IPERIU 6

1O koya gona me da qai laiva koto mai kina na veivakavuvuli taumada kei Karisito ka toso yani ki liu ki na veivakavuvuli titobu sara. Me da kakua ni baci tauyavutaki tale e na veivutuni mai na veicakacaka tawa yaga kei na vakabauta na Kalou, 2na i vakavuvuli ni papitaiso, na veitabaki na liga, na nodra tucake tale na mate kei na cudruvi tawa mudu. 3Me da sa toso gona ki liu! Ni sa i koya oqo na ka eda na kitaka ke sa vaka kina na loma ni Kalou. 4Ni sa dredre sara me ra veivutuni tale ko ira era a sa vakararamataki e liu, ka ra a sa tovolea na i solisoli vakalomalagi, ka ra vakaivotavota e na Yalo Tabu. 5Era a sa tovolea na vinaka ni vosa ni Kalou kei na kaukauwa ni bula e na muri mai, 6ka ra qai saumaki ka lesu tale; ni ra sa vakota tale tiko vaka i ira na Luve ni Kalou ki na kauveilatai ka vakamaduataki koya e na matanavotu. 7Ni sa vakalougatataka na Kalou na qele sa dau gunuva na uca ka dau tau wasoma kina, ka vakatubura na veimataqali kau sa yaga vei ira sa tei e na vukudra. 8Ia kevaka e vakatubura na veikau vakavotona kei na co ca sa sega na kena yaga, sa rawa ni cudruva na Kalou, ka sa kena i tinitini me vakamai. 9E dina ga ni vaka oqo na neitou vosa, ia sa dei na loma i keitou me baleti kemuni na weka i keitou. Keitou kila ni sa nomuni na veivakalougatataki e vinaka cake e na vuku ni bula sa tiko vei kemuni. 10Ni sa sega ni tawa dodonu na Kalou me sega ni okata na nomuni cakacaka kei na loloma ko ni a vakaraitaka e na vukuna e na nomuni qaravi ira na vakabauta, me vaka ko ni sa kitaka tiko ga oqo. 11Keitou sa gadreva, e na vukumuni yadudua, mo ni dui gugumatua vaka kina me yacova na i vakataotioti; me na yaco dina sara kina na veika ko ni sa nuitaka tiko. 12Keitou sega ni vinakata mo ni yaco mo ni vucesa, ia mo ni vakataki ira ga era sa vakabauta ka dau vosota vakadede ka ra sa taukena na veika e sa yalataka na Kalou. 13E na gauna e a vosa yalayala kina na Kalou vei Eparaama, e a bubuluitaka ni na vakayacora na ka e a yalataka. Ia me vaka ni sega ni tiko e dua e cecere cake vua, e a vakayagataka ga na yacana vaka i koya me bubului kina. 14E a kaya, “Au na vakalougatataki iko dina, ka vakalevutaka sara na nomu kawa” 15Ena vuku ni nona vosota vakadede ko Eparaama, a taukena kina na veika a yalataka vua na Kalou. 16Ni sa bubului na tamata sa dau vakayagataka na yaca ni dua e cecere cake vua, ka sa dau tinia na veileti kece ga na bubului. 17O koya gona ni gadreva na Kalou me vakatakila vakavinaka sara vei ira era na taukena na ka e yalataki na kena sega ni rawa ni veivukiyaki na nona i naki, a mani vakadeitaka kina na nona yalayala e na bubului. 18E rau sa qai tu kina oqo e rua na ka, sa sega ni vukici rawa, ka sa sega ni rawa ni vosa lasu kina na Kalou. O koya gona eda sa qai vakacegui kina vakalevu ko i keda eda sa dro me da vakarurugi vua ka me da taura dei tiko na i nuinui sa tu e matada. 19Sa tu vei keda na i nuinui oqo me i kelekele dina ka dei na lomada, a sa curuma na i lati ni vale ni soro vakalomalagi ki na loqi tabu e loma sara, 20ki na vanua e a sa liu kina ko Jisu e na vukuda, ni sa yaco ko koya me bete levu tawa mudu e na matabete i Melikiseteki.

will be added

X\