IPERIU 13

1Me ia tiko ga na veilomalomani vakaveitacini. 2Ni kakua ni guilecava mo ni dau dolava na nomuni vale vei ira na vulagi, ka ni vakarau koya era a vakaceguya kina e so na agilosi e so na tamata ka ra sega ni kila. 3Ni dau nanumi ira era tiko e valeniveivesu, me vaka sara ga ko ni tiko vakavesu vata kei ira. Ni nanumi ira tale ga era vakararawataki tiko me vaka sara tale ga ni ko ni sa vakararawataki tiko e na yagomuni. 4Sa dodonu mo ni doka taucoko na tiko vakawati, ka me rau sa dau veidinadinati na tagane kei na yalewa, ni na lewai ira na dauyalewa kei na dautagane kei ira na dauveibutakoci na Kalou. 5Ni kakua ni laiva na nomuni bula me tacori e na dau kocova na i lavo ka mo ni okata me sa rauti kemuni na veika sa tu vei kemuni. Ni a sa kaya oti na Kalou, “Au na sega sara ni biuti iko se laivi iko” 6O koya gona eda sa rawa ni kaya vakadoudou kina, “Sa dau vukei au na Turaga ka'u na sega ni rere! A cava li era rawa ni kitaka vei au na tamata?” 7Ni nanumi ira na nomuni i liuliu era sa yali yani ko ira ka a dau tukuna vei kemuni na vosa ni Kalou. Ni vakasamataka na i tovo ni nodra bula me yacova na nodra mate ka vakadamurimuria na nodra vakabauta. 8Ko Jisu Karisito, sa i koyakoya tiko ga e na siga e na noa, edaidai, kei na veigauna kece ga mai muri. 9Ni kakua ni laiva me ra vakauti kemuni tani mai na sala dodonu na veimataqali i vakavuvuli e vuqa. Ni sa ka vinaka me vakaukauwataki na yaloda e na loloma soli wale ni Kalou, ka sega e na vuku ni kena muri tiko na veivakaro me baleta na kakana; ka ni ko ira mada ga era a dau vakayacora e a sega ni dua na betena vei ira. 10Ko ira na bete era veiqaravi e na vale tabu sa sega ni tara vei ira me ra kania na i soro sa vakacabori e na noda i cabocabo ni soro. 11Ni sa dau vakamai e na i bili ni koro na yagodra na manumanu ia era sa dau kauta na kedra dra ki na Loqi Tabu Sara na Bete Levu me i soro ni valavala ca. 12E a mate vaka tale ga kina ko Jisu e na taudaku ni matamata ni koro me vakasavasavataki ira na tamata mai na nodra i valavala ca e na nona dra vaka i koya. 13O koya gona me da sa mai lako yani ki vua ki na i bili ni koro, ka vakaivotavota e na nona vakamaduataki. 14Ka ni sa sega na noda koro e na muri mai. 15O koya gona me da sa qai dau cabora tiko ga kina vua na Kalou e na vuku i Jisu na i madrali ni vakavinavinaka, koya na vua ni tebe ni gusuda sa vakatusa tiko na yacana. 16Ni kakua ni guilecava mo ni dau caka vinaka ka dau veivukei; ni sa vinakata na Kalou na i madrali vakaoqo. 17Ni talairawarawa vei ira na nomuni i liuliu, ka vakayalomalumalumutaki kemuni vei ira, ni ra sa yadrava tiko na yalomuni, ka ni na vakatarogi ira kina na Kalou e muri. Ke ko ni kitaka oqo era na vakayacora na nodra i tavi e na marau, ka sega e na yalo rarawa ka ni na sega ni dua na kena yaga vei kemuni koya. 18Ni dau masulaki keitou tiko ga. Keitou vakadinata ni sa vinaka tiko na neitou lewa e loma, ni keitou sa vinakata me keitou vakayacora tiko ga na ka dodonu e na veigauna kece ga. 19Au sa vakauqeti kemuni vagumatua sara mo ni masulaki au, me rawa ni'u vakasukai tale kina vakatotolo ki vei kemuni. 20Me cokonaki kemuni mada ga e na veika vinaka kece ga na Kalou ni veivakacegui, o koya ka a vakatura cake tale mai na mate na noda Turaga ko Jisu na nodra i Vakatawa Levu na sipi, e na dra ni veiyalayalati tawa mudu. 21Mo ni vakayacora rawa kina na lomana. Me sa eakava tale ga ko koya e lomamuni na veika sa vinaka vua, e na vuku i Jisu Karisito, o koya me sa ia vua na veivakalagilagi ka sega ni mudu. Emeni. 22Au sa vakamasuti kemuni na wekaqu mo ni rogoca e na yalovosota na vosa ni veivakauqeti oqo; ka ni sega soti ni balavu na i vola au sa vola yani oqo vei kemuni. 23Au vinakata mo ni kila ni sa sereki mai valeniveivesu na wekada ko Timoci. Kevaka e na tadu totolo mai keirau na lako vata yani vei kemuni. 24Au sa loloma yani vei ira kece na nomuni i liuliu kei ira kece na tamata ni Kalou. Era sa loloma tale tu ga yani vei kemuni ko ira na wekamuni e Itali. 25Me tiko vei kemuni kece ga na loloma ni Kalou! Emeni.

will be added

X\