IPERIU 11

1Ia na vakabauta sa i koya na noda vakadinata ni na yaco na veika eda nuitaka, na noda kila ni ra tu dina na veika eda sega ni raica. 2Sa i koya na ka oqo e a vakadonui ira kina na qase e liu na Kalou. 3E na vakabauta, sa macala kina vei keda ni a buli na vuravura e na vosa ni Kalou, me qai yaco kina me caka na veika sa laurai rawa mai na veika sa sega ni laurai. 4E na vakabauta, e a vakacabora kina ko Epeli na i soro e vinaka cake mai na nei Keni. Na nona vakabauta e a vakadonui kina ko koya ka okati kina me yalododonu, ka sa vakadinadinataka na ka oqo na Kalou ni sa vakadonuya na i madrali. lo e na vuku ni vakabauta e a sa vosa tiko ga kina ko Epeli ni sa mate oti. 5E na vakabauta, e a kau cake kina ko Inoke ka me kakua ni kila na mate; e a mani sega ni kune tale, ni a sa kauti koya cake na Kalou. Ia ni sa bera ni kau cake e a sa vakadinadinataka na i Vola Tabu ni sa vinaka vua na Kalou ko koya. 6Ia kevaka sa sega na vakabauta sa ka dredre sara me da vinaka vua na Kalou ni ko ira kece ga era via torova na Kalou e dodonu me ra vakabauta ni sa bula tiko ko koya, ka ni sa dau saumi ira tale ga era vakasaqarai koya. 7Na vakabauta, e a rogoca kina ko Noa na i vakasala ni Kalou me baleta na veika ka ra sa sega ni laurai e na gauna koya, ka taya tale ga kina na waqa ka a vakabulai kina na nona vuvale. E na vuku ni nona vakabauta sa vakadinadinataka kina ko koya ni sa cala ko vuravura ka sa yaco kina me taukena e muri na veivakadonui sa dau yaco mai e na vuku ni vakabauta. 8Na vakabauta, e a talairawarawa kina ko Eparaama e na gauna ka a kacivi koya kina na Kalou me lako ki na dua na vanua sa yalataka me soli vua me taukena. A cavutu ka lako, ia e a sega ni kila na vanua sa lako tiko kina. 9Na vakabauta, e a la'ki tiko vakavulagi voli kina ko koya e na vanua ka a yalataka vua na Kalou. E ratou a vaka i tikotiko voli ga e na vale laca kei Aisake kei Jekope, ko i rau ka rau na taukena vata kei koya e muri na veika ka a yalataka na Kalou. 10A namaka tiko ko Eparaama na koro sa tu dei na kena yavu, na koro sa tauyavutaka ka tara na Kalou. 11Na vakabauta, sa rawa talega vei Eparaama me vakaluveni, dina ga ni sa qase sara, ka yaco talega vei Sera na kaukauwa me kunekune, dina ga ni a sa sivia na gauna ni vakasucu gone. E a vakadinata ko koya e lomana ni sa yalodina na Kalou ko koya ka a yalayala vua. 12Sa qai yaco gona kina me tubu mai vua e dua bauga na tamata ko koya ka a sa wili tu me vaka na tamata mate, e vuqa sara tale na nona kawa, na kedra levu, sa vaka na i wiliwili ni veikalokalo ni lomalagi, ka vaka na mata ni nuku ni matasawa, sa sega ni wili rawa! 13Era sa mate kece yani ko ira oqo e na vakabauta. Era a sega ni taura na veika e a yalataka vei ira na Kalou, ia era a sa raica vakayawa tu ga mai ni ra a tiko vakavulagi ga ka dau veilakoyaki voli e vuravura. 14Ko ira e vaka koya na nodra i vosavosa era vakatakila tiko ni ra sa vakasaqara tiko na nodra vanua dina. 15Ia kevaka era a nanuma tiko na vanua era a cavutu mai kina, e ka rawarawa sara na nodra lesu tale kina. 16Ia era sa gadreva ga e dua na vanua e uasivi cake, koya na vanua vakalomalagi. O koya gona oqo sa sega kina ni madua na Kalou ni vakatokai me nodra Kalou, ka ni sa vakarautaka oti tu ko koya e dua na koro me nodra. 17Na vakabauta, e a vakacabori Aisake kina ko Eparaama e na gauna a vakatovolei koya kina na Kalou. Ia ko Eparaama ko koya ka tau vua na veivosa ni yalayala e a makutu me vakacabora me i soro kama na luvena e dua bauga. 18Na luvena oqo e a yalataka kina vei Eparaama na Kalou, “Ko na vakawa e na vuku i Aisake.” 19Ia e a vakadinata e lomana ko Eparaama ni sa rawa vua na Kalou me vakabulai ira na tamata mai na mate. O koya gona sa rawa ni kainaki kina ni a soli lesu tale vua ko Aisake mai na mate. 20Na vakabauta, e a tauca kina ko Aisake na vosa ni veivakalougatataki vei rau ko Jekope kei Iso me baleta na veika e a sa tu ki liu. 21E na vakabauta, e a vosa vakalougatataki rau kina na luve i Josefa tagane ko Jekope ni sa bera ni mate; a sa cuva sobu ki na ulu ni nona i titoko ka masu vua na Kalou. 22E na vakabauta, sa tukuna kina ko Josefa e na gauna sa voleka kina ni mate na nodra biuti Ijipita na Isireli; ka tataunaka tu na ka me na caka ki na yagona. 23E na vakabauta, e rau a vunitaki Mosese kina na nona i tubutubu mai na gauna e sucu kina me vula tolu. E rau a raica ni sa dua na gone rairai vinaka ka rau a sega ni rere me rau talaidredre ki na lewa ni tui. 24Na vakabauta, e a bese kina ni vakatokai me luve i koya na luve ni Fero yalewa ko Mosese ni sa tamata bula mai. 25E a digitaka me la'ki vakararawataki vata kei ira na tamata ni Kalou ka sega ni vinakata me bau la'ki marautaka vakalekaleka mada ga na veika lasuwale ni valavala ca. 26E a okata ko koya ni sa i yau levu cake na veivakalialiai e a sota koya e na vuku i Karisito, ka lailai na i yau kei Ijipita; ni a rai sara tiko ko koya ki na i covi sa wawa tu mai liu. 27Na vakabauta, e a biuti Ijipita kina ko koya ka sega ni rerevaka na cudru ni tui; e vaka ga e a sa raici koya sara tiko na Kalou sa tabogo, ka a sega kina ni saumaki lesu. 28Na vakabauta, e a vakayacora kina ko koya na Kanavata ni Lakosivia ka vakarota me kureitaki na dra, me kakua kina ni tarai ira na ulumatua ni Isireli na Dauveivakarusai. 29Na vakabauta, era a lako kosova kina na Isireli na Wasa Damudamu me vaka ga e a vanua mamaca; ia era a vakatovolea me ra kitaka vaka kina ko ira na Ijipita ka mani luvuci ira na wasawasa. 30Na vakabauta e a bale kina na bai kei Jeriko ni sa oti na nodra la'ki lako wavolita tiko na Isireli e na vitu na siga. 31Na vakabauta, e a sega kina ni mate vata kei ira era a talaidredre vua na Kalou ko Reapi, na yalewa dautagane, ni a vakacegui rau na yamata. 32Ka cava soti li me'u kaya tale? Sa na sega ga na gauna me'u tukuna kina na ka e baleti Kitione kei Paraki kei Samisoni kei Jefeca kei Tevita kei Samuela kei ira na parofita. 33E na vuku ni vakabauta, era a vakamalumalumutaka kina ko ira oqo na veimatanitu e so. Era a kitaka na veika dodonu ka a vakayaeori vei ira na vosa ni yalayala e so. Era a sogota na gusudra na laione; 34era a bokoca na bukuwaqa kaukauwa, ka ra a dro bula mai na i seleiwau. Era a vakaukauwataki mai na nodra malumalumu, ka ra a qaqa e na i valu ka vakasavi ira laivi na veimataivalu tani. 35E na vakabauta, era a vakaturi tale ko ira na mate ka soli lesu vei ira na watidra yalewa. Era a vakararawataki e so, ka ra a bese ni sereki, me nodra kina na tu cake tale e vinaka cake. 36E so tale era a vakalialiai ka vakanakuitataki, ka ra vesu tale ga e na sinueodo ka biu ki na vale ni veivesu. 37Era a lauviri e na vatu; era a varomusuruataki; era a vakamatei e na i seleiwau. Era a veilakoyaki voli ka vakaisulu e na kuli ni sipi kei na kuli ni me, era dravudravua ka vakararawataki, ka vakacacani. 38Sa sega ni ganiti ira na vuravura oqo! Era a veiseyaki ka vakalakova na veivanua lala kei na veiulumvunua, ka ra vakaitikotiko e na veiqara e loma ni qele kei na veiqara vatu. 39Ko ira kece koya, e dina ga ni ra sa rogo vinaka e na vuku ni nodra vakabauta ia e a sega ga ni yaco dina vei ira na ka e a yalataki. 40Ni a sa vakarautaka tu na Kalou e dua na ka e vinaka cake me baleti keda; koya me ra na qai taura vata ga kei keda ko ira koya na ka e a yalataki.

will be added

X\