JONI 10

1Sa qai kaya ko Jisu, “Au tukuna vakadodonu sara vei kemudou, ko koya e sega ni curu e na katuba ni bai ni sipi, ka kaba cake ga e na dua na sala tani, sa i koya na daubutako ka daukocokoco. 2Ia ko koya e curu e na katuba, sa i koya na i vakatawa ni sipi. 3Sa dau dolava vua na katuba ko koya na kena i vakatawa; ka ra sa vakarogoca na domona ko ira na sipi. Sa dau kacivi ira na nona sipi e na yacadra, ka liutaki ira ki tautuba. 4Ni sa kauti ira na nona sipi ki tautuba, sa liu tiko ko koya ka ra sa muri koya na sipi, ni ra sa kila na domona. 5Ia era na sega ni muria e dua na vulagi, ka ra na dro tani ga mai vua, ni ra sega ni kila na domo ni vulagi.” 6E a tukuna vei ira na vosa vakatautauvata oqo ko Jisu, ia era a sega ga ni kila na i balebale ni veika e a tukuna tiko vei ira. 7Sa qai kaya tale vei iratou ko Jisu, “Au tukuna vakadodonu sara vei kemudou, o i au na matamata ni bai ni sipi. 8Ko ira kece ka ra a liu mai vei au, era tamata dau butako ka dau kocokoco, ia era a sega ni vakarorogo vei ira ko ira na sipi. 9O i au na matamata. Kevaka e na curu kina e dua na tamata, e na vakabulai, ka na dau curu mai ka dau curu yani, ka na kune kakana. 10E sega ni dau lako wale tu ga mai na daubutako, e lako ga mai me mai butako, ka ravuravu, ka vakarusa. Au sa lako mai me rawa vei ira na bula, na bula e maucokona vinaka sara. 11“Ko i au na i vakatawa vinaka; sa solia na nona bula na i vakatawa vinaka e na vukudra na sipi. 12Ia ko koya e cakacaka saumi ga, me vaka ni sega ni vakatawa, ka sega ni taukeni ira na sipi, e na laivi ira tu ga na sipi ka dro ni sa raica na wolifa ni sa lako tiko yani; sa na qai toqovi ira na sipi na wolifa, ka veiseyakitaki ira. 13Sa dro ko koya me vaka ni cakacaka saumi ga, ka sega sara ni dua na ka vua ko ira na sipi. 14Ko i au na i vakatawa vinaka: ka'u sa kilai ira na noqu, ka ra sa kilai au tale ga ko ira na noqu; 15me vaka ga na nona kilai au na Tamaqu, kei na noqu kilai koya. Au sa solia na noqu bula e na vukudra na sipi. 16E so tale na noqu sipi era sa sega ni tiko e na bai oqo: sa dodonu me'u kauti ira tale mai, ka ra na vakarorogo ki na noqu vosa. E na qai duabau ga na qele ni sipi, ka duabau ga na i vakatawa. 17“Sa lomani au ko Tamaqu e na vuku ni noqu sa solia tu na noqu bula ka me'u na qai taura lesu tale e muri. 18E sega ni dua e mai kauta tani vei au, ka ni'u sa solia vakai au ga. Sa tu vei au na kaukauwa me'u solia, ka tu tale ga vei au na kaukauwa me'u taura lesu tale. Oqo na i vakaro sa vakarota vei au ko Tamaqu ” 19Sa qai tubu tale e dua na veileti e na kedra maliwa na Jiu e na vuku ni veivosa koya. 20Era kaya e lewe vuqa vei ira, “E curumi koya tiko e dua na tevoro, ka sa lialia; a cava ko ni vakarogoci koya kina?” 21E so tale era kaya, “Na tamata e curumi tevoro e sega ni vaka tu oqo na nona vosa; e rawata beka e dua na tevoro me vakabula na mata ni tamata mataboko?” 22Sa donuya na vula i liliwa, ka sa caka mai Jerusalemi na Solevu ni Vakatabui ni Valenisoro. 23Sa lako tiko ko Jisu e na varada nei Solomoni e na Valenisoro. 24Era sa qai sosovi koya yani na Jiu, ka ra kaya vua, “A cava soti na kena dede ko laiva me vakatataro tiko ga kina na loma i keimami? Kevaka sa i iko dina na Karisito, mo tukuna vakamacala vei keimami ” 25Sa qai sauma vei ira ko Jisu, ka kaya, “Au a sa tukuna oti vei kemuni, ko ni qai sega ni vakabauta: na veicakacaka au a sa cakava e na yaca i Tamaqu, era sa vakadinadinataki au. 26Ia ko ni sega ga ni vakabauta, me vaka ni ko ni sega ni noqu sipi. 27Era sa rogoca na noqu vosa ko ira na noqu sipi, ka'u sa kilai ira, ka ra sa muri au. 28Au sa solia vei ira na bula tawa mudu; ka ra na sega sara ni rusa, se me dua e kaliraki ira mai ligaqu. 29Ni a soli ira mai vei au ko Tamaqu, o koya ka a tu vua na kaukauwa kece ga; sa sega ni dua e rawata me kaliraki ira mai na liga i Tamaqu. 30Keirau sa duabau ga kei Tamaqu .” 31Era sa qai tomi vatu tale ko ira na Jiu me ra vakaviriki koya. 32Sa qai kaya vei ira ko Jisu, “Au sa vakaraitaka oti vei kemuni e vuqa na cakacaka vinaka mai vei Tamaqu; evei vei ira na cakacaka koya ko ni via vakaviriki au kina?” 33Era sa qai kaya vua ko ira na Jiu, “Keimami sega ni via vakaviriki iko e na vuku ni cakacaka vinaka, ia e na nomu vosa vakacacataka ga na Kalou; kei na nomu qisi iko mo Kalou, ni ko sa tamata ga.” 34Sa qai kaya vei ira ko Jisu, “E sega li ni volai tu e na nomuni Lawa ni kaya na Kalou, ʻKo ni sa kalou’? 35Kevaka sa vakatokai ira ko koya me ra kalou, ko ira ka tau tiko vei ira na vosa ni Kalou, (ka sega ni rawa me vakawaleni wale tu ga na i Vola Tabu;) 36ko ni kaya rawa li vei koya ka lesia ko Tamaqu ka tala ki vuravura ni sa vosa vakacacataka na Kalou e na vuku ni noqu a kaya, ʻKo i au na Luve ni Kalou’? 37Kevaka au sega ni cakava tiko na cakacaka i Tamaqu, ni kakua ni vakabauti au. 38Ia kevaka au sa cakava tiko, ko ni sega ni vakabauti au, ni vakadinata mada ga na noqu cakacaka mo ni kila rawa kina, ka vakadinata ni sa tiko vei au ko Tamaqu, ka'u sa tiko vei Tamaqu ko i au ” 39Era a tovolea tale me ra vesuki koya; ia e a qai dro bula mai na ligadra. 40Sa qai lako tale ko koya ki na tai kadua ni Joritani, ki na vanua ka a dau veipapitaisotaki kina e liu ko Joni; ka la'ki tiko kina. 41Era a qai lako yani vua e lewe vuqa. Era kaya, “E a sega ni dau caka mana ko Joni, ia era sa dina kece ga na ka e a kaya me baleta na tamata oqo!” 42Era a mani vakabauti koya e lewe vuqa e kea.

will be added

X\