IPERIU 9

1Na i matai mada ga ni veiyalayalati era tu na kena lawa ni so-kalou ka tiko e dua na kena vale ni soro ka cakava na tamata; 2ka ni a caka e dua na vale tabu ka tu e na kena i matai ni kena i wasewase, na i tutu ni cina, na teveli, kei na madrai e dau vakacabori vua na Kalou. Sa vakatokai na tikina oqo na Loqi Tabu. 3Ia ni sivi na i karua ni lati sa tu kina na loqi sa vakatokai na Loqi Tabu Sara. 4Sa tu kina na miqa koula ka i cabocabo ni veika boi vinaka kei na Kato ni Veiyalayalati sa bonoti yavoki e na koula, ka sa tiko e loma e dua na sedre koula lailai ka tu kina na mana, kei na i titoko i Eroni ka a kubu me vakadrauna, kei na vatu raraba e rua sa volai kina na veiyalayalati. 5E na dela ni kato e rau sa tu kina na jerupi e rua ka rau vakatetaba ka vakaruruga na vanua sa dau buluti kina na ca. Ia sega ni kena gauna oqo me vakamacalataki kina vakamatailalai na veika kece oqo. 6Ia ni sa vakarautaki oti na veika oqo era sa qai dau curu ki na Loqi Tabu ko ira na bete e na veisiga ka vakayacora kina na nodra i tavi. 7Ia sa dau curu duadua ga na Bete Levu ki na Loqi Tabu Sara, vakadua ga e na dua na yabaki, ka sa sega ni rawa ni curu kina me sega ni kauta tiko na dra ka dau vakacabora e na vukuna vaka i koya kei na vuku tale ga ni nodra i valavala ca na tamata era vakayacora e na vakacala ka. 8Ia sa vakatakila e na ka oqo na Yalo Tabu ni sega ni tadola ki na Loqi Tabu Sara e na gauna kece ga e sa tiko kina na Loqi Tabu. 9Oqo e dua na i vakatakarakara e dusia na gauna oqo. A kena i balebale oqo ni sega sara ni rawa ki na i madrali kei na i soro manumanu me vakasavasavataka sara na yalodra era qarava na Kalou. 10Ia na veika oqo e baleta ga na kakana kei na ka ni gunu, kei na veimataqali soqo ni veivakasavasavataki e vuqa. Na veilawa lalai oqo me baleta na yago, sa ka ga e taudaku, era na vakayagataki wale tiko ga me yacova na gauna sa na qai vakavouya kina na ka kece ga na Kalou. 11Ia sa lako oti mai ko Karisito me vaka na Bete Levu ni veika vinaka era na yaco mai. Na vale tabu e vakaitavi kina ko koya sa levu ka uasivi cake, sa sega ni caka e na liga, ka sega ni tiki ni vuravura buli oqo. 12Ni sa curu vakadua ga ko Karisito ki na Loqi Tabu Sara ka sega ni kauta na dra ni me kei na dra ni luve ni bulumakau ia na nona dra vaka i koya sara ga, ka sa rawata kina me solia vei keda na bula tawa mudu. 13Ia kevaka sa vakasavasavataka ka sa vuya na duka ni yagodra na tamata na kena kureitaki vei ira na dra ni me kei na bulumakau kei na dravusa ni bulumakau yalewa gone, 14sa na qai wacava li na dra i Karisito! Ni a vakacabori koya vua na Kalou na Karisito e na Yalo Tabu tawa mudu e na nona savasava taucoko. la na nona dra e na vakasavasavataka na noda lewa e loma mai na veicakacaka tawa yaga me da qarava kina na Kalou bula. 15O koya oqo sa yaco kina ko koya me daunivosa ni veiyalayalati vou me ra rawata kina ko ira sa kacivi na i votavota tawa mudu ka a yalataka na Kalou. Sa rawa ni vakayacori oqo ka ni sa yaco oti e dua na mate sa rawa ni sereki ira na tamata mai na cala era a vakayacora ni ra sa vauci tu e na i matai ni veiyaIayalati. 16Ia kevaka sa tiko e dua na i vola me baleta na veiwaseyaki ni yau ni tamata mate, sa ganita me na dau vakadinadinataki taumada ni sa mate ko koya ka vola. 17Ka ni sa qai dau rawa wale ga ni vakayacori na veika sa tu kina ni sa yaco na mate, e sega ni rawa ni vakayacori e na gauna kece ga e sa bula tiko kina ko koya ka vola. 18Sa i koya oqo e a qai vakataudeitaki tale ga kina na i matai ni veiyalayalati ni sa vakadavei na dra. 19Ni a sa cavuta oti kece na i vakaro mai na Lawa ko Mosese vei ira na tamata, sa qai kauta na dra ni luve ni bulumakau kei na me kei na wai, kei na vuti ni sipi lomoci damudamu kei na isopi ka kureitaka ki na i vola ni Lawa ka vaka tale ga kina ki vei ira kece na tamata, 20ka kaya, “Sa i koya oqo na dra ni veiyalayalati sa vakarota vei kemuni na Kalou” 21A kureitaka vaka tale ga kina na dra ki na vale tabu kei na veiyaya kece ga sa dau vakayagataki e na so-kalou ko Mosese. 22Ia kevaka e sega ni vakadavei na dra e na sega ni bokoci na i valavala ca. 23Ia sa dodonu kina me ra vakasavasava-taki vaka koya na i vakatakarakara ni veika mai lomalagi; ia na veika vakalomalagi sa ganiti ira na i soro e uasivi cake mai vei ira oqo. 24Ni sa sega ni curu na Karisito ki na loqi tabu sa caka e na liga, na i vakatakarakara ni ka dina, ia sa curu sara ga ki na lomalagi dina, me rairai ki na mata ni Kalou e na vukuda. 25A sega tale ga ni la'ki vakacabori koya tiko vakavuqa, me vaka na nodra dau curuma na Loqi Tabu na Bete Levu e na veiyabaki ka kauta kina na dra ni manumanu. 26Ke sa vaka kina ke sa dodonu me na mate vakavuqa me tekivu mai na i vakatekivu kei vuravura. Ia oqo sa basika ga mai vakadua ko koya ni sa voleka na i vakataotioti me mai kauta laivi na i valavala ca e na nona cabori koya vaka i koya me i soro. 27Ia me vaka sa lesi tu me ra na mate vakadua ga na tamata, ka qai ia e muri na veilewai, 28sa vaka tale ga kina ko Karisito, ni a sa vakacabori vakadua me baleta na nodra i valavala ca na le vuqa; e na basika tale mai e na i karua ni gauna, me sega ni mai i soro tale ni valavala ca, ia me mai vakabulai ira ga era waraki koya tiko!

will be added

X\