KOLOSA 4

1O i kemuni na turaga me dodonu ka rauta vinaka na nomuni i vakarau vei ira na nomuni tamata, ka nanuma tiko ni sa dua tiko na nomuni Turaga mai lomalagi. 2Mo ni dau masu tiko ga, ka qaqarauni tiko e na vakavinavinaka vua na Kalou. 3Dau masulaki keitou tale ga, me dolava na Kalou na sala me keitou vunau ka tukuna kina na ka vuni nei Karisito o koya au sa vesu tu kina oqo. 4Me'u tukuna sara kina vakamatata, me vaka na kena vosa dodonu dina. 5Mo ni valavala vakavuku vei ira e taudaku, ka mo ni vakayagataka vakavinaka na gauna. 6Me dau tau vakayalovinaka na nomuni vosa ka dau vakatuituinataki, ka mo ni dau kila se cava e dodonu mo ni kaya vei ira yadua ko veivosaki kaya. 7E na tukuna vei kemuni na ka kece ga e baleti au ko Tikiko na wekada lomani, ka i talatala yalodina, ka noda i tokani e na cakacaka ni Turaga. 8Sa i naki sara ga oqori ni noqu talai koya yani vei kemuni, mo ni na kila kina se keitou sa vaka evei tu e ke, ka de rawa ni vakayaloqaqataki kemuni ko koya. 9E rau lako vata tu yani kei Onisimo, na wekaqu vinaka ka yalodina, ka dua ga vei kemuni ko koya. E rau na tukuna vei kemuni na veika kece sa caka tiko e ke. 10Sa loloma tu yani ko Arisitako na noqu i tokani kaivesu vata, kei Marika na tavalei Panapasa. Ko ni sa vakadreti oti e na ka e baleti koya, oya mo ni kidavaki koya kevaka e lako yani vei kemuni, 11kei Josua ka yacana tale ga ko Jusito. Sa i iratou tolutolu ga oqo na tamata cili vei ira na noqu i tokani e na cakacaka ni matanitu ni Kalou, ka ratou sa dau veivakacegui vei au. 12Sa loloma tu yani vei kemuni ko Epafira, o koya e dua ga vei kemuni, ka tamata i Karisito Jisu, ka dau masulaki kemuni vagumatua ka kerea tiko ga kina mo ni tudei e na yalomatua kei na lomadei e na nomuni muria taucoko ni lomana. 13Ni'u sa vakadinadinataka na nona a dau cakacaka vagumatua sara e na vukumuni, kei na vukudra tale ga mai Leotisea kei ira mai Aiarapole. 14Erau sa loloma tu yani vei kemuni ko Luke na vuniwai lomani kei Timasa. 15Au sa loloma tu yani vei ira na veiwekani mai Leotisea, kei Nemifa tale ga kei na i vavakoso lotu e na nona vale. 16Ia ni sa wili oti na i vola oqo vei kemuni, me qai la'ki wili tale ga ki na i vavakoso mai Leotisea, ka mo ni qai wilika tale ga na i vola e vakau mai Leotisea. 17Ka mo ni kaya tale ga vei Akipo, “Mo qarauna mo qarava vakaoti sara na i tavi ka sa soli vei iko e na cakacaka ni Turaga.” 18Au sa vola yani oqo e na ligaqu dina na noqu loloma yani ko i au ko Paula. Ni kakua ni guilecava na noqu vesu. Me tiko ga vei kemuni na loloma.

will be added

X\