KALATIA 3

1Kemuni na kai Kalatia sesewa! O cei sa vakasesei kemuni? E a sa vakamacalataki vakamatata sara e matamuni na vakoti nei Jisu Karisito ki na kauveilatai. 2Ia oqo wale ga na ka au via taroga vei kemuni. E a soli vei kemuni na Yalo Tabu ni ko ni a vakayacora na Lawa se ni ko ni a rogoca ka vakabauta na i tukutuku vinaka? 3Na cava ko ni sa rui yalowai kina? Ko ni a sa tekivu e na Yalo Tabu, a cava ko ni sa la'ki tini tale kina oqo e na nomuni kaukauwa ga vakayago? 4Sa sega beka na kena yaga na veika e vuqa ko ni a sa sota kaya oti? Sega ni rawa ni na sega na kena yaga! 5Sa solia li na Yalo Tabu vei kemuni na Kalou ka dau caka mana e na kemuni maliwa ni ko ni a vakayacora na Lawa se ni ko ni a rogoca na i tukutuku vinaka ka vakabauta? 6E vaka oqo na ka e kaya na i Vola Tabu me baleti Eparaama: “Sa vakabauta na Kalou ko Eparaama ka sa okata kina vua na Kalou me i valavala dodonu.” 7Mo ni qai kila gona kina ni sa i ira ga era vakabauta era kawa i Eparaama. 8Ni sa raica rawa mai liu sara na i Vola Tabu ni na vakadonui ira na veimatanitu tani na Kalou e na vakabauta, sa vunautaka taumada kina na i Tukutuku Vinaka vei Eparaama, ka kaya vua “E na vakalougatataki na veimatanitu kece ga e na vukumu” 9Sa vakabauta na Kalou ko Eparaama ko sa vakalougatataki kina; era na vakalougatataki vaka kina ko ira era sa vakabauta. 10Ni ko ira kece ka vakararavi tiko e na vakayacori ni Lawa era na cudruvi ni sa volai tu e na i Vola Tabu, “Era na cudruvi mai vua na Kalou ko ira yadua era sega ni dau muria na veika kece sara e volai tu e na i vola ni Lawa me ra cakava” 11Sa qai macala sara kina ni sa sega ni vakadonui e na vuku ni Lawa e dua na tamata e na mata ni Kalou; ni sa volai tu, “E na bula na tamata dodonu e na vuku ni vakabauta .” 12Ni sa sega ni vakayavutaki na Lawa mai na vakabauta, ia sa kaya na i Vola Tabu, “O koya ga sa dau vakayacora na veika kece e vakarota na Lawa e na bula voli kina” 13Ia sa sereki keda tale ko Karisito mai na cudruvi sa vakavuna na Lawa e na kena tau vua na cudru e dodonu me tau vei keda ni sa volai tu, “Sa tau na cudru ni Kalou vei koya yadua sa rube e na kau.” 14Sa cakava na Karisito na ka oqo me sobuti ira tale ga kina na veimatanitu tani na veivakalougatataki e a yalataki vei Eparaama e na vuku i Karisito Jisu me soli kina vei keda na Yalo a yalataka na Kalou e na vuku ni vakabauta. 15Oi kemuni na wekaqu, me'u tukuna e dua na kena i vakatautauvata. Sa sega tale ni dua e na bokoca se vakaikuritaka e dua na veiyalayalati ke rau sa vakadeitaka ka tabaka na yacadrau ko i rau na veiyalayalati. 16Era a tau na vosa ni yalayala vei Eparaama kei na dua na nona kawa. A sega ni kainaki e na i Vola Tabu, “Vei ira tale ga na nomu kawa” me vaka era lewe vuqa. Ia sa kainaki ga “kei na nomu kawa” ka kena i balebale ni dua ga na tamata ka sa i koya na Karisito. 17Sa i koya oqo na ka au kaya tiko. A cakava na Kalou e dua na veiyalayalati ka yalataka ni na vakayacora. Na Lawa e a qai soli e muri ni oti e va na drau tolusagavulu na yabaki, e sega ni bokoci kina na veiyalayalati se na vosa ni yalayala ni Kalou. 18Kevaka e vakatau na ka e solia mai na Kalou ki na Lawa ia sa qai sega ni vakatau ki na vosa ni yalayala. Ia a solia na i votavota vei Eparaama na Kalou e na vuku ni yalayala. 19Ia sa qai cava beka ni naki ni Lawa? Io, a soli mai me dau vakaraitaka na ka e cala me yacova ni sa qai lako mai ko koya na kawa i Aparaama ka a baleti koya na yalayala. E na gauna e soli kina na Lawa vei ira na Jiu, e a dewa mai vei ira na agilosi ki vua ga e dua na tamata o koya na kena mata a qai solia vei ira na tamata. 20Ia ni a solia mai na vosa ni yalayala na Kalou, vei Eparaama, e a solia taudua ga na Kalou ka sega ni bau dua na kena mata me vakaitavi kina. 21Erau sa veisaqasaqa beka kina na Lawa kei na vosa ni yalayala ni Kalou? E sega ni vaka kina. Kevaka e a sa soli e dua na Lawa e rawa kina na bula, ke sa rawa dina na veivakadonui e na vuku ni Lawa. 22Ia sa kaya na i Vola Tabu ni sa vakamalumalumutaki tu na vuravura taucoko ki na kaukauwa ni valavala ca, me na soli kina na ka sa yalataki e na vuku ni vakabauti Jisu ki vei ira era vakabauta. 23Ia ni a sa bera ni yaco mai na vakabauta, eda sa tiko kece e na ruku ni lewa ni Lawa, eda a bobula kece tu kina me yacova ni sa vakatakilai mai na vakabauta. 24Sa mai keda i vakatawa tiko kina na Lawa me yacova na lako mai nei Karisito, me da vakadonui kina e na vuku ni vakabauta. 25Ia oqo ni sa yaco mai na gauna ni vakabauta eda sa sega tale ni tiko voli e na ruku ni lewa ni Lawa. 26E na vuku ni vakabauta ko ni sa yaco kece kina mo ni luve ni Kalou e na nomuni tu vata kei Karisito. 27Ko ni sa papitaisotaki mo ni duavata kei Karisito ka ko ni sa vakaisulutaki kemuni e na bula i Karisito. 28Sa sega kina na kedra duidui na Jiu mai vei ira na kai Kirisi ka sega na kedra duidui na bobula mai vei ira na tamata galala, ka sa sega na kedra duidui na tagane mai vei ira na yalewa; ni ko ni sa duabau ga e na vuku i Karisito Jisu. 29Ia kevaka ko ni sa nei Karisito, ko ni na qai kawa i Eparaama, ka ko ni na vakaivotavota e na ka sa yalataka na Kalou.

will be added

X\