JONI 1

1E na i vakatekivu e a sa bula tu kina na Vosa, ka rau a tiko vata kei na Kalou na Vosa, ka sa Kalou na Vosa. 2E rau a tiko vata sara ga na Vosa kei na Kalou mai na i vakatekivu. 3Sa bulia ka vakatubura na ka kece ga ko koya; ka sega ni dua na ka e caka me a sega ni cakava ko koya. 4Sa tu vua na bula; ia na bula na rarama ni tamata. 5Sa cilava na butobuto na rarama, ia e a sega ni bokoca rawa na rarama koya na butobuto. 6E a talai mai vua na Kalou e dua na tamata; a yacana ko Joni. 7A lako mai ko koya me mai tukuna na rarama, me rawa ni ra vakabauta na tamata kece ga e na vukuna. 8E sega ni rarama koya ko koya, ia e a mai tukuna ga na rarama. 9Sa i koya sara ga koya na rarama dina ka a lako mai ki vuravura ka mai vakararamataka na tamata kece ga. 10A sa tiko e vuravura ko koya, ka sa i koya ka a caka kina ko vuravura, ia e a sega ni kilai koya ko vuravura. 11E a lako ko koya ki vei ira na kai nona ia era a sega ni vakabauti koya ko ira na kai nona. 12Ia vei ira kece ga era sa ciqomi koya sa solia vei ira na dodonu ko koya me ra yaco me ra luve ni Kalou. 13Era sa sega ni yaco me ra luve ni Kalou e na vukudra na nodra qase, se e na vuku ni gagadre vakayago se e na veitalia ni tamata, ia sa vakasucumi ira ga na Kalou. 14A sa yaco me tamata na Vosa, ka mai tiko sara e na keda maliwa; sa sinai e na loloma kei na dina. Ia keitou a raica na nona i serau, ni sa vaka na i serau ni Le duabau ga nei Tamana. 15Sa qai tukuni koya ko Joni, ka kaya, “Sa i koya oqo au a kaya voli kina, 'Ko koya e muri au mai e levu cake vei keirau, me vaka ni a sa bula tu ko koya ni'u se bera ni sucu.’ “ 16Eda sa dau rawa ka kece ga mai na veika sa sinai tu vua, koya mai na loloma sa vakaikuritaki tiko ga. 17Ni sa i Mosese ka a solia mai kina na Lawa na Kalou; ia sa i Jisu Karisito ga sa yaco mai kina na loloma kei na dina. 18E sega ni dua na tamata e sa bau raica na Kalou; na Luvena ga, ko koya ka a tubu mai vua, ka sa tiko sara e na lomasere i Tamana, sa mai tukuni koya oti. 19Sa i koya oqo na ka e tukuna ko Joni e na gauna era a talai yani kina vua ko ira na bete kei ira na kawa i Livai. Era a talai ira ko ira na Jiu mai Jerusalemi, me ra la'ki kaya vua, “Ko cei beka ko iko?” 20A qai tukuna ko koya ka sega ni cakitaka, ka tusanaka ga vakadodonu, “O i au, au sega ni Karisito” 21Era sa qai taroga tale, “Ko cei beka ga? Ko iko ko Ilaija?” Sa qai kaya tale ko koya, “E sega.” “Ko iko na Parofita koya?” Sa qai sauma ko koya, “E sega .” 22Era sa qai kaya tale vua, “Ia ko cei ga ko iko? Me bau dua na ka me keimami la'ki tukuna vei ira ka talai keimami mai. A cava ko kaya me baleti iko?” 23Sa qai kaya ko Joni, “Ko i au na domona e dua sa kacikaci voli e na vanua lala, ʻCakava me dodonu na sala ni Turaga,' me vaka e a kaya ko Aisea na parofita ” 24Ia ko ira era a talai ira mai koya, era Farisi. 25Era sa qai tarogi koya, ka kaya vua, “A cava ga ko veipapitaisotaki kina ni ko sega ni Karisito, se Ilaija, se na Parofita?” 26A qai vosa vei ira ko Joni, ka kaya, “Au veipapitaisotaki e na wai; ia sa tiko e na kemuni maliwa e dua ko ni sega tiko ni kila, 27ko koya sa muri au tiko mai, ia e sega ni ganiti au mada ga me'u sereka na wa ni nona i vava .” 28A yaco tiko na veika oqo mai Pecani e na tai kadua ni Joritani, na vanua e veipapitaisotaki tiko kina ko Joni 29E na siga ka tarava, sa raici Jisu sara ko Joni ni lako tiko yani vua, ka a kaya sara, “Raica na Lami ni Kalou, o koya sa kauta tani na nodra i valavala ca na kai vuravura! 30Sa i koya ga oqo au a tukuna tiko kina, ʻSa muri au tiko mai e dua na tamata, ka sa levu cake vei keirau ko koya, ni a sa tiko e liu ko koya ni'u se bera ni sucu.' 31Au sega mada ni kila se ko cei ko koya; ia na vu ni noqu lako mai ka veipapitaisotaki e na wai koya me rawa ni ra kilai koya kina ko ira na Isireli ” 32Sa qai tukutuku tale ko Joni, ka kaya, “Au a raica na Yalo Tabu ni lako sobu mai me vaka na ruve mai lomalagi, ka mai ro toka vua. 33Au a sega tiko ga ni sa kilai koya; ia e a qai kaya vei au na Kalou, ko koya ka a talai au mai me'u veipapitaisotaki e na wai, ʻKo koya ko na raica ni lako sobu vua na Yalo Tabu ka la'ki ro toka vua, sa i koya oqori e na veipapitaisotaki e na Yalo Tabu.' 34Ia au a mani raica vaka kina ka'u sa tukuna oqo ni sa i koya ga na Luve ni Kalou.” 35E na siga ka tarava, e a tu tale e kea ko Joni kei na rua na nona tisaipeli; 36ia ni sa raici Jisu ni lako tiko yani sa kaya sara, “Raica, na Lami ni Kalou!” 37E rau a rogoca na nona vosa ko i rau na tisaipeli ka rau muri Jisu sara. 38A qai vuki ko Jisu ka raici rau ni rau sa muri tiko yani, ka mani kaya vei rau, “A cava ko drau vakasaqara?” E rau a qai kaya vua, “Rapai ” (ka kena i balebale, Vakavuvuli,) “e vei na vanua ko ni vakaitikotiko kina?” 39Sa qai kaya vei rau ko koya, “Drau lako mai mo drau mai raica.” Sa via rauta toka na va e na yakavi na gauna koya. E rau sa lako ka raica na vanua a vakaitikotiko kina, ka rau mani tiko kaya voli e na vo ni siga koya. 40E dua vei rau koya ko Adriu, na taci Saimoni Pita. 41E a kunei Saimoni taumada, na tuakana, ka kaya vua, “Keitou sa kunea na Mesaia.” (Na vosa oqo e kena i balebale na Karisito.) 42Sa qai kauti koya sara vei Jisu. E a vakaraici koya ko Jisu, ka kaya vua, “Ko iko ko Saimoni na luve i Joni; ko na vakatokai ko Kifa.” (A kena i balebale ko Pita, se vatu.) 43E na siga ka tarava, sa vinakata ko Jisu me lako ki Kalili. E a mani kunei Filipi ko koya, ka kaya vua, “Muri au mai!” 44(Ko Filipi oqo e kai Peciseita, na koro nei Adriu kei Pita.) 45A qai kunei Nacanieli ko Filipi, ka kaya vua, “Keitou sa kunei koya ka a vola ko Mosese e na i vola ni Lawa ka ra tukuna tale ga na parofita e na nodra i vola, koya ko Jisu na kai Nasareci, na luve i Josefa.” 46Sa qai kaya vua ko Nacanieli, “E rawa li ni tubu mai Nasareci e dua na ka vinaka?” A qai kaya vua ko Filipi, “Lako mai mo raica .” 47Ia ni sa raici Nacanieli ko Jisu ni sa lako tiko yani vua, sa qai kaya, “Raica, e dua na Isireli botoboto, ka sa sega vua na veivakaisini!” 48Sa qai kaya vua ko Nacanieli, “Ko ni kilai au beka vaka cava?” A sauma ko Jisu, ka kaya vua, "Au a raici iko e na gauna ko a tiko kina e na ruku ni lolo, ni sa bera ni kacivi iko ko Filipi.” 49Sa qai kaya vua ko Nacanieli, “Vakavuvuli, sa i kemuni na Luve ni Kalou, sa i kemuni na nodra Tui na Isireli!” 50A sauma ko Jisu, ka kaya vua, “E baleta li ni'u a kaya vei iko, ʻAu a raici iko e na ruku ni lolo,' ko sa vakabauta kina? Ko na raica na veika lelevu cake mai na kena oqo.” 51Sa qai kaya tale vua ko Jisu, “Au tukuna vakadodonu sara vei kemuni, ni ko ni na raica ni tadola na lomalagi ka raici ira tale ga na agilosi ni Kalou ni ra kaba cake tiko ka siro sobu vua na Luve ni Tamata”

will be added

X\