IPERIU 10

1Ia me vaka sa tu e na Lawa na i yaloyalo wale ga ni veika dina era na muri mai, ka sega ni vatukana dina, e na sega sara ni rawa ki na i soro sa dau vakacabori e na veiyabaki me vakasavasavataki ira vakadua era sa torova kina na Kalou. 2Kevaka sa vaka kina, e sega li ni sa na mudu na kedra vakacabori tiko? Kevaka era a sa vakasavasavataki vakadua ko ira ka vakacabo i soro vua na Kalou ke ra sa na sega ni vakila tale ni ra i valavala ca. 3Ia e na i soro kece koya sa dau vakananumi tale kina vei ira na tamata na nodra i valavala ca e na veiyabaki. 4Ni sa dredre sara me kauta laivi na i valavala ca na dra ni bulumakau kei na me. 5O koya oqo e a kaya kina vua na Kalou ko Karisito ni sa lako mai ki vuravura: “A i soro kei na i madrali ko ni sa sega ni vinakata, ia ko ni sa vakarautaka ga vei au na yago. 6A i soro kama kei na i soro ni valavala ca ko ni sa sega ni taleitaka. 7Au sa qai kaya, ʻKemuni na Kalou, raica au sa lako mai, me'u vakayacora na lomamuni, me vaka sa volai tu e na i vola vivigi e na vukuqu.ʼ “ 8Sa kaya taumada ko koya, “Ko ni sa sega ni gadreva se taleitaka na i soro kei na i madrali, se na i soro kama kei na i soro ni valavala ca;” e dina ga era sa dau vakacabori na veika oqo me vaka na ka e kainaki e na Lawa. 9Sa qai vakuria tale ka kaya, “Raica, au sa lako mai me'u vakayacora na lomamuni na Kalou.” Sa biuta tani na Kalou na veisoro makawa ka sa ciqoma na i soro sa cakava na Karisito me kena i sosomi. 10Ni sa vakayacora ko Karisito na ka e vinakata na Kalou, eda sa vakasavasavataki kece mai na noda i valavala ca e na i soro sa vakacabora ga vakadua me baleti keda kece na tamata. 11Era sa tu na bete yadua ka vakayacora na dui nodra i tavi e na veisiga ka vakacabora vakawasoma e dua tiko ga na mataqali i soro. Ia na i soro kece oqo sa sega ni kauta tani rawa na i valavala ca. 12Ia ko Karisito ni sa vakacabora oti vakadua e dua bau ga na i soro ni valavala ca me baleta na veitabagauna kece ga, sa qai tiko sobu e na liga i matau ni Kalou. 13Sa na waraka tiko e kea na gauna sa na qai vakadrukai ira kina na nona meca na Kalou me ra i tutu ni yavana. 14E na dua ga na i soro sa vakavinakataki ira kina vakaoti ko koya na tamata keee ga era sa vakasavasavataki tiko mai na nodra i valavala ca. 15A sa vakadinadinataka tale ga vei keda na ka oqo na Yalo Tabu ni sa kaya: 16“Sa i koya oqo na veiyalayalati au na kitaka kei ira ni sa oti na gauna koya, sa kaya na Turaga: Au na tugana na noqu lawa ki na yalodra, ka vola e na lomadra” 17Sa qai vakuria tale ka kaya: “Au sa na sega ni nanuma tale na nodra i valavala ca kei na nodra talaidredre” 18Ia kevaka era sa bokoci na i valavala ca koya, sa qai sega ni yaga me cabori tale e dua na i soro me kauta laivi na i valavala ca. 19O koya oqo, kemuni na wekaqu ni sa tu vei keda na kaukauwa me da curu kina ki na Loqi Tabu Sara, oya e na vuku ni dra i Jisu; 20sa dolava kina vei keda ko koya e dua na sala vou, na sala bula, e lako sivia na i latilati, sa i koya na yagona vaka i koya; 21ka me vaka ni sa tiko e dua na noda bete levu sa lewa na vale ni Kalou, 22me da sa mai toro voleka yani e na yalodina kei na vakabauta sa tu dei ni sa vakasavasavataki na yaloda e na kena dukadukali, ka sa savai na yagoda e na wai savasava. 23Me da taura matua na vakanuinui eda sa vakatusa tiko ka ni sa yalodina ko koya ka a yalataka. 24Me da sa vakasamataka tale ga na sala me da dui veivakauqeti kina e na loloma kei na cakacaka vinaka. 25Me da sa kakua ni vakaweleweletaka na sosoqoni vata, me vaka sa dau nodra i vakarau e so, ia me da sa dui veivakayaloqaqataki ga, ka me vagumatuataki cake sara ni ko ni sa raica ni sa roro voleka tiko mai na Siga ni Turaga. 26Sa sega tale ni qai dua na i soro me na kauta tani na i valavala ca kevaka eda sa nakita me da ia tiko ga na i valavala ca ni sa tukuni oti vei keda na ka dina. 27Ia na ka wale ga sa na qai vo sa i koya me da rerevaka na ka e na qai yaco; oya na veilewai kei na bukawaqa me vakarusai ira era sa dau veivorati kei na Kalou. 28Sa dau vakamatei ka sega ni lomani na tamata ka beca na Lawa i Mosese kevaka sa vakadinadinataka e le rua se le tolu. 29Sa na qai wacava na ka e na yaco vua na tamata ka buturaka sobu na Luve ni Kalou, ka sega ni doka na dra ni veiyalayalati sa vakasavasavataki kina, ka beca tale ga na Yalo sa dau Loloma! 30Ni da sa kilai koya ka a kaya “Sa noqu i tavi me'u cudruvaki; au na sauma ko i au.” A kaya tale ga ko koya, “E na veilewaitaki ira na nona tamata na Turaga.” 31Sa dua na ka vakadomobula me da lutu ki na liga ni Kalou bula! 32Ia ni vakananuma mada na veika vinaka ko ni sota kaya e na veisiga sa sivi yani. Ni ko ni a sa vakararamataki oti, ko ni a qai sota kaya e vuqa na ka rarawa, ia ko ni a sega ga ni vakamalumalumutaki kina. 33E na so na gauna ko ni a vakalialiai ka vakararawataki e na matanavotu, ka so na gauna ko ni a vakarau tu mo ni la'ki wili vata kei ira era sota tiko kei na veika koya. 34Ko ni a lomani ira na vesu tu, ka ko ni a laiva e na marau me vakacacani tale ga na veika ko ni taukena, me vaka ni ko ni sa kila ni sa nomuni vaka i kemuni na i yau e uasivi cake ka sega ni rusa rawa. 35O koya gona mo ni yalo dina tiko ga vua na Turaga ni sa ka levu na kena i sau. 36Ni sa yaga me tiko vei kemuni na yalovosota, mo ni kitaka rawa kina na loma ni Kalou, ka taukena na ka sa yalataki. 37Me vaka sa kaya na i Vola Tabu: “E na sega soti ni dede e na qai lako mai ko koya sa lako tiko mai ka na sega ni wawa tale. 38Ia ko ira na noqu tamata yalododonu era na bula e na nodra vakabauta. Ia kevaka e dua e na suka tale ki muri, e na sega ni taleitaki koya na yaloqu.” 39Ia ko i keda e da sa sega ni vakataki ira era sa suka tale ka ra sa vakarusai, ia e da sa vakataki ira ga era sa vakabauta ka ra sa vakabulai.

will be added

X\