EFESO 5

1Ia me vaka ni ko ni sa gone ni toko ni Kalou mo ni tovolea mo ni vakadamurimuria na Kalou. 2Mo ni vakaitovotaki kemuni tiko ga e na loloma; me vaka na nona lomani keda na Karisito ka solia na nona bula e na vukuda, me i solisoli vinaka ka i soro vua na Kalou. 3Me vaka ko ni sa tamata lotu, sa sega ni kilikili me cavuti e na kemuni maliwa na veibutakoci, na veika kece ga sa velavela, kei na daukocokoco. 4Me kakua tale ga na vosa vakasisila, se na veiwali lialia se na vosa ca, ni sa tawa kilikili na veika oqori. Ia mo ni ia ga na vakavinavinaka vua na Kalou. 5Mo ni kila deivaki sara oqo: ni sa sega sara ni dua na nona i votavota e na matanitu nei Karisito kei na Kalou, e dua na tamata e dauveibutakoci se tamata i tovo dukadukali, se dua e daukocokoco ni sa tauvata kei na dauqaravi kalou lasu na kocokoco. 6Me kakua ni dua me vakacalai kemuni e na veivosa tawa yaga. Ni sa i ira oqo na veika e na yaco kina na cudru ni Kalou vei ira na dautalaidredre vua. 7Sa i koya oqo mo ni kua kina ni malele vei ira. 8Ni ko ni a dau tu e liu e na butobuto, ia ni ko ni sa yaco mo ni sa nona tamata na Turaga, ko ni sa tu e na rarama. Ia mo ni bula voli me vaka na luve ni rarama. 9Ni sa vua ni rarama na i valavala kece ga e vinaka, dodonu ka dina. 10Mo ni tovolea sara mo ni kila na ka e vinakata na Turaga. 11Ni kakua ni malele vei ira na tamata era dau cakava na i valavala ni butobuto ka sega ni yaga, ia mo ni vakaraitaka mai na veika oqori ki na rarama me lauraivotu. 12Ni sa ka vakamadua na veivosakitaka na veika era dau vakayacora vuni. 13Ia ni sa kau mai e dua na ka ki na rarama, sa yaco me laurai, ni sa rarama na ka kece ga sa vakavotui. 14Sa i koya sa kainaki kina, “Ko iko na daumoce mo yadra mai tucake mai na mate, ka na vakararamataki iko na Karisito .” 15Sa i koya gona mo ni qarauna matua sara kina na nomuni i valavala me kakua ni vakataki ira na lialia, ia me vakataki ira ga na vuku. 16Vakayagataka vinaka na gauna ka ni sa gauna ca na veisiga oqo. 17Ni kakua ni yalowai, ia ni vaqara na ka e vinakata na Turaga mo ni cakava. 18O koya gona mo ni kakua kina ni daumateni ni sa daucaka kina na ka vakasisila, ia mo ni vakasinaiti ga e na Yalo Tabu. 19Mo ni veivosaki vaka i kemuni e na same kei na sere kei na meke vakayalo me memela yani vua na Turaga mai na lomamuni taucoko. 20Ka mo ni dauvakavinavinaka tiko ga vua na Kalou na Tamada e na vuku ni ka kece ga e na yaca ni noda Turaga ko Jisu Karisito. 21Ni dui vakamalumalumutaki kemuni vaka i kemuni e na nomuni dokai Karisito. 22Kemuni na yalewa vakawati, ni dui vakamalumalumutaki kemuni vei ira na dui watimuni me vaka ko ni sa kitaka tiko vua na Turaga. 23Ni sa ulu ni yalewa vakawati na watina me vaka sa ulu ni soqosoqo lewe ni lotu na Karisito, ka sa i koya sara ga na kena i vakabula. 24Me vaka sa vakarorogo na i soqosoqo lewenilotu vei Karisito, me ra vakarorogo vaka tale ga kina na yalewa vakawati vei ira na watidra e na ka kece ga. 25Kemuni na tagane vakawati, ni lomani ira na dui watimuni me vaka sa lomana na i soqosoqo lewenilotu na Karisito ka solia na nona bula e na vukuna. 26A sa cakava oqo me vakatabuya na lotu vua na Kalou e na nona vosa ni sa vuya oti e na wai, 27me na qai cabora kina na i soqosoqo lewenilotu ko koya ki vei koya ga e na kena i serau kece sa savasava, sa sega ni tauvi duka, sa sasalukiluki, se dua na ka me vakamelei kina. 28Sa kilikili me ra lomani ira vaka kina na watidra ko ira na tagane vakawati me vaka na yagodra dina. 29Ni sa sega ni dua e dau cata na yagona dina ia sa dau vakania ga ka maroroya me vaka ga sa dau cakava na Karisito ki na i soqosoqo lewenilotu; 30ni da sa veitiki ni yagona. 31Me vaka e kaya na i Vola Tabu, “Na ka oqo e na biuta kina na tamana kei na tinana na tagane me rau duavata kei na watina, ka rau na yaco me dua bauga.” 32Sa i koya oqo e dua na ka vuni titobu sara, ka'u sa kila sa baleti Karisito kei na i soqosoqo lewenilotu. 33Ia mo ni dui lomani ira vaka tale ga kina na dui watimuni me vaka na nomuni dui lomani kemuni; ia na yalewa vakawati me vakarokorokotaka na watina.

will be added

X\