JONI 13

1E se bera tiko na Kanavata ni Lakosivia, ka sa kila ko Jisu ni sa yaco mai na gauna me biuta kina na vuravura oqo, ka lako yani vei Tamana. Sa dau lomani ira na nona e vuravura oqo ko koya, ia oqo sa qai lomani ira sara vakaoti. 2E ratou sa vakayakavi tiko. A sa vakatubura oti koto na Tevoro e na loma i Jutasa Isikarioti, na luve i Saimoni, me na veretaki Jisu vei ira na nona meca. 3Sa kila ko Jisu ni sa solia tu ko Tamana na ka kece ga ki na ligana; sa kila tale ga ko koya ni a lako mai vua na Kalou; ka sa kila tale ga ni sa lesu tale tiko yani vua. 4Sa qai tu cake mai na vanua ni kana ko koya, ka luvata na nona i sulu e sau, ka taura e dua na i tauwelu ka vauca kina na tolona. 5Sa qai livia na wai ki na dari, ka vakatekivu me vuya na yavadratou na nona tisaipeli, ka qusia e na i tauwelu ka vau toka e tolona. 6Ni sa yaco vei Saimoni Pita, sa qai kaya vua ko Pita, “Turaga, o i kemuni mo ni mai vuya na yavaqu?” 7Sa qai sauma ko Jisu, ka kaya vua, “Na ka au cakava oqo, ko na sega mada ni kila e na gauna oqo, ia mai muri ko na qai kila.” 8Sa qai kaya tale vua ko Pita, “Ko ni na sega sara ni vuya na yavaqu.” Sa qai sauma ko Jisu, ka kaya, “Kevaka au na sega ni vui iko, ko sa na sega tale ni noqu i tokani ” 9Sa kaya tale vua ko Saimoni Pita, “Turaga, me kua ni yavaqu wale ga, na ligaqu tale ga kei na uluqu ” 10Sa kaya vua ko Jisu, “Ko koya sa sili oti, sa savasava taucoko na yagona, ka sa ganita wale ga me vuya na yavana. Dou sa savasava kece, ka vakavo ga e dua ” 11Ni a sa kila tiko ko Jisu na tamata e na veretaki koya; oya na vuna e a kaya kina, “Dou sa sega ni savasava kece ” 12Ni sa vuya oti na yavadratou, ka daramaka tale na nona i sulu e sau, sa qai dabe tale, ka kaya vei iratou, “Dou sa kila na ka au sa cakava oqo vei kemudou, se sega? 13Dou sa vakatokai au me'u i Vakavuvuli, me'u Turaga tale ga; sa dodonu na ka dou cakava, ni'u sa vaka dina kina. 14O koya gona, kevaka au sa vuya na yavamudou, ko i au na nomudou Turaga ka nomudou i Vakavuvuli, sa dodonu tale ga mo dou veivuiyava. 15Ni'u sa qai vakaraitaka oti vei kemudou e dua na i vakarau; mo dou kitaka me vaka au sa kitaka vei kemudou. 16Au tukuna vakadodonu sara vei kemudou, e sega ni levu cake na tamata mai vua na nona turaga; e sega tale ga ni levu cake ko koya ka talai mai vei koya ka veitalai. 17Ia ni dou sa kila na ka oqo, dou na kalougata kevaka ko dou na la'ki vakayacora. 18“Au sega ni vosa tiko me baleti kemudou kece; au sa kilai ira au a digitaki ira; ia me vakayacori ga kina na vosa ni Vola Tabu, ʻKo koya keirau sa dau kana vata, sa vuki tale me uoqu meca.' 19Au sa tukuna rawa tiko oqo vei kemudou ni se bera ni yaco, ia ni sa na yaco, dou na qai vakabauta ni Sa i Au Ga ko i Au. 20Au tukuna vakadodonu sara vei kemudou, ko koya sa vakacegui ira au sa tala yani, sa vakacegui au; kei koya sa vakacegui au, sa vakacegui koya ka talai au mai ” 21Ni sa vosa oti vaka koya ko Jisu sa qai rarawa na lomana. A sa vakaraitaka na rarawa ni lomana ka kaya, “Au tukuna vakadodonu sara vei kemudou, e dua ga vei kemudou e na bukiveretaki au.” 22E ratou a qai veiraici na tisaipeli, ni ratou sega ni kila se a baleti cei na nona vosa. 23E a dabe ka vakararavi toka ki na lomaserei Jisu e dua vei iratou na nona tisaipeli, oya na tisaipeli ka dau lomana ko koya. 24Sa qai deguvacu yani vua ko Saimoni Pita, me taroga se a baleti cei na nona vosa. 25Sa qai kaya vua ko koya sa ravi tiko e na lomaserei Jisu, “Turaga, ko cei beka koya?” 26Sa qai kaya ko Jisu, “Sa i koya au na solia vua na tiki ni madrai oqo ni'u sa tokoca oti e na waiwai ni kakana.” Sa qai tokoca na tiki ni madrai ko Jisu ka solia vei Jutasa, na luve i Saimoni Isikarioti. 27Ni sa taura oti ga na madrai ko Jutasa, sa curumi koya sara ko Setani. Sa qai kaya vua ko Jisu, “Na ka ko via cakava, cakava vakatotolo” 28E sega ni dua vei ira ka kana tiko koya e kila se cava e a vosa kina vaka koya vua ko koya. 29Me vaka ni dau maroroya voli na taga ni lavo ko Jutasa e ratou vakasamataka kina e so de a kaya vua ko Jisu, me la'ki volia mai na veika e na yaga vei iratou e na kanavata, se me la'ki solia e so na ka vei ira na dravudravua. 30Ni sa taura oti ga na tiki ni madrai koya ko Jutasa, sa curu sara ki tautuba. Sa bogi na vanua. 31Ni sa curu oti ki tuba ko Jutasa, sa qai kaya ko Jisu, “Sa qai vakalagilagi na Luve ni Tamata e na gauna oqo ka sa vakalagilagi na Kalou e na vukuna. 32Kevaka sa vakalagilagi na Kalou e na vukuna na Luve ni Tamata, e na vakalagilagia tale ga na Luve ni Tamata na Kalou e na vukuna vakai koya ga, ka sa na vakalagilagi koya sara ga e na gauna oqo. 33Kemudou na luvequ, sa na sega ni dede na nodatou tiko vata. Dou na vakasaqarai au; ia me vaka ga au sa tukuna vei ira na Jiu, au sa kaya tale ga vei kemudou, ʻDou na sega ni lako rawa ki na vanua au sa lako kina.’ 34Au sa solia vei kemudou e dua na i vakaro vou, mo dou veilomani. Me vaka au sa lomani kemudou, mo dou veilomani tale ga vaka kina. 35Na ka oqo era na kila kina na tamata kece ga ni dou sa noqu tisaipeli, oya kevaka dou sa dau veilomani.” 36Sa qai kaya vua ko Saimoni Pita, “Turaga, ko ni sa lako ki vei?” A sauma ko Jisu ka kaya, “Na vanua au sa lako tiko kina, ko na sega ni muri au rawa kina e daidai; ia ko na qai muri au yani e muri.” 37Sa qai kaya vua ko Pita, “Turaga, a cava na ka au sega ni muri kemuni rawa kina e daidai? Au na solia na noqu bula e na vukumuni .” 38Sa kaya vua ko Jisu, “Ko sa na solia li na nomu bula e na vukuqu? Au tukuna vakadodonu sara vei iko, ni se bera ni tagi na toa, ko sa na cakitaki au oti vakatolu.

will be added

X\