IPERIU 8

1Na i balebale ni ka keitou kaya tiko oqo: sa tiko dina e dua na noda Bete Levu vaka koya; o koya sa dabe tiko e na liga i matau ni tikotiko vakaturaga i Koya sa Cecere Sara mai lomalagi. 2Sa cakacaka tiko vaka Bete Levu a na Loqi Tabu Sara, koya na vale laca dina ka a birika na Turaga, ka sega ni cakava na tamata. 3Ko ira kece na Bete Levu era lesi me ra dau vakacabora na i madrali kei na i soro vua na Kalou; sa ganita kina me vakacabora tale ga e so na ka na bete oqo. 4Ia, kevaka e a tiko e vuravura ko koya ke a na sega sara ga ni bete, ka ni ra sa tiko na bete era dau vakacabo i madrali me vaka na ka e kaya na lawa. 5Ia ko ira na bete oqo era sa dau veiqaravi e na vale tabu sa i vakatakarakara ka i yaloyalo wale ga ni veika mai lomalagi. Ni gauna e a vakarau tara kina na vale laca ko Mosese e a qai vakaroti koya na Kalou, ka kaya, “Qarauna mo cakava na veika kece me vaka na kena i vakarau ka a vakatakilai vei iko e na ulunivanua .” 6Ia oqo sa soli vei Karisito na cakacaka vakabete e uasivi cake sara mai na cakacaka vakabete makawa, me vaka sa uasivi cake na veiyalayalati sa kena daunivosa ko koya, ka ni sa yavutaki e na veivosa ni yalayala e uasivi cake. 7Kevaka e a sega na cala e na i matai ni veiyalayalati, ke a sega ni ganita me vaka tale e dua. 8Ia e a kunea na Kalou ni ra cala na nona tamata, ka a kaya kina: “E na yaco mai na siga, sa kaya na Turaga, ni'u na cakava kina e dua na veiyalayalati vou kei na mataqali i Isireli, kei na mataqali tale ga i Juta. 9E na sega ni vaka na veiyalayalati ka'u a cakava kei ira na nodra qase e na siga ka'u a taura kina na ligadra me'u tuberi ira tani mai na vanua ko Ijipita; ka ni ra a sega ni dina tiko e na noqu veiyalayalati, ka'u sa mani sega ni kauwaitaki ira kina, sa kaya na Turaga. 10Ia sa i koya oqo na veiyalayalati au na cakava kei ira na Isireli ni sa oti na gauna koya, sa kaya na Turaga: au na tugana na noqu lawa ki na lomadra, ka vola e na yalodra. Ka'u sa na nodra Kalou ka ra sa na noqu tamata. 11E na sega ni ganita me vakavulica na tamata yadua na nona lewe ni koro se me kaya e dua vua na kai nona, ʻMo kila na Turaga.ʼ Ni ra na kilai au kece ga, mai vei ira era lalai sara ki vei ira era cecere sara. 12Ka ni'u na vosota na nodra talaidredre, ka'u na guilecava sara vakadua na nodra i valavala ca.” 13E na nona vosataka tiko oqo na Kalou e dua na veiyalayalati vou sa okata kina ko koya na i matai ni veiyalayalati me sa madra. Ia na ka kece ga sa makawa ka madra mai era sa voleka ni takali yani.

will be added

X\