EFESO 3

1E na vuku ni ka oqo au sa masu kina vua na Kalou ko i au ko Paula na bobula i Karisito me baleti kemuni na kai veimatanitu tani. 2Ko ni sa rogoca beka na nona sa solia vei au na Kalou na i solisoli me'u vakaitavi e na vukumuni. 3Sa vakatakila mai na nona i naki vuni ka vakaraitaka vei au, me vaka au a vola mada yani vakalekaleka e liu. 4Ni ko ni wilika ko ni sa kila rawa kina na ka au sa kila e na ka vuni me baleti Karisito. 5Na ka e a sega mada ni bau vakaraitaka vei ira na tamata e na veitabatamata e liu ia sa qai vakatakila mai oqo e na Yalo Tabu vei ira na nona i apositolo tabu kei ira na nona parofita. 6Sa vaka oqo na ka vuni ko ya: e na i tukutuku vinaka era sa vakaivotavota vata kina na kai veimatanitu tani kei ira na Jiu e na veivakalougatataki ni Kalou ni ra sa veitiki ni dua ga na yago, ka ra sa taukena vata na ka sa yalataki e na vuku i Karisito. 7Au sa lesi me'u i talatala ni tukutuku vinaka me vaka na i solisoli loloma ni Kalou, ka sa soli vei au e na cakacaka yaco ni nona kaukauwa. 8E dina ga ni'u tu duadua sara e muri vei keimami kece na nona tamata na Kalou, ia sa soli vei au na i solisoli oqo me'u vunautaka vei kemuni na kai veimatanitu tani, ni sa sega ni yalani na veivakalougatataki eda rawata mai vei Karisito. 9Me'u vakaraitaka tale ga vei ira na tamata kece ga na kena vakayacori na i naki ka vunia tu mai na i vakatekivu na Kalou o koya sa bulia na ka kece ga. 10Me ra kila kina e na gauna edaidai mai na i soqosoqo lewenilotu ko ira na i liuliu kei ira era sa kaukauwa e na veiyasana vakalomalagi na vuku ni Kalou e na kena veivatukana kece e vuqa. 11Sa sala vata oqori kei na i naki tawa mudu sa mai vakayacori e na vuku i Karisito Jisu na noda Turaga. 12E na noda tu vata kaya kei na noda vakabauti koya eda sa doudou kina ka yalodei ni toro vua na noda Kalou. 13Sa i koya gona au sa kerei kemuni kina mo ni kakua ni yalolailai e na noqu sota kaya tiko na ka rarawa e na vukumuni; ni sa i koya oqori na ka ko ni vinaka kina. 14E na vuku ni ka oqo au sa tekiduru kina vua na Tamada, 15o koya era sa vakayacani mai kina na veivuvale kece ga mai lomalagi kei vuravura. 16Me solia vei kemuni ko koya me vaka na levu ni nona vinaka, me vakaukauwataki kemuni e na Yalona mo ni kaukauwa vakayalo, 17ka me tiko e na lomamuni na Karisito e na vakabauta, me tubu kina na wakamuni ka tauyavutaki e na loloma. 18Mo ni rawata kina mo ni kila vata kei ira kece ga na tamata ni Kalou na raraba, na balavu, na cecere kei na titobu ni loloma i Karisito. 19Mo ni kila tale ga kina na loloma i Karisito, ni sa uasivia na ka kece ga e kilai rawa mo ni vakasinaiti kina e na i tovo ni Kalou. 20Vei koya sa uasivi vakalevu cake sara na ka e rawa me cakava mai na ka eda kerea sa nanuma rawa, e na vuku ni kaukauwa sa cakacaka tiko e lomada: 21me ia vua na vakarokoroko e na i soqosoqo lewenilotu e na vuku i Karisito Jisu e na veitabatamata kece ga ka sega ni mudu. Emeni.

will be added

X\