EFESO 1

1Oqo na i vola i Paula e dua na i apositolo i Karisito Jisu me vaka na lewa ni Kalou.Ki vei ira na tamata lotu mai Efeso, e ra sa yalodina tiko vei Karisito Jisu. 2Me nomuni na loloma kei na vakacegu mai vua na Kalou ko Tamada kei na Turaga ko Jisu Karisito. 3Me vakavinavinakataki na Kalou na Tama ni noda Turaga ko Jisu Karisito, o koya ka sa vakalougatataki keda e na ka ni veivakalougatataki vakayalo kece ga, mai na veiyasana vakalomalagi e na vuku i Karisito. 4Ni sa bera ni tauyavutaki ko vuravura, sa digitaki keda tu na Kalou me da nona e na vuku i Karisito, me da savasava ka sega ni cala e matana. 5A sa lesi keda ko koya e na nona loloma me da vakabau me da luvena e na vuku i Jisu, me vaka na i naki ni lomana. 6Me da vakacaucautaka kina na Kalou e na uasivi ni nona loloma, sa solia wale vei keda e na vukuna na Luvena lomani. 7Ni da sa sereki e na vuku ni nona mate ka sa bokoci na noda i valavala ca me vaka na levu ni nona loloma, 8sa sovaraka vakayauyau mai vei keda. 9Ni sa vakatakila mai vei keda na Kalou na nona i naki vuni, na nona i naki vinaka sa vakarautaka me cakava na Karisito. 10Na i naki ni Kalou, sa i koya e na vakataucokotaka e na gauna sa lokuca, me vakaduavatataka na veika kece ga mai lomalagi kei na veika e vuravura vei Karisito. 11Ni sa caka na ka kece ga me vaka na i naki kei na lewa ni Kalou; ka sa digitaki kemuni na Kalou mo ni nona tamata e na vuku i Karisito me vaka na nona i naki sa nakita mai na i vakatekivu. 12O koya gona vei keda eda sa vakanuinui taumada vei Karisito meda vakacaucautaka na lagilagi ni Kalou. 13Vei kemuni tale ga sa rogoca oti na i tukutuku dina; na i Tukutuku Vinaka ni nomuni vakabulai, ka vakabauti Karisito, ko ni sa vakatakilakilataki kina e na Yalo Tabu sa yalataki. 14Ni sa i koya na Yalo Tabu sa na i vakadei taumada ni votavota eda sa na taukena e muri me yacova ni da sa taukena kece sara, me vakacaucautaki kina na lagilagi ni Kalou. 15E na vuku ni ka oqo, e na gauna ga au rogoca kina na nomuni vakabauta na Turaga ko Jisu kei na nomuni loloma vei ira na tamata lotu, 16au sa sega ni mudu ni vakavinavinaka tiko vua na Kalou e na vukumuni. Au sa dau nanumi kemuni tikoga e na noqu masu 17vua na Kalou ni noda Turaga ko Jisu Karisito, na Tamada lagilagi me solia vei kemuni na Yalo ni Kalou, mo ni kilai koya kina. 18Me vakararamataki tale ga na yalomuni, mo ni kila kina na ka sa nuitaki ka sa kacivi kemuni kina ko koya, na nona veivakalougatataki lagilagi me baleti ira na nona tamata. 19Kei na kena levu ni nona kaukauwa sa cakacaka tiko vei keda eda vakabauta, me vaka na cakacaka ni nona kaukauwa 20sa vakayagataka e na nona vakaturi Karisito cake tale mai na mate, ka vakatikori koya e na ligana i matau e na veiyasana vakalomalagi. 21Sa cecere cake kina ko Karisito vei ira kece ga sa liu, kei ira sa nodra na lewa, kei ira era sa kaukauwa ka qaqa, ka sa cecere cake mai na veiyaca sa dau cavuti e na gauna oqo kei na veigauna e muri. 22A sa vakamalumalumutaka na veika kece ga na Kalou me ra tu e na ruku ni yava i Karisito, ka lesi koya me lewa na veika kece ga ka ulu ni soqosoqo lewe ni lotu, 23sa i koya na yagona, na i vakataucoko kei koya sa vakataucokotaka na ka kece ga e na veiyasana kece ga.

will be added

X\