IPERIU 2

1O koya gona sa dodonu kina me da vakasamataka sara vakabibi na veika eda a sa rogoca oti me da kakua kina ni lako sese. 2Kevaka e dina na i tukutuku e ra a kacivaka na agilosi, oya ni sa dau saumi vakadodonu na i valavala ca kei na talaidredre kece ga, 3e da na bula rawa vakacava kevaka eda vakawaletaka na veivakabulai levu oqo? E a tukuna taumada na veivakabulai oqo na Turaga, ka ra sa vakadinadinataka mai vei keda ko ira era a rogoci koya. 4E sala vata oqo kei na nona vakadinadinataka na Kalou na dina ni veitukutuku oqo e na nona cakava na veivakatakilakila e so, na veika veivakurabuitaki e so kei na veimataqali cakacaka mana e so, ka sa veivotayaka tale ga na veisolisoli ni Yalo Tabu me vaka na lomana. 5A sega ni lesi ira na agilosi na Kalou me lewa na vuravura e na muri mai, na vuravura keitou sa tukuna tiko. 6Ia e a vakaraitaki toka ga vaka oqo e na dua na tiki ni Vola Tabu: “A cava na tamata mo ni nanumi koya kina, se na luve ni tamata, mo ni kauwaitaki koya kina? 7Ko ni sa buli koya me lolovira toka mada vakalailai vei ira na agilosi; ko ni sa vakaisalataki koya e na lagilagi kei na vakarokoroko, 8ka lesi koya me lewa na veika kece ga.” Ia ni sa soli vua na tamata me lewa na veika kece ga, sa qai sega ni vo e dua na ka me sega ni lewa. Io edaidai eda sa sega ni raica ni sa lewa na veika kece ga na tamata. 9Ia eda sa raici Jisu ga, o koya ka a vakalolovirataki sobu vei ira na agilosi e na dua na .pa gauna lekaleka wale ga me yaco rawa kina e na loloma ni Kalou, me mate e na vuku ni tamata kece ga. Eda sa raici koya ni sa vakaisalataki e na lagilagi kei na vakarokoroko edaidai e na vuku ni mate ka a sa sota kaya oti. 10Ni sa kilikili vua na Kalou o koya sa bulia ka lewa tu na veika kece ga me qisi Jisu me uasivi duadua na nona bula e na nona vosota na rarawa me rawa kina ni kauta e lewe vuqa na luvena me vakaivotavota e na lagilagi i Jisu. Ni sa i Jisu ga sa liutaki ira ki na bula. 11Ni sa dua vata ga na Tamadra na vakasavasavataki kei koya sa veivakasavasavataki. Koya na vuna e sega kina ni madua ko Jisu me vakatokai ira me ra tacina. 12Me vaka e a kaya, “Au na tukuna na yacamuni vei ira na taciqu; au na vakacaucautaki kemuni e na sere e na kedra maliwa na i soqosoqo lewe ni lotu.” 13A kaya tale, “Au na vakararavi vua na noqu Kalou.” Ka a kaya tale ga, “Sa i au oqo kei ira na gone sa solia vei au na Kalou.” 14Ia me vaka ni ra sa vakalewe ka vakadra ko ira na gone sa yaco me vaka tale ga kina ko Jisu, ka me rawa kina, e na vuku ni nona mate me vakamalumalumutaki koya sa lewa na mate, koya na tevoro; 15ka me sereki ira era sa bobula tu e na nodra bula taucoko e na vuku ni nodra rerevaka na mate. 16Ni sa matata vinaka ni sega ni mai vukei ira na agilosi ko koya, ko ira ga na kawa i Eparaama. 17Sa i koya oqo sa kilikili kina kei koya me yaco me vakataki ira sara na tacina e na ka kece ga; me yaco rawa kina me nodra Bete Levu, dauloloma ka lomadina e na cakacaka ni Kalou; me sorovaka na nodra i vakavala ca na tamata. 18Me vaka ni a sa dau veretaki ka vakararawataki ko koya, sa rawa vua edaidai me vukei ira era sa dau veretaki.

will be added

X\