JONI 11

1E a qai tauvi Lasarusa e dua na mate. Ko Lasarusa e kai Pecani, na nodrau koro ko Meri kei Marica na tuakana. 2Sa i Meri oqo ka a lumuta na Turaga e na waiwai, ka solota na yavana e na drau ni uluna. A ganena ko Lasarusa, o koya ka tauvimate. 3E rau a talatala vei Jisu ko i rau na ganena, ka kaya, “Turaga, sa tauvimate ko koya ko ni sa dau lomana.” 4Ni sa rogoca ko Jisu sa qai kaya, “E na sega ni mate ko koya e na nona tauvimate oqo, ia e na vakalagilagi ga kina na Kalou, me qai vakalagilagi kina na Luve ni Kalou ” 5Sa dau lomani Marica, kei tacina kei Lasarusa ko Jisu. 6Ni sa rogoca ni tauvimate ko Lasarusa, sa qai tiko tale ko koya e na vanua koya ka siga rua. 7Oti koya, sa qai kaya vei iratou na nona tisaipeli, “Me datou lako tale mada ki Jutia ” 8E ratou a qai kaya vua na tisaipeli, “Vakavuvuli, e na dua wale ga na gauna e sa qai oti oqo era a via vakaviriki kemuni ko ira na Jiu; ia mo ni sa baci lako tale kina?” 9Sa qai sauma ko Jisu, “E sega li ni tinikarua na aua e na dua na siga? Kevaka e lako e dua na tamata e na loma ni siga, e na sega ni tarabe, ni sa raica tiko na rarama ni vuravura oqo. 10Ia kevaka e lako e dua e na bogi, e na tarabe, ni sega ni tiko vua na rarama ” 11E a vosataka na veika koya ko koya, ia ni sa oti sa qai kaya vei iratou, “Sa moce na nodatou i tokani ko Lasarusa; ia au sa lako me'u la'ki vakayadrati koya.” 12E ratou a qai kaya na nona tisaipeli, “Turaga, kevaka e moce wale ga, ia e na bula vinaka tale ” 13Ia ko Jisu e a tukuna tiko na nona mate; ko iratou e ratou a nanuma de moce dina ga. 14Sa qai kaya vakamatata vei iratou ko Jisu, “Sa mate ko Lasarusa. 15Ka'u sa reki e na vukumudou ni'u a sega ni tiko e kea mo dou na vakabauta kina. Ia, me datou lako mada yani vua.” 16Sa qai kaya vei iratou na nona i tokani tisaipeli ko Tomasi, o koya ka vakatokai na Drua, “Tou lako tale ga, me datou la'ki mate vata kaya ” 17Ni sa yaco kina ko Jisu, sa qai kila ni sa koto bogi va oti ko Lasarusa e na i bulubulu. 18E tiko volekati Jerusalemi ga ko Pecani, e rauta e rua vakacaca na kilomita. 19Era lewe vuqa na Jiu era a lako vei rau ko Marica kei Meri, me ra vakacegui rau e na vuku ni ganedrau. 20Ni se qai rogoca ga ko Marica ni sa lako yani ko Jisu, sa qai lako sara ka tavaki koya; ia e a tiko ga mai vale ko Meri. 21Sa qai kaya vei Jisu ko Marica, “Turaga, kevaka ko ni a tiko e ke, ke a sega ni mate na ganequ. 22Ia au kila tiko ni na solia ga vei kemuni e daidai na Kalou na ka cava ga ko ni kerea vua.” 23Sa qai kaya vua ko Jisu, “E na tu cake tale na ganemu.” 24Sa kaya vua ko Marica, “Au sa kila ni na tu cake tale ko koya e na i otioti ni siga e na gauna era na tu cake tale kina na mate ” 25Sa qai kaya vua ko Jisu, “Ko i au na tu cake tale kei na bula: ko koya sa vakabauti au, kevaka sa mate, e na bula ga; 26ia ko koya e bula tiko ka vakabauti au, e na sega sara ni mate. Ko sa vakabauta na ka oqo?” 27Sa qai kaya vua ko koya, “Io Turaga, au sa vakabauta ni sa i kemuni na Karisito, na Luve ni Kalou, o koya ka a namaki tiko me na lako mai ki vuravura” 28Ni sa kaya oti koya ko Marica, sa qai lesu yani, ka kaciva lo na tacina ko Meri, ka kaya, “Sa tiko oqo na i Vakavuvuli, ka tarogi iko tiko.” 29Ni sa rogoca ko Meri, sa tu cake sara, ka lako vei Jisu. 30Oqo e se bera tiko ni curu ko Jisu ki na koro, ka se tiko ga e na vanua ka a tavaki koya kina ko Marica. 31Ia ko ira na Jiu era a tiko vata kei Meri e vale me ra vakacegui koya, era sa qai muri koya. Era nanuma ga ni sa lako ki na i bulubulu ko koya me la'ki tagi kina. 32Ni sa yaco yani ko Meri ki na vanua ka tiko kina ko Jisu, ka raici koya, sa qai cuva sobu ki yavana, ka kaya, “Turaga, kevaka ko ni a tiko e ke, ke a sega ni mate na ganequ ” 33Ni sa raica ko Jisu na nona tagi kei ua nodra tagi na Jiu era a lako vata kaya yani, sa vutugu na yalona, ka rarawa na lomana; 34ka kaya, “E vei na vanua ko ni buluti koya kina?” Era sa kaya vua, “Turaga, ni mai raica.” 35Sa tagi ko Jisu. 36Era a kaya kina na Jiu, “Raica mada na levu ni nona lomani koya!” 37Ia era a kaya e so vei ira, “E rawa beka vua na tamata oqo, o koya ka dau vakabula na matadra na mataboko, me lewa tale ga me kakua ni mate na tamata oqo?” 38Sa qai vutugu tale kina e yalona ko Jisu ka lako ki na i bulubulu. Na i bulubulu koya e dua na qara vatu, ka kena i sogo e dua na vatu. 39Sa qai kaya ko Jisu, “Ni kauta tani na vatu!” Sa kaya vua ko Marica, na ganei koya ka a mate, “Turaga, oqo e sa na bona na yagona; ni sa oti e va na bogi na nona mate.” 40Sa qai kaya vua ko Jisu, “Au a sega li ni kaya vei iko, ni ko na raica ga na kaukauwa ni Kalou kevaka ko vakabauta?” 41Era sa qai kauta tani na vatu. Sa qai tacake ko Jisu, ka kaya, “I Tamaqu, au sa vakavinavinaka vei kemuni ni ko ni sa rogoca na noqu masu; 42ka'u kila ni ko ni sa dau rogoca e na veigauna kece ga; ia au cavuta ga oqo me baleti ira era tu voli oqo, me ra vakabauta kina ni ko ni a talai au mai ” 43Ia ni sa vosa oti vaka koya, ko koya, sa qai kaci e na domo levu, ka kaya, “Lasarusa, lako mai!” 44Sa qai lako mai tuba ko koya ka a mate; sa viviraki tu na yavana kei na ligana e na i sole ni mate, ka viviraki na uluna e na dua na i tavoi. Sa qai kaya vei ira ko Jisu, “Ni sereki koya, ka laiva me lako!” 45Ni ra sa raica e lewe vuga vei ira na Jiu ka ra a la'ki sikovi Meri na ka a cakava ko Jisu, e ra sa vakabauti koya. 46Ia e so vei ira e ra a lako vei ira na Farisi, ka la'ki tukuna na veika e a cakava ko Jisu. 47Era sa mani soqoni vata kina me dua na nodra bose ko ira na bete levu kei ira na Farisi, ka ra sa kaya, “Na cava me da cakava? Ni sa vuqa na veicakacaka mana sa cakava na tamata oqo. 48Kevaka eda vakalaivi koya tiko ga vaka oqo, era na vakabauti koya na tamata kece ga, ka ra na qai lako mai na kai Roma ka kauta tani ruarua na noda i tikotiko tabu kei na noda matanitu ” 49Ia e dua vei ira koya ko Kaiafa, na Bete Levu e na yabaki koya. Sa qai kaya vei ira ko koya, “Sa dua tani na nomuni sesewa! 50E sega li ni ko ni kila ni vinaka cake me mate e dua na tamata e na vukudra na lewe ni vanua, ka ca ni mai vakarusai na matanitu taucoko?” 51E sega ni vosataka vakai koya ga na ka koya ko koya. Ia, me vaka ga ni a Bete Levu ko koya e na yabaki koya, sa parofisaitaka kina ni na mate ko Jisu e na vuku ni nodra matanitu. 52E sega tale ga ni baleti ira wale ga na lewe ni matanitu koya, ia me rawa ni vakasoqoni ira vata tale ga na luve ni Kalou era veiseyaki tu, me ra duabau ga. 53Me tekivu mai na siga koya ka lako yani, era sa dau bosei koya se me ra vakamatei koya vakacava. 54Sa mani sega tiko kina ni veilakoyaki e na matana votu ko Jisu e na kedra maliwa na Jiu; e a biuta ga mai kea ko koya ki na vanua ka voleka ki na vanua lala, ki na dua na koro na yacana ko Ifereimi; ka tiko kina kei iratou na nona tisaipeli. 55A sa voleka na gauna me yaco kina na nodra Solevu ni Lakosivia na Jiu. Era a lako ki Jerusalemi e lewe vuqa mai taudaku ni sa bera tiko na gauna ni Solevu ni Lakosivia, me ra vakasavasavataki ira. 56Era sa vakasaqarai Jisu tiko, ka veitarogi vakai ira, ni ra sa la^ki tu e Valenisoro ka ra kaya, “A cava ko ni nanuma? E na sega beka ni lako mai ko koya ki na Solevu?” 57Ia ko ira na bete levu kei ira na Farisi era a sa vakarota tu ni kevaka e dua e kila na vanua e tiko kina ko koya, me tukuna sara vei ira ka me ra la'ki vesuki koya.

will be added

X\