JEMESA 2

1O i kemuni na wekaqu, ni kakua ni dau vakaduiduitaka na tamata, ni o ni sa vakabauta na noda Turaga o Jisu Karisito, na Turaga lagilagi. 2Kevaka e curuma yani na nomuni soqoni e dua na tamata e vakamama koula ka vakaisulu vinaka ka qai curu tale ga yani e dua na tamata dravudravua ka vakaisulu ca tu, 3o ni qai kauwaitaki koya ga ka vakaisulu vinaka, ka kaya vua, “Ni mai dabe mada e ke,” ia o koya na dravudravua o ni kaya vua, “La'ki tu cake tu e ke ya,” se “Mai dabe toka e yavaqu,” 4o ni sa sega li ni veivakaduiduitaki tiko vaka i kemuni ka dau vakatulewa e na vakasama ca? 5O i kemuni na wekaqu lomani, ni vakarorogo mada! E a sega beka li ni digitaki ira na dravudravua e na vuravura oqo na Kalou me ra vutuniyau e na vakabauta, ka me ra na i taukei tale ga ni matanitu ka a yalataka tu o koya vei ira e ra lomani koya? 6Ia o ni sa beca na tamata dravudravua. E sega li ni sa i ira na vutuniyau e ra dau vakararawataki kemuni? E sega li ni sa i ira e ra dau yarataki kemuni ki na mataveilewai? 7E sega li ni sa i ira e ra dau vosavakacacataka na yaca dokai o ni sa kilai kina? 8Kevaka o ni sa vakayacora dina sara na lawa ni matanitu ni Kalou, me vaka ka volai tu e na i Vola Tabu o ya, “Mo lomana na kai nomu me vaka o sa lomani iko” o ni sa na vakayacora tiko na ka dodonu. 9Ia kevaka e kune vei kemuni na veivakaduiduitaki, o ni sa i valavala ca, ka sa vakacalai kemuni na lawa ka okati kemuni mo ni tamata talaidredre. 10Ni sa yaco me cala e na lawa taucoko o koya yadua sa muria na lawa kece ka qai cala e na dua bauga na tikina. 11Ni sa i koya e a kaya, “Mo kakua ni veibutakoci,” e a kaya tale ga, “Mo kakua ni laba.” Ia kevaka ko laba, veitalia ga ni o sega ni veibutakoci, o sa talaidredre ga ki na lawa. 12Mo ni qai vosa gona ka cakacaka tiko me vakataki ira ka ra na lewai e na lawa dau veisereki. 13Ka ni na lewai ka sega ni lomani o koya sa sega ni dau loloma; ia sa gumatua cake na loloma mai na veilewaitaki ni cala. 14O i kemuni na wekaqu, a cava na kena yaga kevaka e kaya e dua na tamata ni sa tu vua na vakabauta ka qai sega vua na cakacaka? E na rawa li ni vakabulai koya na nona vakabauta? 15Kevaka e vakaisulu ca tu e dua na wekada tagane se yalewa, ka sega na kena kakana me baleta na veisiga yadua, 16ka qai kaya e dua vei kemuni, “Mo lako mada ga e na vakacegu, mo vakaisulutaki ka vakamamautaki!” ka sega ni solia vua na veika e ganita na yagona, a cava na kena yaga o ya? 17Sa vaka tale ga kina na vakabauta, ni sa tu vaka i koya ga ka sega na kena cakacaka, sa mate ga. 18Ia e na kaya beka e dua, “Sa tu vei iko na vakabauta, ka sa tu vei au na cakacaka. Vakaraitaka mada vei au na nomu vakabauta ni sega na cakacaka, ka'u na qai vakaraitaka vei iko na noqu vakabauta e na noqu cakacaka” 19O sa vakabauta ni sa dua bauga na Kalou; sa daumaka o ya. O ira tale ga na tevoro e ra vakabauta ka ra sautanini e na rere. 20O vinakata li me vakatakilai vei iko, O iko na tamata sesewa, ni sega ni rawa ni vua na vakabauta kevaka e sega na cakacaka? 21E sega li ni a vakadonui e na vuku ni cakacaka o Eparaama, na tamada, ni a vakacabori Aisake, na luvena, e na dela ni cabocabo ni soro? 22O sa raica kina ni rau a cakacaka vata na vakabauta kei na nona cakacaka, ka a la'ki vakataucokotaki na vakabauta e na cakacaka. 23A qai vakayacori kina na ka e kaya na i Vola Tabu, “Sa vakabauta na Kalou o Eparaama, ka sa okati vua me nona i valavala dodonu .” Sa qai vakatokai o koya me i tokani ni Kalou. 24O ni sa raica gona kina ni sa vakadonui na tamata e na vuku ni cakacaka ka sega ni vakabauta duadua 25Sa vaka tale ga kina, e a sega li ni vakadonui o Reapi, na yalewa dautagane, e na nona cakacaka, ni a la'ki maroroi rau na yamata ka vakauti rau e na dua tani tale na sala? 26Me vaka sa mate na yago ni sa takali na yalo, sa mate vaka kina na vakabauta ni sa takali na cakacaka.

will be added

X\