KALATIA 5

1Sa vagalalataki keda na Karisito me da sa galala vakadua. Mo ni tu dei sara kina, ka kakua ni soli kemuni tale mo ni bobula. 2Ni rogoca, ko i au ko Paula, au sa kaya vei kemuni, ni kevaka ko ni sa na cilivi ga, sa na sega ni yaga na Karisito vei kemuni. 3Au via vakadeitaka tale mada vei ira na tamata yadua era cilivi ni ra sa vauci me ra muria sara na Lawa taucoko. 4Ko ni sa tawasei kemuni tani mai vei Karisito ko i kemuni ko ni via vakadonui e na Lawa, ko ni sa tu e na taudaku ni IoIoma ni Kalou. 5Ia ko i keimami, keimani sa nuitaka ni na vakadonui keimami na Kalou; sa i koya oqo na ka keimani waraka tiko, ka sa rawa e na kaukauwa ni Yalo Tabu sa cakacaka e na noda vakabauta. 6Ni da tu vata keiKarisito Jisu, sa sega ni kauwaitaki kina na cili se na tawa cili, na vakabauta ga sa vakavatukanataki e na loloma. 7Ko ni a toso vinaka sara e liu, ko cei ga sa tarovi kemuni mo ni kakua ni talairawarawa ki na i vakavuvuli dina? 8Sa sega ni vu mai ko ya vua na Kalou o koya e a kacivi kemuni. 9E dua na i wase ni vakatubu lailai sa na vakatubutaka na i buli taucoko. 10Au sa vakanuinui tu e na noda tu vata kei na Turaga ni ko ni na lomavata kei au, ia ko koya ga e vakacalai kemuni e na cudruvi koya na Kalou, veitalia ga se ko cei sara mada ga ko koya. 11Ia ko i au, kemuni na wekaqu, kevaka au sa vunautaka tiko ni dodonu ga na veicilivi, au na sega ni vakararawataki tale tiko. Kevaka au vunautaka na ka oqo, e na qai sega na leqa e na yaco e na noqu vunautaka na kauveilatai. 12Au gadreva ke ra muduki ira sara ga ko ira era gadreva mo ni cilivi ka kakua ni vakasagai kemuni tale tiko. 13Ko ni a sa kacivi, na wekaqu, mo ni galala, mo ni qai kakua ni vakayagataka na nomuni galala me lewai kemuni kina na nomuni gagadre vakayago, ia mo ni veivukei tiko ga e na loloma. 14Ni sa i soqoni ni Lawa taucoko e duabau ga na i vakaro, “Mo lomana na kai nomu me vakataki iko.” 15Ia kevaka ga ko ni veicati ka veivakacacani tiko ga vaka i kemuni, mo ni qarauna de ko ni veivakarusai ga vaka i kemuni. 16Ia, me'u kaya, ni laiva na Yalo Tabu me liutaka na nomuni bula; ko ni na sega kina ni vakayacora na gagadre ca ni tovo vakayago. 17Ni sa dau veivala na gagadre ni tovo vakayago kei na Yalo Tabu, ka sa dau veivala na Yalo Tabu kei na i tovo vakayago, ni rau sa veimecaki ko i rau oqo, ko ni na sega kina ni dau cakava rawa na ka ko ni vinakata dina. 18Ia kevaka sa tuberi kemuni tiko na Yalo Tabu, ko ni na sega ni vakarorogo ki na ruku ni lewa ni Lawa. 19Ia sa macala votu tu ga na cakacaka ni tovo vakayago: na dauveibutakoci, na i vakarau vakasisila, na i valavala velavela, 20na dausoro ki na matakau, na daucaka i sausau, na dauveicati, na dauveileti, na dauveiqati ca, na daucudrucudru, na dauqara nona ga, na veisei kei na toto vakailawalawa, 21na vuvu, na daumateni, na daumarau vakalialia, kei na veika vaka koya. Au via vakasalataki kemuni me vaka au a sa vakasalataki kemuni kina e liu, ni ra na sega ni curu ki na matanitu ni Kalou ko ira era dau cakava na veika oqori. 22Ia na vua ni Yalo Tabu na loloma, na reki, na vakacegu, na vosota vakadede, na cakacaka loloma, na yalovinaka, na yalodina 23na yalomalumalumu, na lewai koya rawa vaka i koya. E sega na lawa me vakacalai kina na veika oqo. 24Ko ira sa nei Karisito era sa vakota ki na kauveilatai na i tovo vakayago kei na kena veidodomo ca, kei na kena veigagadre ca kece ga. 25Ia kevaka sa bula e yaloda na Yalo Tabu, me liutaki keda tiko ga na Yalo Tabu. 26Me da kakua ni gadreva me da dokai wale ga, se veivakacudrui se veivuvutaki.

will be added

X\