JEMESA 4

1A cava na vu ni veiba, kei na vu ni veivala e na kemuni maliwa? E sega li ni ra vu tiko mai na veimataqali gagadre ca ka ra veisaqasaqa tiko e na yagomuni? 2Ko ni dau gadreva na ka eso, ka sega ni rawata; ka ko ni sa via laba kina. Ko ni daukocova na ka eso, ia ka sega ni taukena rawa; ka ko ni sa veiba ka veivala kina. Ko ni sega ni rawata na veika ko ni gadreva baleta ni sega ni ko ni kerea vua na Kalou. 3Ko ni sa dau kerekere ka sega ni rawata, e baleta ni cala na i naki ni nomuni kerekere; ni ko ni via vakayagataka ga na ka ko ni kerea e na veigagadre ca ni yagomuni. 4Ni yavu tamata sega ni yalo dina! Ko ni sega beka ni kila ni sa veimecaki kei na Kalou ko koya yadua sa via veiwekani kei vuravura? 5Se ko ni nanuma beka ni a kaya wale tu ga na i Vola Tabu, “Sa vuvutaka vakalevu na Kalou na yalo ka a solia ko koya me mai vakaitikotiko e lomada me da nona tamata ga.” 6Ia sa dau solia vakalevu cake na loloma ko koya, ka mani kaya tale gona kina na i Vola Tabu, “Sa dau vorati ira na viavialevu na Kalou, ia sa dau lomani ira na yalo malumalumu.” 7Ni vakamalumalumutaka gona kina na yalomuni vua na Kalou. Vorata na tevoro, ka na dro tani kina mai vei kemuni ko koya. 8Toro voleka vua na Kalou, ka na toro voleka yani vei kemuni ko koya. Ni savata na ligamuni, o i kemuni na daucakacala, ka vakasavasavataka na yalomuni, o i kemuni na lomalomarua! 9Mo ni loma rarawa sara ka qoqolou, ka tagi! Me vuki na nomuni dredre me tagi kei na nomuni reki me lomabibi. 10Ni vakamalumalumutaki kemuni e na mata ni Turaga, ka na qai laveti kemuni cake ko koya. 11O i kemuni na wekaqu, ni kakua ni veikaseti vaka i kemuni. O koya yadua sa kaseta na wekana, sa kaseta na Lawa ka vakalewa na Lawa. Ia ke ko ni sa vakalewa na Lawa ko ni sa qai sega ni muria na Lawa ko ni sa kena turaganilewa ga. 12Sa dua bau na Vunilawa ka Turaganilewa, ko koya sa rawata na veivakabulai kei na veivakarusai. Ia ko cei ko iko mo vakalewa na kai nomu? 13Ni vakarorogo mada, o i kemuni ko ni sa dau kaya, “E daidai se ni mataka e da na lako ki na koro ko ya, ka la'ki yabaki dua kina, ka veivoli ka rawa i yau kina.” 14Ia ko ni sa sega ni kila se e na vaka evei na nomuni bula e na mataka! A cava li na nomuni bula? Ko ni sa vaka wale ga na kabukabu, sa rairai vakadede vakalailai ga, ka sa seyavu tale yani. 15Ia e dodonu ga mo ni dau kaya, “Ke sa vaka kina na loma ni Turaga, e da na bula, ka kitaka na ka oqo se na ka ko ya.” 16Ia oqo ko ni sa bolebole tiko ka dokadokai kemuni. E ca na mataqali bolebole kece vaka ko ya. 17O koya yadua sa kila na ka e dodonu me vakayacora ka qai sega ni cakava, sa okati koya me nona i valavala ca.

will be added

X\