JONI 12

1Ni sa vo e ono na siga me caka na Kanavata ni Lakosivia, sa qai lako ko Jisu ki Pecani, ki na vanua ka tiko kina ko Lasarusa, na tamata ka a vakatura cake tale mai na mate ko koya. 2Era a qai cakava kina e dua na kena i vakayakavi. A veiqaravi kina ko Marica, ka bau dua vei ira ka dabe vata kei Jisu e na kana ko Lasarusa. 3Sa qai taura ko Meri e veimama na lita na waiwai talei sara, ka caka mai e na narita dina, ka lumuta kina na yava i Jisu, ka qusia na yavana e na drau ni uluna; a sa curuma na loma ni vale taucoko na i boi ni waiwai. 4Sa qai kaya ko Jutasa Isikarioti, e dua vei iratou na nona tisaipeli, ko koya ka na qai bukiveretaki koya e muri, 5“A cava e sega ni volitaki kina na waiwai oqo e na tolu na drau na tiki ni siliva, ka soli na i lavo vei ira na dravudravua?” 6E sega ni kaya koya ko koya e na nona nanumi ira na dravudravua, e kaya e na vuku ga ni sa tamata dau butako; ka ni a dau taura voli na taga ni lavo ko koya, ka dau butakoca na ka e tiko kina. 7Sa qai kaya ko Jisu, “Laivi koya ga; e a maroroya tu mai ko koya na ka oqo me baleta na siga au na bulu kina. 8Era na dau tiko ga kei kemudou na dravudravua, ia ko i au, au na sega ni tikotiko ga kei kemudou ” 9Era a rogoca e lewe vuqa sara na Jiu ni tiko e kea ko koya, ka ra sa mani lako sara kina. Era sega ni lako kina e na vuku i Jisu ga, ia me ra bau raici Lasarusa tale ga, o koya ka a vakatura cake mai na mate ko Jisu. 10Era a mani bosea vata kina na bete levu me ra vakamatei Lasarusa tale ga; 11ka ni ra sa lewe vuqa na Jiu era sa gole tani e na vukuna, ka vakabauti Jisu. 12E na siga ka tarava era a qai rogoca e lewe vuqa sara ka ra lako yani ki na Kanavata ni Lakosivia ni lako tale tiko ga yani ki Jerusalemi ko Jisu. 13E ra sa qai taura na drau ni niu ka la'ki tavaki koya, ka ra kacivaka, “Osana! Me vakalougatataki na nodra Tui na Isireli, o koya sa lako mai e na yaca ni Turaga!” 14Sa qai kunea e dua na asa ko Jisu, ka vodoka me vaka ga e a sa volai tu, 15“Kakua ni rere, o iko na koro ko Saioni. Raica, sa lako mai oqo na nomu Tui, ka sa vodoka tiko mai e dua na luve ni asa.” 16E ratou a sega ni kila na i balebale ni veika oqo na nona tisaipeli, ia ni sa lesu oti ko koya ki na nona i tikotiko lagilagi, e ratou sa qai nanuma ni a sa volai tu na veika oqo me baleti koya, ka sa vakayacori oti tale ga vua. 17Era a sa mai talanoataka oti ko ira na lewe vuqa ka ra a tiko vata kaya e na nona a kacivi Lasarusa mai na i bulubulu, ka vakaturi koya cake tale kina mai na mate. 18Koya na vuna e ra a la'ki tavaki koya kina na lewe vuqa, (ni ra sa rogoca ni a cakava na cakacaka mana koya ko koya). 19Era a qai kaya vakai ira ko ira na Farisi, “Dou sa kila tiko ni sega sara ga ni dua na ka eda rawata? Raica, era sa gole kece ga vua na tamata!” 20Era a bau tiko tale ga e na kedra maliwa na la'ki soro ki Jerusalemi e so na kai Kirisi. 21Era sa qai lako ko ira na kai Kirisi vei Filipi, na kai Peciseita mai Kalili, ka kerei koya, ka kaya, “Keitou bau via raici Jisu saka.” 22Sa qai lako sara ko Filipi, ka tukuna vei Adriu. E rau sa qai lako ruarua ko Adriu kei Filipi ka la'ki tukuna vei Jisu. 23Sa qai kaya vei rau ko Jisu, “Sa qai yaco mai na gauna me vakalagilagi kina na Luve ni Tamata. 24Au sa tukuna vakadodonu sara vei kemudrau, kevaka e na sega ni mate na vua ni sila ni sa lutu ki na qele, e na tiko duadua ga; ia kevaka sa mate, e na vua vakalevu. 25Ko koya sa lomana na nona bula, e na vakayalia; ia ko koya sa cata na nona bula e vuravura oqo, e na maroroya ki na bula tawa mudu. 26Kevaka sa via qaravi au e dua na tamata, me muri au; ka me na tiko tale ga ko koya e na vanua au sa tiko kina. Kevaka sa qaravi au e dua na tamata, e na vakalagilagi koya ko Tamaqu .” 27“Sa rarawa na lomaqu; ia a cava li me'u na kaya? Me'u na kaya li, ʻl Tamaqu, ni vakabulai au mai na gauna oqo?' la sa i koya ga oqo na vu ni noqu lako mai, koya me mai yaco vei au na rarawa e na tiki ni gauna oqo. 28I Tamaqu, mo ni vakalagilagia na yacamuni!” Sa qai rogo mai e dua na vosa mai lomalagi, ka kaya, “Au sa vakalagilagia oti, ka'u na vakalagilagia tale.” 29Era a rogoca na vosa ko ira na lewe vuqa e ra tiko e kea. E so vei ira e ra a kaya ni domo ni kurukuru; e so tale e ra a kaya, “E vosa vua e dua na agilosi.” 30Sa qai kaya ko Jisu, “E a sega ni lako mai na vosa koya e na vukuqu, e na vukumuni ga. 31Sa yaco mai oqo na gauna me lewai kina ko vuravura, me sa biu laivi kina na tui ni vuravura oqo. 32Ia ni'u sa na laveti cake mai vuravura, au na vakayarayarataki ira mai vei au na tamata kece .” 33(Sa kaya na ka koya ko koya me vakatakila kina na mataqali matemate e na mate kina ko koya.) 34Era sa qai kaya vua na lewe vuqa, “Keimami a rogoca mai na Lawa ni na mai tiko vakadua na Karisito. Ia, ko qai kaya ga vakacava ni na laveti cake na Luve ni Tamata? Ko cei li oqo na Luve ni Tamata?” 35Sa qai kaya vei ira ko Jisu, “E na tiko vakadede vakalailai ga kei kemuni na rarama, ni lako sara tiko ni se tiko na rarama, me kakua kina ni yacovi kemuni na butobuto. 36Ni se tiko e na kemuni maliwa na rarama, ni vakabauta sara na rarama, mo ni yaco kina mo ni tamata rarama.” Ni sa cavuta oti na veika koya ko Jisu, sa qai lako sara ka vunitaki koya mai vei ira. 37E dina ga ni a cakava e matadra ko koya e vuqa na cakacaka mana, ia e ra a sega ga ni vakabauti koya. 38Sa vakayacori sara kina na vosa i Aisea na parofita, ka a kaya, “Turaga, ko cei sa vakabauta na neitou i tukutuku? Ka sa vakatakilai vei cei na liga ni Turaga?” 39Ka ra sa mani sega kina ni rawa ni vakabauta. E a kaya tale ga ko Aisea, 40“Sa vakamatabokotaka na matadra ko koya, ka vakaukauwataka na lomadra, de qai rai na matadra ka kila na lomadra, ka ra qai saumaki mai, me'u vakabulai ira.” 41E a kaya na veika koya ko Aisea e na gauna e raica kina na lagilagi i Jisu, ka tukuna na veika e baleti koya. 42Ia sa bau lewe levu tale ga vei ira na nodra i liuliu na Jiu e ra sa vakabauti koya; ia e na vukudra ga na Farisi e ra a sega kina ni vakaraitaka e na matanavotu, de ra na qai vakatabui mai valenilotu; 43ni ra sa vinakata vakalevu cake ga na veivakadonui ni tamata, ka sega soti na veivakadonui ni Kalou. 44Sa qai kaci ko Jisu, ka kaya, “O koya sa vakabauti au, sa sega ni vakabauti au ga, sa vakabauti koya tale ga ka talai au mai. 45O koya tale ga sa raici au, sa raici koya ka talai au mai. 46Au sa lako mai ki vuravura me'u mai kena rarama, me kakua kina ni tiko e na butobuto ko koya yadua sa vakabauti au. 47Ia kevaka sa rogoca na noqu vosa e dua na tamata ka sega ni vakabauta, au na sega ni cudruvi koya, ni'u a sega ni lako mai me'u vakarusai vuravura, ia me'u vakabulai vuravura ga. 48Ko koya e sega ni vinakati au ka sega ni vakabauta na noqu vosa, sa tiko e dua me na lewai koya; na vosa ga au sa tauca oti e na qai veilewaitaki koya e na i otioti ni siga. 49Ni'u sega ni dau vosa vakataki au ga, ia ko Tamaqu ga ka talai au mai sa vakarota vei au na ka me'u kaya ka vosataka. 50Ka'u sa kila ni sa kauta mai na bula tawa mudu na nona i vakaro. Na veivosa kece gona au tauca, au dau tauca ga me vaka na ka sa vakarota vei au ko Tamaqu.”

will be added

X\