JEMESA 3

1O i kemuni na wekaqu, me kakua ni lewe levu vei kemuni me ra i vakavuvuli, ka ni o ni kila ni na kaukauwa cake na i vakatagedegede ni neimami lewai na i vakavuvuli. 2Ni da sa dau cakava kece ga e vuqa na cala, ia kevaka e qai sega ni cala e dua na tamata e na nona vosa, sa tamata uasivi sara o koya, ka sa rawa tale ga ni lewa na yagona taucoko. 3Kevaka eda vakabauta e gusudra na ose na kedra i tatarovi me rawa ni ra talairawarawa kina vei keda, sa rawa ni da vagolea na yagodra taucoko. 4Ni raici ira tale ga na waqa, e dina ga ni ra sa ka lelevu sara ka ra sa savukalia e na cagi kaukauwa, ia era sa vagolei ga e na dua na uli lailai sara ki na yasana sa vinakata o koya sa tauri uli. 5Sa vaka gona kina na yame, sa tiki ni yago lailai ga ia sa dau vosataka na veika lelevu. Ni vakasamataka mada na levu ni veikau e rawa ni vakamai e na dua na buka lailai ga! 6Na yame e vaka na bukawaqa. Na yame na i yaya taucoko ni ca e na kedra maliwa na veitiki na yagoda kece, ka sa dau vakadukadukalitaka na yagoda taucoko! Sa vakama na i lakolako ni noda bula taucoko e na bukawaqa sa bukani tiko kina mai eli. 7Ni sa rawa ni ra vakamanoataki ka ra sa dau vakamanoataki na veimataqali manumanu yava i va kece ga, kei na manumanu vuka, na manumanu qasi kei na ika, 8ia e se sega ga ni dua na tamata e sa vakamanoataka rawa na yame. Sa ka ca ka sega ni lewai rawa na yame, ka sa sinai e na ka gaga e dau veivakamatei! 9Eda sa dau vakavinavinakataka kina na Turaga o Tamada, eda sa dau vosavakacacataki ira tale ga kina na tamata, o ira e ra a buli me ra veiucui kei na Kalou! 10Sa lako mai na dua ga na gusu na vakavinavinaka kei na vei vakacacani. O i kemuni na wekaqu, e sega ni dodonu me vaka o ya! 11E dau tovure vata li mai na dua ga na mataniwai na waidranu kei na waitui? 12O i kemuni na wekaqu; e rawa li ni vuataka e dua na vua ni olive na vu ni lolo se me vuataka na vuanilolo e dua na vunivaini? E sega ni rawa vaka kina me vakavurea na waidranu na waitui! 13O cei beka vei kemuni e vuku ka yalomatua? Ia me vakatakila sara o koya e na nona i tovo vinaka kei na nona cakacaka sa vakayacora e na yalo malua kei na vuku. 14Ia kevaka sa tu vei kemuni na veivuvutaki ca kei na yalo ni nanumi koya ga vaka i koya, ni kakua ni qaciqacia ka lasutaka kina na dina. 15Na vuku vaka oqo e sega ni mataqali vuku ka dau lako sobu mai cake, ia e vuku vakavuravura ga, e vakayago ka vaka tevoro. 16Ni vanua e tiko kina na veivuvutaki kei na nanumi koya vaka i koya e na tiko kina na veisei kei na cakacaka kece ga e ca. 17Ia na vuku sa taka mai cake, a i matai mada ni ka, sa savasava, ka sa qai mai dau veivakacegui yani, ka yalo malua ka yalo rawarawa; sa sinai e na yalo loloma kei na vua vinaka, ka sa sega ni dau veitoyaki se dau veivakaisini. 18Ia na i valavala dodonu na vuata e dau tamusuki mai na sore ni kau e ra tea e na vakacegu na dauveivakacegui.

will be added

X\