JEMESA 1

1Mai vei Jemesa, na bobula ni Kalou kei na Turaga o Jisu Karisito: Ki vei kemuni na yavusa e tinikarua o ni dui veiseyaki tu: Ni sa bula! 2O i kemuni na wekaqu, ni okata ga me ka ni reki na nomuni sota kaya na veimataqali veivakatovolei e vuqa; 3ni o ni kila sa dau vakatubura na yalo vosota na vakatovolei ni nomuni vakabauta. 4Ia me vakaotia vakavinaka na nona cakacaka na nomuni yalo vosota, me qai ka taucoko sara kina na nomuni vinaka, ka sega ni vakatikina ga. 5Kevaka e lailai na vuku vua e dua vei kemuni, me kerea vua na Kalou, ni na soli ga vua; baleta na Kalou sa dau solia na ka e na yalo vinaka vei keda kece ga. 6Ia me kerekere ga o koya e na vakabauta ka me kakua ni vakatitiqa; ni sa vaka na ua ni wasawasa sa cagina ka veitubuyaki e na cagi o koya sa vakatitiqa. 7Ia me kakua ni nanuma na tamata o ya ni na rawata e dua na ka mai vua na Turaga; 8a tamata lomalomarua sa yamekemeke na nona i valavala kece ga. 9Me reki na wekada dravudravua e na nona laveti cake, 10kei koya na vutuniyau e na nona toroi sobu; ka ni na takali yani o koya me vaka na se ni co. 11Ni sa cabe na matanisiga sa lako vata cake kei na kena cagi katakata ka vakaraqosataka na co; sa mira na sena, ka sa seyavu na kena rairai vinaka. E na takali vaka tale ga kina na tamata vutuniyau ni sa ogaoga voli ga. 12Sa kalougata na tamata sa vosota ni sa vakatovolei tiko, ia ni sa vorata rawa na veivakatovolei, e na soli vua na bula, o ya na i covi ka sa yalataka oti na Kalou vei ira e ra lomani koya. 13Me kakua ni kaya e dua ni sa veretaki, “Sa veretaki au na Kalou” ka ni sega ni dau veretaki rawa e na ca na Kalou, ka sega tale ga ni dau veiveretaki o koya. 14Ia sa dau veretaki ga na tamata yadua ni sa vakauti koya vakatani ka bacani koya na nona gagadre ca. 15Ia ni sa kunekune na gagadre ca sa vakasucuma na i valavala ca; ia na i valavala ca, ni sa yacova na kena i yacoyaco, sa vakasucuma na mate. 16O i kemuni na wekaqu lomani me kakua ni cala na nomuni vakasama! 17Sa lako mai cake na i loloma vinaka kei na i solisoli uasivi kece ga; sa lako sobu mai vua na Tama ni Rarama, o koya sa sega ni dau veivukiyaki sa vakatubu buto e na nona gole tani. 18E a vakatuburi keda mai o koya e na nona lewa ga vaka i koya e na kena vakayagataki na vosa dina me da sa vaka kina na i sevu ni veika sa bulia o koya. 19Mo ni kila tiko oqo, kemuni na wekaqu lomani! Me dau totolo ni vakarorogo na tamata yadua, ka me berabera ni cudru; 20ka ni sega ni rawa ni vakatubura na veika e dodonu vua na Kalou na cudru ni tamata. 21O koya gona mo ni qai biuta tani kina na i vakarau dukadukali kece ga kei na i vovo kece ga ni nomuni i valavala ca, ka vakabauta e na yalo malumalumu na vosa sa tei e na lomamuni, na vosa ka a vakabula rawa na yalomuni. 22Ia mo ni dau muria na vosa, ka kakua ni dau rogoca wale ga, ka vakaisini kemuni kina. 23Kevaka e rogoca wale ga na vosa e dua na tamata, ka sega ni muria, sa tautauvata kei na tamata ka ilova na matana e na iloilo; 24ia ni sa ilovi koya oti sa mai lako sara yani, ka sa guilecava sara na kena i rairai. 25Ia e na vakalougatataki e na nona cakacaka o koya sa dikeva matua na lawa, na lawa uasivi ka dau veisereki, ka sa tu dei kina; ni sa sega ni rogoca wale ga ka guilecava, ia sa rogoca ga ka vakayacora. 26Kevaka e nanuma e dua na tamata ni sa lotu, ka qai sega ni lewa rawa na yamena, sa ka wale ga na nona lotu, ka sa vakaisini koya ga vaka i koya. 27Sa i koya oqo na lotu sa savasava ka sega ni dukadukali e na mata ni Kalou o Tamada: me dau sikovi ira na luveniyali kei ira na yada e na nodra rarawa, ka qarauni koya me kakua ni vakadukadukalitaki e na veika vakavuravura.

will be added

X\