IPERIU 1

1Sa vuqa na gauna ka vuqa na sala e a vosa kina na Kalou e na gusudra na parofita vei ira na noda qase e na gauna e liu; 2ia e na gauna e muri oqo sa qai vosa mai kina vei keda ko koya e na Luvena; o koya sa lesia na Kalou me i taukei ni ka kece ga; o koya tale ga sa bulia kina na Kalou na vuravura kece ga. 3Sa i koya na i yaloyalo ni Kalou kei na rarama ni nona i serau. Sa tauri vuravura tu kei na veika kece sa tu e na maliwa lala ko koya e na nona vosa mana; a sa tiko sobu mai cake e na liga i matau i Koya sa Cecere Sara ni sa vuya laivi oti vakataki koya na noda i valavala ca. 4Sa cecere cake na Luvena mai vei ira na agilosi, me vaka sa cecere na yaca e solia vua na Kalou mai na yacadra. 5E a sega tale ga ni bau kaya na Kalou vua e dua na agilosi, “Ko iko na Luvequ, au sa yaco me'u Tamamu edaidai” A sega tale ga ni bau kaya me baleta e dua na agilosi ko koya, “Au na Tamana ko i au. Ka na Luvequ ko koya.” 6Ia ni sa vakarau tale mai ki vuravura na Kalou na nona Ulumatua e a kaya kina ko koya, “Me ra vakarokoroko vua ko ira kece na agilosi ni Kalou.” 7Ia e na vukudra na agilosi e a kaya kina ko koya, “Sa qisi ira na nona agilosi na Kalou me ra cagi kei ira na nona dauveiqaravi me ra yameyame ni buka” 8Ia e na vuku ni Luvena e a kaya kina ko koya, “Kemuni na Kalou e na sega ni mudu na nomuni i tikotiko vakaturaga, sa i titoko ni caka dodonu na i titoko ni nomuni matanitu. 9Ko ni sa vinakata ni valavala dodonu ka cata ni valavala ca. O koya sa lumuti kemuni kina na Kalou, na nomuni Kalou, e na waiwai ni reki sa uasivita na kena ka soli vei ira na nomuni i tokani” 10E a kaya tale ga ko koya, “O i kemuni, Turaga, ko ni a tauyavutaki vuravura e na i vakatekivu, ka sa cakacaka ni ligamuni ko lomalagi. 11Era na rusa na veika oqo ia ko i kemuni ko ni sa tu dei tiko ga. Era na madra kece mai me vaka na i sulu; 12ko ni na lobiki ira me vaka na kote balavu ka ra na vakaisosomitaki me vaka na i sulu. Ia ko i kemuni, sa i kemuni tikotiko ga, ka na sega ni mudu na nomuni veiyabaki” 13E a sega tale ga ni sa bau kaya oti na Kalou ki vua e dua na nona agilosi: “Mo tiko e na ligaqu i matau, me yacova ni'u sa qisi ira oti na nomu meca me ra i tutu ni yavamu” 14E ra sa qai cava li na agilosi? Sa i ira na yalo dauveiqaravi vua na Kalou, ka ra sa talai mai vua me ra vukei ira e ra na vakabulai e muri.

will be added

X\