EFESO 6

1Kemuni na gone, mo ni talairawarawa vei ira na nomuni i tubutubu e na ka sa vinaka vua na Turaga, ni sa ka dodonu oqo mo ni cakava. 2“Vakarokorokotaki rau ua tamamu kei na tinamu.” Sa i koya oqo na i matai ni vunau sa dua kina na vosa ni yalayala: 3“mo vinaka kina, ka bula balavu kina e na dela i vuravura.ʼ 4Kemuni na i tubutubu, ni kakua ni dau vakacudrui ira na luvemuni ia mo ni dau vakavulici ira ga e na i vakarau kei na i vakavuvuli ni Turaga. 5Oi kemuni na bobula, ni talairawarawa vei ira na nomuni turaga vakayago e na rere kei na sautaninini, ni talairawarawa e na lomadina me vaka ko ni sa vakayacora tiko vei Karisito. 6Ni kakua ni makutu ga ni ra rai tu, me ra vinakati kemuni kina. Ia me vaka ko ni sa tamata nei Karisito, ni cakava na loma ni Kalou e na yalomuni taucoko. 7Ni qarava na nomuni i tavi e na loma vinaka me vaka ko ni cakava vua na Turaga, ka sega ni vei ira wale ga na tamata; 8ni ko ni sa kila tiko ni ka vinaka kece e cakava na tamata yadua, se bobula se tamata galala, e na saumi vaka kina mai vua na Turaga. 9Kemuni tale ga na nodra turaga na bobula, ni cakava vaka kina vei ira na nomuni bobula, ka kakua ni dau vakarerei ira. Ni ko ni sa kila sa tiko mai lomalagi na nomuni Turaga, o koya sa nodra Turaga tale ga, ka sa sega ni dauveivakaduiduitaki ko koya. 10Me'u tinia, mo ni vakaukauwataki kemuni e na nomuni tu vata kei na Turaga kei na nona kaukauwa levu. 11Ni vakaiyaragi e na i yaragi kece ga ni Kalou mo ni tu dei ka vorata rawa kina na i lawaki ni tevoro. 12Ni da sega ni veivala wale ga kei ira na tamata, ia e da sa veivala tale ga kei ira na veikaukauwa vakayalo ni maliwa lala, kei ira na i liuliu i valavala ca, kei ira sa kaukauwa, kei na veikaukauwa vakavuravura ni gauna butobuto oqo. 13Sa i koya gona mo ni vakaiyaragi sara kina e na i yaragi kece ga ni Kalou, mo ni veivorati rawa kina e na siga ca; ia ni sa oti kece ko ya mo ni tudei tiko ga. 14O koya gona mo ni qai tudei ni sa vauci tu na tolomuni e na dina; sa vakaisasabai tu na lomaseremuni e na i valavala dodonu, 15ka sa vakaivava tu na yavamuni mo ni vunautaka na i tukutuku vinaka ni veivinakati. 16Ia e na veigauna kece mo ni taura na vakabauta me i sasabai, mo ni sabaya kece kina na gasau vidi kece ga ni tevoro. 17Ni taura ni nomuni vakabulai me i tataqomaki ni ulumuni, ka taura tale ga na i seleiwau ni Yalo Tabu, koya na vosa ni Kalou. 18Ni cakava na ka kece oqo e na masu ka kerea tiko ga na veivuke ni Kalou, ka masu e na kaukauwa ni Yalo Tabu. Me ia tiko e na bogi kei na siga na nomuni masulaki ira kece na tamata ni Kalou. 19Ni masulaki au tale ga me dau soli vei au na vosa ni'u dau vakarau me'u vosa, me'u vunautaka kina vakadodonu na ka vuni ni tukutuku vinaka. 20Sa i koya au sa talai me'u vunautaka, dina ga ni'u sa vesu tu; me'u vunautaka vakadoudou me vaka na kena dodonu. 21Ko ni na via kila tale ga na ka e baleti au kei na ka au cakava tiko; ia e na tukuna na ka kece ga vei kemuni ko Tikiko na wekaqu lomani ka i talai yalodina ni Turaga. 22Au sa talai koya yani vei kemuni e na ka oqo mo ni kila kina na ka e baleti keitou, ka me vakayaloqaqataki kemuni ko koya. 23Me tiko ga vei kemuni na veiwekani na vakacegu, na loloma kei na vakabauta mai vua na Kalou ko Tamada kei na Turaga ko Jisu Karisito. 24Me tiko ga na loloma vei kemuni kece ko ni lomana na Turaga ko Jisu Karisito e na loloma e sega ni mate rawa.

will be added

X\