IPERIU 12

1O koya gona ni ra sa vakavolivoliti keda vaka oqo e dua na i lala i vakadinadina levu, me da sa biuta laivi sara na veika kece ga era vakabibitaki keda tu kei na i valavala ca sa kabiti keda matua tiko, ka me da ciciva tiko ga e na yalo dei na cere sa tu e matada. 2Me da rai tiko ga vei Jisu, o koya ka a vakatekivuna ka na vakacavara tale ga na noda vakabauta; o koya tale ga, e na vuku ni marau e waraki koya tu, a sega kina ni maduataka na mate e na kauveilatai ka sa dabe tiko kina edaidai e na liga i matau ni tikotiko vakaturaga ni Kalou. 3Ni vakasamataki koya mada ka a vosota na veivakacacani levu ka ra a cakava vua na i valavala ca! O koya gona ni kakua kina ni yalo lailai se datuvu koso. 4E na nomuni veivala kei na i valavala ca ko ni sa sega mada ni vala me yacova sara yani na vakadavei ni nomuni dra. 5Ko ni sa guilecava li na vosa ni veivakayaloqaqataki ka a vakatokai kemuni kina na Kalou mo ni luvena? “Na luvequ, kakua ni vakawaletaka na veivakadodonutaki ni Turaga, ka kakua ni yalolailai ni sa vakanakuitataki iko ko koya. 6Ni sa dau vakadodonutaki ira kece sa lomani ira na Turaga, ka sa vakanakuitataki ira sa okati ira me ra luvena” 7Ni vosota na veika rarawa ko ni sota kaya me vaka ga era i kuita ni dua na tama; baleta ni nomuni vakararawataki sa vakaraitaki kina ni sa okati kemuni na Kalou mo ni luvena. E a sa bau dua li na gone e sega ni dau cudruvi koya ko tamana? 8Ia kevaka ko ni sega ni cudruvi me vakataki ira kece na luvena, sa kena i balebale ga ni ko ni sega ni luvena dina, ko ni gone ga ni sala. 9O ira tale ga na tamada vakayago era sa dau cudruvi keda, ia eda sa dau dokai ira kina. E sega li ni ganita cake me da vakayalomalumalumutaki keda vua na Tamada vakayalo, ka me da bula kina? 10Ko ira na tamada vakayago era dau cudruvi keda vakalekaleka ga me vaka na ka era vinakata, ia sa dau cudruvi keda na Kalou me da vinaka kina, ka me da vakaivotavota e na nona yalosavasava. 11E na gauna eda totogitaki kina sa vaka mera mosi kece ga na i totogi ka sega ni ka me da marau kina; ia e muri era sa qai dau tauca kina na vakacegu kei na yalododonu vei ira era sa tuberi cake kina. 12O koya gona mo ni qai laveta cake na ligamuni sa wadamele tu ka vakaukauwataka na durumuni malumalumu. 13Ni vakadodonutaka na sala mo ni muria me kakua kina ni vakaleqai na yava sa lokiloki tu, ia me vakabulai ga. 14Ni segata mo ni tiko veilomani kei ira kece ga na tamata, ka tovolea mo ni bula voli e na yalosavasava, ka ni na sega ni raica rawa na Turaga e dua na tamata ke sega ni yalosavasava. 15Ni qarauna me kakua ni dua vei kemuni e vakanadakuya na loloma ni Kalou. Ni qarauna tale ga me kakua ni dua vei kemuni e yaco me vaka na kau gaga sa tubu cake, ka vakavure leqa vei ira na lewe vuqa e na vuku ni kena gaga. 16Ni qarauna me kakua ni dua e yaco me dauyalewa ka tawa lotu me vakataki Iso, o koya ka a volitaka na nona i tutu vakaulumatua e na dua ga na kana. 17Ia ko ni sa kila ni a qai vinakata e muri me taukena na veivakalougatataki i tamana sa sega ni vakadonui, baleta ni a sega ni kunea e dua na sala me veisautaka tale kina na ka e a sa kitaka oti, e dina ga ni a vakasaqara matua ko koya ena nona tagi. 18Ni ko ni sa sega ni lako mai ki na veika ko ni rawa ni tara, na bukawaqa caucaudre ni Saineai, kei na o loaloa, kei na butobuto, kei na cava, 19kei na rorogo ni davui kei na dua na domo ni vosa ka ra a vakamamasu kina na rogoca me kakua ni vosa tale vei ira. 20Ni ra a sega ni vosota rawa na ka e a vakaroti mai, “Ke mani dua wale mada ga na manumanu yava i va e yacova na ulunivanua, sa dodonu me vakaviriki e na vatu” 21Io e a sa vakadomobula dina na kena i rairai ka a kaya kina ko Mosese, “Au sa sautaninini e na rere!” 22Ia oqo ko ni sa lako mai ki na Ulunivanua ko Saioni, ki na koro ni Kalou bula, ko Jerusalemi vakalomalagi, ki vei ira na agilosi sa sega ni wili rawa na kedra i wiliwili era sa soqoni vata tu e na marau. 23Ko ni sa lako mai ki na nodra i soqosoqo na ulumatua era sa volai tu mai lomalagi, vua tale ga na Kalou o kaya sa turaganilewa ni tamata kece ga; ki vei ira tale ga na yalodra na tamata yalododonu era sa vakasavasavataki sara. 24Ko ni sa lako tale ga mai vei Jisu na dauniveivosaki ni veiyalayalati vou, kei na dra sa kureitaki; na dra ka a tukuna na ka e uasivi cake mai na kena ka tukuna na dra i Epeli. 25Mo ni qarauna mo ni kakua ni bese ni rogoci koya sa vosa tiko. Ni kevaka era a sega ni dro bula rawa ko ira era a bese ni rogoci koya ka a vunauci ira e vuravura, eda sa na qai sega sara ni dro bula rawa ko i keda kevaka eda sega ni via rogoci koya sa veivunauci tiko mai lomalagi. 26E a yavalata na vuravura na domona e na gauna koya, ia na gauna oqo sa yalataka ko koya ka vaka, “Au na vakayavalata vakadua tale mada na vuravura, io kei na lomalagi tale ga.” 27Na vosa oqo, “vakadua tale mada”, sa vakaraitaka ni ra na biu laivi na veika era sa vakayavalati rawa me vaka ni ra sa ka buki wale ga me rawa kina ni qai vakavo tu ga na ka sa sega ni yavalati rawa. 28O koya gona me da sa qai vakavinavinaka tiko ga kina ni sa soli vei keda e dua na matanitu ka sega ni yavalati rawa; me da marau ka cabora kina vua na Kalou na i soro vakayalo sa vinaka vua, e na vakarokoroko kei na rere, 29ni sa bukawaqa dau veivakarusai na noda Kalou!

will be added

X\