IPERIU 3

1O koya gona kemuni na veiwekani yalosavasava, ko i kemuni sa kacivi me i taukei ni veika vakalomalagi, ni vakasamataki Jisu mada, na i Apositolo ka Bete Levu ni noda vakabauta. 2Ni sa yalodina ko koya vua na Kalou o koya ka a lesi koya me vaka ga na yalodina i Mosese e na nona cakacaka e na loma ni vuvale ni Kalou. 3Ia me vaka sa dau dokai vakalevu cake ko koya ka tara na vale ka vakalailai ga na vale sa ganiti Jisu vaka kina na veivakalagilagi e uasivi cake mai na kena e a soli vei Mosese. 4Na vale kece ga e tara, e tara na tamata, ia na Kalou sa tara na ka kece ga. 5Sa yalodina ko Mosese e na vuvale taucoko ni Kalou. Ia ko koya e dua ga na dauveiqaravi, ka sa tukuna na veika e na qai kaya e muri na Kalou. 6Ia sa yalodina ko Karisito me vaka e dua na Luve ni taukei ni vale e na vuvale ni Kalou. Ko i keda eda vakabauti koya eda sa lewe ni nona vuvale kevaka e da sa tu dei ka yalodina tiko ki na ka eda sa vakanuinui kina. 7O koya gona me vaka sa kaya na Yalo Tabu: “Edaidai, kevaka ko ni sa rogoca na domona, 8ni kakua ni vakaukauwataka na lomamuni, me vaka ko ni a kitaka e na nomuni a vakacudruya na Kalou, na nomuni a vakatovolei koya e na loma ni lekutu. 9ʻE kea era a veretaki au ka vakatovolei au kina ko ira na nomuni qase,ʼ a kaya na Kalou, 'e dina ga ni ra a sa raica tiko na ka au cakava e na vasagavulu na yabaki. 10O koya gona au a cudruvi ira kina na i tabatamata ko ya, ka kaya, “Sa dau cala tu ga na nodra vakasama, ka ra sa sega ni muria na noqu i valavala” 11Au a bubului kina e na noqu cudru, ka kaya: ʻEra na sega sara ni curu mai ka mai vakacegu vata kei au!ʼ ” 12Kemuni na wekaqu, ni qarauna me kakua ni dua vei kemuni e tiko vua na yalo ca ka sega ni vakabauta ka me biuta laivi kina na Kalou Bula. 13Ia mo ni dauveivakatataki cake tiko ga vaka i kemuni e na veisiga e na gauna kece ga e sa vakatokai tiko kina na siga me “edaidai”, me kakua kina ni dua vei kemuni e vakayalokaukauwataki e na i lawaki qaseqase ni valavala ca. 14E da sa i tokani i Karisito, kevaka e da sa taura dei tiko na vakabauta ka a tiko vei keda mai na i vakatekivu ka yacova na i vakataotioti. 15Oqo na ka e a kaya na i Vola Tabu: “E daidai, kevaka ko ni sa rogoca na domona, ni kakua ni vakaukauwataka na lomamuni, me vaka ko ni a kitaka e na nomuni a vakacudruya na Kalou.” 16Ko cei li ko ira era a rogoca na domo ni Kalou, ka ra qai sega ni muria? E sega li ni sa i ira kece ga ka a liutaki ira tani mai Ijipita ko Mosese? 17Ka sa i cei li e a cudruvi ira na Kalou me vasagavulu na yabaki? E sega li ni sa i ira era a i valavala ca, ka ra a bale mate e na loma ni veikau? 18Se ki vei cei li e a bubului kina na Kalou ni ra na sega ni curu ki na nona vakacegu? E sega li ki vei ira ga ka ra a talaidredre? 19E da sa qai raica, ni ra a sega ni curu rawa kina ni ra sega ni vakabauta.

will be added

X\