KALATIA 4

1Ia me'u kuria, na gone e na taukena na i yau nei tamana e na tauvata ga kei na dua na bobula e na gauna e se gone lailai kina, dina ga ni nona na i yau kece ga i tamana. 2Ia e na tiko vakarorogo ga ko koya vei ira na dauveisusugi kei ira na qase me yacova na gauna sa lokuca tu ko tamana. 3E vaka kina ko i keda, ni da a sa gone eda a bobula tu ki na veivakavuvuli makawa ni vuravura me baleta na Kalou. 4Ia ni sa yaco mai na kena gauna, sa qai tala mai na luvena na Kalou. A sucu mai vua e dua na yalewa ka mai bula voli e na ruku ni lewa ni Lawa vaka Jiu 5me mai sereki ira kina era tiko e na ruku ni lewa ni Lawa, me da yaco rawa kina me da luve ni Kalou. 6Ni ko ni sa luvena, sa tala mai kina na Kalou na Yalo ni Luvena ki na lomada, o koya sa dau kaci, "Apa, Tamaqu.” 7Ia oqo ko ni sa sega tale kina ni bobula, ko ni sa luvena sara ga. E na solia na Kalou na ka kece ga e tu vua vei ira na luvena. 8E liu ni ko ni a sega ni kila na Kalou, ko ni a nodra bobula tu na veika era sega ni kalou. 9Ia edaidai ni ko ni sa qai kila na Kalou dina se me'u kaya, edaidai ni sa qai kilai kemuni na Kalou, ko ni sa qai lesu tale vakacava ki na kalou makawa era malumalumu ka tawa yaga? Na cava ko ni via bobula tale kina ki na veika oqo? 10Ko ni sa vakatatabutaka na siga e so, kei na vula e so, kei na gauna e so kei na yabaki e so. 11Au sa lomaleqataki kemuni, de na qai maumau wale na noqu cakacaka vei kemuni. 12Oi kemuni na wekaqu, au sa vakamasuti kemuni, mo ni vakataki au, ka ni'u sa vakataki kemuni tale ga ko i au. Ko ni a sega ni bau caka ca vei au; 13ko ni kila ni a vu mai na dua na noqu tauvimate na i matai ni noqu la'ki vunautaka yani na i tukutuku vinaka vei kemuni. 14Ia ko ni a sega sara ni beci au se vakasisilataki au kina, dina ga ni a vakatovolei kemuni na i tutu ni yagoqu oqori. Ia ko ni a ciqomi au ga me vaka au agilosi ni Kalou, me vaka sa i au ko Karisito Jisu. 15Sa evei na nomuni veirekitaki ko ya? Ko ni rui qaravi au vinaka. Kevaka au kerea na matamuni ke ko ni a leuta ka solia vei au. 16Ia na cava sa yacovi kemuni oqo? Au sa qai nomuni meca beka ni'u sa vosataka na ka dina vei kemuni? 17Era sa vakaraitaka na tamata oqori na nodra taleitaki kemuni vakalevu, ia e sega e na i naki vinaka; era via vagolei kemuni tani ga vei au ka mo ni vinakati ira vakalevu kina. 18E ka vinaka ke ra dau galeleti kemuni vagumatua tiko ga e na i naki vinaka, ka sega ga e na gauna au sa tiko vata kina kei kemuni. 19Kemuni na luvequ lalai, au sa vaka e dua na tina e vakasucu. E yacovi au na mataqali vutu vaka koya e na vukumuni me yacova ni sa buli oti na i tovo i Karisito e na nomuni bula. 20Au sa gadreva sara ga me'u tiko vata kei kemuni oqo, me bau veisau kina na noqu i tovo ni vosa vei kemuni. Ni'u sa rui lomaleqataki kemuni. 21Ni tukuna mada vei au, ko i kemuni ka via tiko ga e na ruku ni lewa ni Lawa, ko ni sa sega beka ni rogoca na ka e kaya na Lawa? 22Ni sa volai tu e na i Vola Tabu ni a rua na luve i Eparaama tagane, e dua mai vua e dua na yalewa bobula ka dua mai vua e dua na yalewa galala. 23E a sucu me vaka na kena i vakarau vakatamata ko koya na luve ni yalewa bobula, ia ko koya na luve ni yalewa galala e a sucu me vakayacori kina na vosa ni yalayala ni Kalou. 24Ia oqo na i balebale ni vakatauvata oqo sa rua na veiyalayalati ka sa i rau na yalewa e rua oqo. E dua mai na Ulunivanua ko Saineai ka vakasucumi ira na gone me ra bobula, oqori ko Eka. 25Ia ko Eka sa vakatautauvatataki kei na Ulunivanua ko Saineai mai Arapea. Sa i dusidusi ko koya kei Jerusalemi edaidai, ni sa tiko vakabobula kei ira kece na lewena. 26Ia sa galala ko Jerusalemi vakalomalagi mai cake, sa i koya na tinada. 27Ni sa volai tu e na i Vola Tabu, “Mo reki ko iko na yava ka sega ni vakaluveni! Mo kaila ka qolou e na marau ko iko ko sega ni taratara! Ni ra na lewe vuqa cake na luvena na yalewa sa biuti koya ko watina,mai vei koya ka tiko ga kei na watina .” 28Oi keda, kemuni na wekaqu, eda sa vakataki Aisake ni da sa gone ni yalayala. 29Ia me vaka a caka e na gauna ko ya, sa caka tale ga edaidai, sa vakacacani koya ka a sucu e na vuku ni Yalo Tabu ko koya ka a sucu me vaka na i vakarau ni sucu vakatamata. 30Ia na cava li a kaya na i Vola Tabu? “Vakasava tani na yalewa bobula kei na luvena, ni rau na sega ni taukei vata e muri ko koya na luve ni yalewa bobula, kei na luve ni yalewa galala” 31Sa vaka kina, oi kemuni na wekaqu, eda sa sega ni luve ni yalewa bobula, eda sa luve ga ni yalewa galala.

will be added

X\