KALATIA 6

1Oi kemuni na wekaqu, kevaka sa kunei ni cala e dua na tamata, mo ni vakadodonutaki koya e na yalo malumalumu ko i kemuni sa tu vinaka vakayalo. Ia mo ni vakaraici kemuni de ko ni mani veretaki tale ga. 2Ni veivuketaka na nomuni i colacola, ka mo ni vakayacora sara kina na i vunau i Karisito. 3Kevaka e dua e nanuma ni sa bau dua na ka ko koya, ia ka sega tu ni bau dua na ka ko koya sa vakalialiai koya tiko ga vaka i koya. 4Ia me dui lewai koya vakavinaka na tamata yadua; kevaka e vinaka na nona lewa, e na qai rekitaka ga na ka e cakava, ka sega e na ka e cakava na tamata tani. 5Ka ni na dui colata ga na noua i colacola na tamata yadua. 6Me dau vota na veika vinaka kece ga sa tu vua ko koya sa vakatavulici tiko e na veika va-Karisito vei koya sa veivakatavulici. 7Mo ni kakua ni vakaisini kemuni; e na sega ni vakalialiai na Kalou. Na ka ga e kaburaka na tamata e na tamusuka sara tale ga. 8Ni ko koya e vakayacora na veigagadre ca vakayago, e na tamusuka na rusa mai na i tovo vakayago, ia ko koya sa vakayacora na veitovo vinaka sa vuna na Yalo Tabu, e na tamusuka na bula tawa mudu mai na Yalo Tabu. 9Me da kakua kina ni oca e na caka vinaka ni da na tatamusuki e na kena gauna, kevaka eda sega ni datuvu koso. 10O koya gona me da caka vinaka kina vei ira na tamata kece ga e na gauna kece ga e rawa kina, ka vakauasivi vei ira era lewe ni matavuvale e na vakabauta va-Karisito 11Ni raica mada na mata ni vola lelevu au volavola tiko yani kina e na ligaqu dina. 12Ko ira era vinakata me vinaka wale ga na kena i rairai vakayago era na via vakasaurarataki kemuni mo ni cilivi, oya me ra kakua kina ni vakararawataki e na vuku ni kauveilatai nei Karisito. 13Ni ko ira sara mada ga ka sa cilivi era sega ni dau muria sara na Lawa, ia era qai gadreva ga mo ni cilivi me ra sakitaka ni ko ni sa nodra i lawalawa. 14Ia ko i au me kakua sara na ka tani me'u sakitaka, na kauveilatai ga ni noda Turaga ko Jisu Karisito, mai na kauveilatai oqo sa mate kina vei au na veika vakavuravura ka'u sa mate tale ga kina ko i au ki na vuravura. 15E sega ni ka bibi na cili se na tawa cili, na ka ga e bibi na sucu vou. 16Me yaco ne vakacegu kei na loloma vei ira kece era sa vakayacora tiko na i vakarau oqo, io vei ira kece tale ga na tamata ni Kalou. 17Me kakua tale e dua me qai vakararawataki au mai muri, ni ra sa vakamawe tu ga e yagoqu na i vakatakilakila ni'u sa bobula i Karisito. 18Oi kemuni na wekaqu, me tiko e na yalomuni na loloma ni noda Turaga ko Jisu Karisito. Emeni.

will be added

X\