tu e na vale nei Tamaqu. Ke sega, ke'u a sa tukuna oti vei kemudou. Au sa lako me'u la'ki vakarautaka e dua na tikina me nomudou. 3Ia ni'u sa la'ki vakarautaka oti na tikina me nomudou, au na lako tale mai ka mai kauti kemudou vei au, ka mo dou tiko tale ga e na vanua au sa tiko kina. 4Ia dou sa kila na vanua ka'u sa lako tiko kina, dou sa kila tale ga na kena sala. 5Sa qai kaya vua ko Tomasi, “Turaga, keitou sega ni kila na vanua ko ni na tiko kina; keitou na qai kila vakacava na sala?” 6Sa qai kaya vua ko Jisu, “Ko i au ga na sala, kei na dina, kei na bula; e sega ni torovi Tamaqu rawa e dua na tamata, ia e na vukuqu ga. 7Kevaka dou a sa kilai au, dou sa kilai Tamaqu tale ga. Ia, me tekivu oqo dou sa kilai koya ka raici koya.” 8Sa qai kaya vua ko Filipi, “Turaga, ni vakatakilai Tamamuni vei keitou; keitou sa na qai vakacegu ” 9Sa qai kaya vua ko Jisu, “Ni'u sa mai tiko vakadede vaka oqo kei kemudou, ko se sega tiko ga ni kilai au Filipi? Ko koya ga sa raici au, sa raici Tamaqu; ko qai kaya tu ga vaka cava, ʻVakatakilai Tamamuni vei keitou’? 10Ko sega li ni vakabauta ni'u sa tiko vei Tamaqu, ka sa tiko vei au ko Tamaqu? Na vosa au a dau cavuta vei kemudou e sega ni'u cavuta vaka i au ga. Ko Tamaqu ga, ko koya sa tiko vei au, e cakava tiko na nona cakacaka. 11Dou vakabauti au ni’u sa tiko vei Tamaqu, ka sa tiko vei au ko Tamaqu: se dou vakabauti au e na vuku mada ga ni veicakacaka oqo. 12Au kaya vakadodonu sara vei kemudou, ko koya sa vakabauti au e na cakava tale ga na veika au dau cakava, ka na cakava na veika e lelevu cake mai na veika koya; baleta ni'u sa lako vei Tamaqu. 13Ia au na cakava na ka kece ga dou na kerea e na yacaqu, me vakalagilagi kina na Tamaqu e na vuku ni Luvena. 14A ka kece ga dou na kerea e na yacaqu, au na cakava. 15“Kevaka dou lomani au dou na dau vakayacora na noqu i vakaro kece ga. 16Au na qai masuti Tamaqu, me na solia vei kemudou e dua tale na Dauveivuke, me tiko vata kei kemudou ka tawa mudu. 17Sa i koya na Yalo ka mai vakaraitaka na veika dina me baleta na Kalou. E sega ni vakabauti koya rawa ko vuravura; ka ni sega ni rawa ni raici koya se kilai koya. Ia ko i kemudou ga ko dou sa kilai koya, ni sa tiko vata kei kemudou, ka na curumi kemudou. 18“Au na sega ni biuti kemudou tu mai mo dou luveniyali, au na lesu tale mai vei kemudou. 19E na dede vakalailai ga sa na sega ni raici au tale ko vuravura, ia dou na raici au tiko ga. Ia me vaka ni'u sa bula, dou na bula tale ga. 20E na siga koya dou na qai kila ni'u sa tiko vei Tamaqu, ka ni dou sa tiko vei au ko i kemudou, ka'u sa tiko vei kemudou ko i au. 21“Ko koya sa ciqoma na noqu i vakaro kece ga, ka vakayacori ira, sa i koya oqori sa lomani au. Ko koya sa lomani au e na lomani koya ko Tamaqu, ka'u na lomani koya tale ga ko i au, ka vakatakilai au vua.” 22Sa qai kaya ko Jutasa, (e dua tani ko Isikarioti), “Turaga, a cava na vuna ko ni na vakatakilai kemuni kina vei keitou, ka segai ki vuravura?” 23A qai sauma ko Jisu ka kaya vua, “Kevaka sa lomani au e dua na tamata e na muria na noqu vosa: ka na lomani koya ko Tamaqu, ka keirau na lako mai vei koya, ka mai tiko vua. 24Ko koya e sega ni lomani au e na sega ga ni muria na noqu vosa. Na vosa tale ga dou sa rogoca tiko oqo e sega ni noqu, e nei Tamaqu ga, ko koya ka talai au mai. 25“Au sa tukuna vei kemudou na veika oqo ni'u se tiko vata tiko kei kemudou. 26E na qai vakatavulici kemudou e na ka kece ga na Dauveivuke, na Yalo Tabu, o koya e na tala mai ko Tamaqu e na yacaqu, ka na vakananuma lesu tale ga vei kemudou ko koya na veika kece ga au sa dau tukuna vei kemudou. 27“Au sa laiva tu vei kemudou na vakacegu; a noqu vakacegu ga au sa solia vei kemudou: au sega ni solia vei kemudou me vaka e dau solia ko vuravura. Dou kakua ni lomaleqa, ka kakua ni taqaya. 28Dou sa rogoca ni'u a kaya vei kemudou, ʻAu sa lako, ia au na talevi kemudou tale mai.' Kevaka dou lomani au dina, dou na reki ni'u sa lako tiko vei Tamaqu, ni sa levu cake vei au ko koya. 29Au sa tukuna rawa oqo vei kemudou ni se bera ni vakayacori, ka mo dou na vakadinata e na gauna sa vakayacori kina. 30Au na sega ni veivosaki vakabalavu tale kei kemudou, ni sa lako tiko mai na turaga ni vuravura oqo. E sega ni dua na nona kaukauwa vei au, 31ia me kila ga kina ko vuravura ni'u sa lomani Tamaqu, au sa dau kitaka kece sara na ka e vakarota vei au ko koya. “Dou tu cake, me datou lako yani.

will be added

X\