KALATIA 2

1Ni sa oti e tinikava na yabaki, keirau sa qai lako cake tale ki Panapasa kiJerusalemi, ka keirau kauti Taito tale ga. 2A vu ni noqu lako cake ga e dua na raivotu au raica. Au sa vakamacalataka kina vei ira na i liuliu e na dua na tikina vuni na i tukutuku vinaka au sa vunautaka tiko vei ira na veimatanitu tani, de na qai maumau wale na noqu cakacaka e na gauna sa oti, se e na gauna oqo. 3Ko Taito mada ga o koya keirau lako vata voli, e dina ga ni kai Kirisi, ia a sega ga ni vakasaurarataki me cilivi, 4me vaka era a saga e so me caka vua. Ko ira oqo era curu mai vaka na yamata me ra mai raica na galala sa soli vei keda e na noda sa tu vata kei Karisito Jisu, ni ra via vakabobulataki keda tiko ga. 5Ia keitou a sega ni bau vakamalumalumu kina e na dua na tiki ni gauna, me tu dei tiko ga kina na dina ni tukutuku vinaka vei kemuni. 6Ia ko iratou na i liuliu lelevu e na lotu, eratou sega ni raica ni dua na ka e cala e na noqu i vakavuvuli, ka sega ni vakuria tale kina e na dua na ka. Na nodratou i liuliu lelevu au sega ni kila, ka ni da sa tauvata kece ga na tamata e na mata ni Kalou. 7Ia eratou sa raica ga ni sa lesi au na Kalou me'u vunautaka na i tukutuku vinaka vei ira na sega ni cili, me vaka sa lesi Pita vei ira na cili. 8Ni Kalou ga ka a cakacaka e na loma i Pita me i apositolo vei ira na cili, e a cakacaka tale ga e lomaqu me'u i apositolo vei ira na veimatanitu tani. 9Io ni ratou sa kila ko Jemesa, Pita kei Joni, ko iratou eratou sa kilai voli me ratou i liuliu ni sa solia vei au na Kalou na i tavi oqo, eratou sa mai lululu kina vei keirau kei Panapasa. Keitou sa mani vakadonuya vata me keirau lako vei ira na kai matanitu tani, ka me ratou lako vei ira na Jiu. 10Na ka ga eratou kerea sa i koya me keirau qai dau nanumi ira na dravudravua, ka sa i koya sara tale ga koya na ka au gadreva me'u cakava. 11Ia ni sa lako mai ki Anitioki ko Pita, au a saqati koya sara ga e matadra na lewe vuqa, ka ni sa cala dina ga ko koya. 12Ni sa bera ni ratou yaco mai e so mai vei Jemesa, a sa dau kana vata ko koya kei ira na kai veimatanitu tani. Ia ni ratou sa yaco mai, sa vakatikitiki ka tawasei koya tani mai, ni sa rerevaki ira era kaya ni dodonu me ra cilivi na tamata me ra qai okati me ra lotu vakarisito. 13Era a muri koya na vo ni Jiu vakabauta e na veivakaisini ko ya, ka sa rawai tale ga ko Panapasa e na nodra i valavala. 14Ia ni'u sa raica ni ra sa sega ni lako vakadodonu me vaka na dina ni tukutuku vinaka, au a qai kaya vei Pita e na matadra kece ga, “Ko iko e dua na Jiu, ia kevaka ko sa bula voli me vaka e dua na kai matanitu tani ka sega ni vakataki ira na Jiu, a cava ga ko vakasaurarataki ira kina na kai veimatanitu tani me ra bula me vakataki ira na Jiu?” 15Ia oi keimami ka sucu ga mai me Jiu, ka sega ni kai matanitu tani i valavala ca, 16keimami sa kila ni sa sega ni vakadonui na tamata e na vuku ni veivalavala e vakaroti e na Lawa i Mosese e na vuku ga ni vakabauti Jisu Karisito. Keimami tale ga keimami sa vakabauti Jisu Karisito, me keimami vakadonui kina mai vua na Kalou e na vuku ni vakabauti Karisito, ka sega ga e na vuku ni veivalavala e vakaroti e na Lawa, ka ni na sega ni vakadonui e dua na tamata e na nona muria na veivalavala e vakaroti e na Lawa. 17Ia kevaka, e da vakasaqara me da vakadonui e na vuku i Karisito, eda qai mani kunei tale ga ni da tamata i valavala ca, sa baleta li ko ya ni sa dauveivakayarayarataki ki na i valavala ca na Karisito? E sega sara ni vaka kina. 18Kevaka au sa baci tara cake tale na i vakavuvuli ga au a sa talaraka oti, au sa qai vakadinadinataka ga kina ni'u sa tamata talaidredre ki na Lawa. 19Sa i koya na Lawa au sa mate kina, ka sa mudu na noqu vauci e na Lawa, me'u sa bula kina vua na Kalou. Au sa vakoti vata kei Karisito ki na kauveilatai, 20ka sa sega ni ko i au ka'u sa bula tiko oqo, ko Karisito ga sa bula tiko vei au. Ia na bula au sa bula tu kina oqo sa bula ni vakabauta, na vakabauti koya na Luve ni Kalou, o koya ka a lomani au ka solia na nona bula e na vukuqu. 21Au sa sega kina ni vakawaletaka na loloma ni Kalou; kevaka eda vakadonui mai vua na Kalou e na vuku ni Lawa sa qai sega ni yaga na mate i Karisito.

will be added

X\