EFESO 4

1Sa i koya gona au sa kerei kemuni kina, ko i au e dua na kaivesu e na vuku ni Turaga mo ni vakaitovotaki kemuni e na i valavala sa kilikili kei na i tutu ko ni sa kacivi kina. 2Mo ni dau yalomalumalumu sara ka yalomalua; dauvosota vakadede ka veivosoti e na loloma. 3Ni gumatua sara mo ni maroroya na duavata sa vakavuna na Yalo Tabu ni ko ni sa vauci vata e na veivinakati. 4Sa dua bauga na yago ka dua bauga na Yalo Tabu me vaka sa dua bauga na i nuinui sa kacivi kemuni kina na Kalou. 5Sa dua bauga na Turaga, ka dua bauga na vakabauta, ka dua bauga na papitaiso; 6ka sa dua bau tale ga na Kalou na Tamada kece ga. Sa i koya na noda Turaga kece ga na tamata; sa curuma na ka kece ga ka tiko e na lomada kece ga. 7Ia sa soli vei keda yadua e yadua na i solisoli me vaka na dui kena i vakarau sa solia ko Karisito. 8Sa i koya oqo sa kainaki kina e na i Vola Tabu, “Ni sa lako cake ko koya ki cake sara sa kauti ira yani e lewe vuqa ra bobula; ka sa solia na veisolisoli vei ira na tamata.” 9A cava beka na i balebale, ni kena kainaki vakaoqo, “Sa lako cake ko koya” ? Sa kena i balebale ni sa i koya e a lako sobu taumada mai e liu ki na boto i vuravura sara e ra. 10Ia, ko koya ga ka lako sobu mai sa i koya ga sa lako cake tale me sivita na lomalagi cecere sara me tawana taucoko kina ko koya na vuravura kei na lomalagi. 11Sa i koya sa “solia na veisolisoli vei ira na tamata” ka sa lesi ira e so me ra i apositolo, e so me ra parofita, e so me ra dauveivakalotutaki, e so me ra i vakatawa, ka so me ra i vakavuvuli. 12Era sa lesi me ra vakarautaki ira na tamata lotu me ra cakava na cakacaka vakarisito, me tara cake kina na yago i Karisito. 13Me da na yacova kece sara kina na duavata e na noda vakabauta kei na noda kila na Luve ni Kalou; me da yaco me da tamata yalomatua ka ucuya na i vakarau taucoko i Karisito. 14Eda sa na sega tale tiko ni vaka kina na gone e veikauyaki e na ua kei na cagi kece ga ni veivakavuvuli, e na i vadi qaseqase era bulia na tamata me ka ni veivakacalai. 15Ia me da vosataka ga na ka dina e na yalololoma, eda na qai tubu cake kina e na ka kece ga vei Karisito, o koya na uluda. 16Sa sema vata vua na yago kecega ka vauca vata na yago e na kena veisema. Ia ni ra sa cakava vinaka na veitiki ni yago na dui nodra i tavi, sa tubucake na yago taucoko, ka tara cake e na loloma. 17Sa i koya gona au sa kaya kina e na yaca ni Turaga ka vakarota matua sara, mo ni kakua ni qai bula tale tiko me vakataki ira na tawa lotu e na nodra vakanananu tawa yaga. 18Ni sa vakabutobutotaki na nodra vakasama ka sa sega ni veiriti kei na bula ni Kalou e na vuku ni nodra lecaika kei na yalokaukauwa. 19Sa yali na nodra kila na madua, ka ra sa soli ira ki na i valavala vakasisila ka sega ni tarovi ira rawa, ni cakava na veika kece ga e tawa savasava. 20Ia sa sega ni o koya oqori na ka ko ni a vulica me baleti Karisito. 21Ko ni sa rogoca dina na ka baleti koya; ia me vaka ko ni sa tamata lotu vakarisito, ka ni a vakatavulici e na ka dina sa tu vei Jisu. 22Mo ni biuta tani na nomuni i tovo ni bula e liu, na nomuni i tovo ni bula makawa vata kei na kena gagadre e dau veitemaki ka dauveivakarusai. 23Me vakavoui sara na lomamuni kei na nomuni vakasama. 24Mo ni vakaisulu e na nomuni i tovo vou, sa caka me veiucui kei na Kalou e na yalododonu kei na yalosavasava. 25Sa i koya gona me biu tani sara kina na lesu ka me dau vosa dina na tamata yadua vua na wekana, ni da sa veitiki ni dua bau ga na yago. Sa i koya na yago i Karisito. 26Kevaka ko ni sa cudru, ia me kakua ni vakavu i valavala ca vei kemuni. Ni kakua ni cudru tiko me yacova ni la'ki dromu na siga. 27Ni kua tale ga ni vakarawarawataki kemuni vua na tevoro. 28Me kakua ni butako tiko ko la na daubutako; ia me cakacaka ga ka yalodina e na ka e vakaitavi kina na ligana, me bau soli ka kina vei ira na dravudravua. 29Me kakua ni lako mai na gusumuni na vosa ca, ia na vosa vinaka ga me ka ni veivakatataki cake, e na veiganiti vinaka me veivakalougatataki vei ira era rogoca. 30Ka mo ni kakua ni vakararawataka na Yalo Tabu ni Kalou, o koya ko ni sa vakatakilakilataki tu kina ni ko ni sa nona na Kalou me baleta na siga ni veivakabulai. 31Ni biuta tani kece sara na yalokatakata, na cudru, na yalo ca, na vosa vakacaca, kei na yaloveicati kece ga. 32Ia mo ni veilomani ga, veinanumi ka veivosoti vaka i kemuni me vaka sa vosoti kemuni na Kalou e na vuku i Karisito.

will be added

X\