JEMESA 5

1Ni vakarorogo mada na vutuniyau! Ni tagi ka qoqolou e na vuku ni veika rarawa sa rorovi kemuni tiko mai! 2Sa vuca na nomuni i yau ka sa kania na nomuni i sulu na sarasara. 3Sa veveka na nomuni koula kei na siliva, ia na kedra veveka e na tukuni kemuni ka na kania na lewemuni me vaka na bukawaqa. O ni sa kumuni i yau vakadua tiko oqori e na i otioti ni gauna. 4Raica, sa tagi yani na i sau ko ni a bureitaka vaka i lawaki vei ira na tamata cakacaka e ra a tatamusuki e na nomuni veiwere, ka sa rogoca na nodra tagi na dau tatamusuki na Turaga ni Lewevuqa! 5O ni sa bula tiko e vuravura e na vakacegu kei na marau; o ni sa vakaurourotaki kemuni tiko me baleta na siga ni veivakamatei. 6O ni sa vakacalai koya sa sega na nona cala ka vakamatei koya; ia e a sega ni bau vorati kemuni o koya. 7Mo ni qai vosota toka mada gona kina, o i kemuni na wekaqu, me yacova na lako mai ni Turaga. Ni bau raica mada na dauteitei, ni sa waraka na vuata talei ni nona qele, ni waraka tu vakadede ka yacova ni sa tau oti na uca taumada kei na uca e muri. 8Ni wawa tale ga vaka kina! Ni vakataudeitaka na yalomuni, ni sa roro mai na lako mai ni Turaga. 9Ni kakua ni veivosakudrukudrutaki vaka i kemuni, o i kemuni na veiwekani, mo ni kakua kina ni cudruvi. Raica, sa tu e na mata ni katuba na Turaganilewa! 10O i kemuni na wekaqu, ni vakayagataki ira na parofita, o ira e ra a vosa e na yaca ni Turaga, me ra i vakarau vei kemuni e na colata na rarawa kei na nodra dau vosota. 11Raica, eda sa vakatokai ira e ra sa dau vosota me ra kalougata. O ni sa rogoca na yalo vosota i Jope, ka o ni sa raica tale ga kina na i naki ni Turaga; ni sa yalo vinaka sara ka yalo loloma na Turaga. 12Ia me kena i lutua oqo, o i kemuni na wekaqu, ni kakua ni dau bubului; kakua ki lomalagi, se ki vuravura se ki na dua tani tale na ka; ia me “io” ga na nomuni “io” ka “sega” ga na nomuni “sega” mo ni kakua kina ni cudruvi. 13E dua beka vei kemuni e rarawa tiko? E dodonu me masu. E dua beka e marau tiko? E dodonu me laga sere ni vakavinavinaka. 14E dua beka vei kemuni e tauvimate? E dodonu me kacivi ira na qase ni soqosoqo lewe ni lotu, ka me ra masulaki koya ka wali koya e na waiwai e na yaca ni Turaga. 15Ia na masu ni vakabauta e na vakabula na tamata tauvimate, ka na vakaturi koya cake na Turaga; ia kevaka e tu e so na nona i valavala ca, e na sega ni cudruvi kina. 16O koya gona mo ni qai veivakatusai valavala ca vaka i kemuni, ka veimasulaki mo ni vakabulai rawa kina. Sa ka levu sara na mana ni masu ni tamata yalo dodonu. 17A tamata vakataki keda ga o Ilaija, ia e a qai masu vagumatua me kakua ni tau na uca, ka mani sega ni tau na uca e vuravura me tolu na yabaki ka ono na vula. 18A qai masu tale ka a tau na uca mai lomalagi, ka vuataka na vuana na qele. 19O i kemuni na wekaqu, kevaka e lako sese mai na i vakavuvuli dina e dua vei kemuni ka mani la^ki vakalesui koya mai e dua tale, 20me kila ko koya oqo ni o koya yadua e la'ki vakalesuya mai e dua na tamata i valavala ca mai na nona sala cala, e na vakabula na yalo ni tamata o ya mai na mate, ka na buluta tale ga e vuqa sara na i valavala ca.

will be added

X\