IPERIU 7

1Ko Melikiseteki oqo na tui Salemi ka bete tale ga ni Kalou Cecere Sara. E a tavaki Eparaama ni lesu tiko mai na i valu ka a vakamatei iratou kina na tui, ka vakalougatataki koya. 2E a solia vua ko Eparaama e dua na i katini ni veika kece ga ka rawata mai e na i valu. Na i matai ni balebale ni yaca i Melikiseteki na “Tui ni Dodonu” Ia me vaka ni sa tui tale ga kei Salemi, sa i balebale tale ga ni yacana na “Tui ni Vakacegu” 3E sega ni tukuni na tamana, se na tinana se na nona kawa se na i tekivu ni nona bula se na kena i tinitini. Ia sa vaka ga na Luve ni Kalou ko koya, sa bete tiko ga ka sega ni mudu. 4Ia mo ni vakasamataka mada na cecere ni tamata oqo! Ni ko Eparaama sara mada ga na noda qase e a solia vua e dua na i ka tini ni yau e rawata mai na i valu. 5Ia ko ira na luve i Livai era bete era a vakaroti e na Lawa me ra taura e dua na i ka tini ni ka mai vei ira na tamata, koya mai vei ira na wekadra, e dina ga ni ra kawa tale ga mai vei Eparaama. 6Ia na tamata oqo, o koya ka sega ni kawa vata kei ira, sa taura mai vei Eparaama na i ka tini ni nona i yau ka vosa vakalougatataki koya, ko koya ka a tau vua na vosa ni yalayala. 7Io sa sega ni vakatitiqataki ni sa dau vosa vakalougatataki koya sa lailai sobu ko koya sa cecere cake. 8E na dua na tikina, koya vei ira na bete, era sa dau kumuna e dua na i ka tini na tamata ka rawa ni ra mate, ia e na tikina ka dua, koya vei Melikiseteki, sa kumuna na i ka tini ko koya sa bula tiko ga ka sega ni mate rawa. 9Sa rawa gona kina me da kaya ni a vakacabora na i ka tini ko Livai e na gauna e a vakacabora kina ko Eparaama; 10ka ni a sa tiko ga e na tolo i Eparaama ko Livai e na gauna e rau a sota kina kei Melikiseteki. 11Ia kevaka e rawata vakavinaka sara na matabete i Livai me vakayacora na ka e nakiti me cakava, (ka ni a soli na lawa e na vuku ni matabete oqo) a cava na kena yaga me tubu mai e dua tale na bete me vakataki Melikiseteki ka sega ni vakataki Eroni? 12Ia ni sa veisau na matabete sa dodonu sara me veisau vaka tale ga kina na Lawa. 13Na noda Turaga o koya e kainaki tiko na veika oqo e na vukuna e lewe ni dua tani tale na yavusa ka sega ni sa bau dua na lewe ni yavusa koya me veiqaravi vakabete e na i cabocabo ni soro. 14Sa matata vinaka tu ni lewe ni yavusa ko Juta na noda Turaga, ka a sega ni bau kaya e dua na ka ko Mosese me baleta na yavusa koya ni vosataka tiko na ka e baleti ira na bete. 15Ia sa qai matata vinaka cake sara na ka oqo ni sa tubu cake mai e dua tale na bete ka vakataki Melikiseteki. 16E a sega ni yaco me bete ko koya e na vuku ni veika e vakaroti e na lawa me baleta na nona kawa vakatamata, ia e na kaukauwa ga ni bula sa sega ni oti rawa. 17Ka ni sa kainaki e na i Vola Tabu, “Ko iko na bete tawa mudu me vakataki Melikiseteki!” 18Sa qai biu vakatikitiki tani kina na lawa makawa me baleta ni sa malumalumu ka tawa yaga. 19Ni sa sega ni rawa ni vakataucokotaka na vinaka ni dua na tamata na Lawa i Mosese. Ia oqo sa qai soli mai vei keda e dua na i nuinui e uasivi cake, me da sa toro voleka rawa kina vua na Kalou. 20Me kena i kuri, sa tiko tale ga na bubului ni Kalou. 21E na gauna era a buli kina e so me ra bete e a sega ni bubului kina na Kalou, ia ko Jisu e a yaco me bete e na bubului i koya ka a kaya vua, “Sa bubului na Turaga ka na sega ni veisautaka na lomana, ʻKo iko na bete tawa mudu.ʼ “ 22Na duidui oqo, sa yaco kina ko Jisu me i vakadei ni dua tale na veiyalayalati e uasivi cake. 23Ia sa tiko tale e dua na kena duidui: era sa lewe vuqa ko ira na bete koya ni sa tarova na mate na nodra dui qarava tiko ga na nodra cakacaka vakabete. 24Ia ko Jisu sa sega ni vakaisosomitaki e na nona cakacaka vakabete ni sa bula tiko ga ka tawa mudu. 25O koya gona sa rawa kina vua me vakabulai ira e na veigauna kece ga ko koya me masulaki ira. 26Ni sa kilikili me noda e dua na Bete Levu vaka koya: sa yalosavasava, sa sega na nona cala, sa sega na nona duka, sa tawasei mai vei ra na i valavala ca, ka sa uasiviti lomalagi na nona cecere. 27Sa sega ni yaga me vakacaboisoro e na veisiga ko koya me vakataki ira na bete levu, oya me vakacabora taumada na i soro ni nona i valavala ca ka qai muri na nodra na tamata, ka ni sa vakacabora vakadua ga na i soro me rauta na veigauna kece ga e na gauna e a vakacabori koya ga kina. 28Io, e a lesi ira na tamata e na nodra malumalumu na Lawa i Mosese me ra bete levu, ia na vosa ni bubului ni Kalou e a qai soli e muri mai na lawa sa lesia na Luvena o koya sa caka me vinaka sara ka sega ni mudu.

will be added

X\