KALATIA 1

1Oqo na i vola i Paula na i apositolo; na i lesilesi oqo e a sega ni vu mai vei ira na tamata, se me a dewa mai vakatamata, ia sa i lesilesi sara ga mai vei Jisu Karisito kei na Kalou ko Tamada, o koya ka a vakaturi Jisu caketale mai na mate. 2Era sa duavata kei au na i vavakoso eke e na vakanuinui vinaka vei kemuni na veisoqosoqo lewenilotu mai Kalatia. 3Me nomuni na loloma kei na vakacegu mai vua na Kalou ko Tamada, kei na noda Turaga ko Jisu Karisito. 4Ko Jisu Karisito a soli koya e na vuku ni noda i valavala ca, me vakabulai keda kina mai na i taba gauna ca oqo, me vaka na loma ni Kalou ko Tamada. 5Me ia tiko ga vua na Kalou na veivakalagilagi ka sega ni mudu. Emeni. 6Au sa kurabui sara ni sega so ni dede ko ni sa biuti koya tale e a kacivi kemuni e na loloma i Karisito, ka vuki ki na dua tani na i tukutuku vinaka. 7E sega ni baleta ni sa dua tale tiko na i tukutuku vinaka, e so ga na tamata era vakacacani kemuni tiko ka vakatanitaka na i tukutuku vinaka kei Karisito. 8Ia se ko i keitou, se dua na agilosi mai lomalagi, e vunautaka vei kemuni e dua na i tukutuku vinaka ka duatani mai na kena keitou a vunautaka vei kemuni, me yaco vua na cudru ni Kalou. 9Me vaka keitou sa kaya oti e liu, me'u kaya tale, kevaka e dua e vunautaka vei kemuni e dua na i tukutuku vinaka ka duatani mai na kena ko ni a sa vakabauta taumada, me yaco vua na cudru ni Kalou. 10Au saga tiko li oqo me'u vakayalovinakataki ira na tamata, se me'u vakayalovinakataka na Kalou? Se'u saga tiko li me ra vinakati au na tamata? Kevaka e ka ga me ra vinakati au kina na tamata, au sa qai sega ni talai i Karisito. 11Me'u vakaraitaka vei kemuni na veiwekani, ni sa sega ni ka vakatamatana i tukutuku vinaka ka'u a vunautaka. 12Ni'u sa sega ni kauta mai vua e dua na tamata, se me'u a vakavulici kina, ia sa i Karisito ga a sa vakaraitaka vei au. 13Ko ni sa rogoca na noqu i valavala e liu e na Lotu vaka-Jiu, na noqu a vakacacana vakalevu sara na i soqosoqo lewenilotu ni Kalou, ka saga me'u vaqeyavutaka 14Au a uasivi cake sara e na Lotu vaka-Jiu mai vei ira e lewe vuqa na kai noqu keimami i taba vata, ka yalodina sara ki na nodra i vakavuvuli na noqu qase. 15Ia e na loloma levu ni Kalou sa lesi au tu ko koya ni'u a se bera ni sucu me'u qaravi koya. 16Ia ni vinakata ko koya me vakatakila na Luvena vei au, me'u vunautaki koya ki vei ira na kai matanitu tani, au sega ni la'ki taro i vakasala vua e dua na tamata, 17se'u lako cake ki Jerusalemi vei iratou ka i apositolo taumada vei au. Ia au a lako sara ki Arapea, ka'u qai lesu tale ki Tamasiko. 18Ni sa oti e tolu na yabaki, au a qai lako cake ki Jerusalemi me'u sikovi Pita, ka'u a tiko vata kaya voli e na rua na macawa. 19Au a sega ni raica e dua tale vei iratou na i apositolo, ko Jemesa ga na tacina na Turaga. 20Au yalataka e na mata ni Kalou ni sa ka dina na veika au sa vola yani oqo vei kemuni. 21Ni oti ko ya au a qai lako ki na veiyasana mai Siria kei Silisia. 22E na gauna kece oqo era sa sega tiko ga ni bau raici au ko ira na lewe ni veisoqosoqo lewenilotu vakarisito mai Jutia. 23Ia era sa rogoca tu ga ni kainaki, “O koya ka a vakacacani keda e liu, sa vunautaka voli edaidai na vakabauta ka a tovolea taumada me vaqeyavutaka.” 24A ra sa vakalagilagia kina na Kalou e na vukuqu.

will be added

X\