KOLOSA 3

1Ia kevaka ko ni sa vakaturi cake vata kei Karisito, ni vakasaqara na veika mai cake, sa tiko kina na Karisito, e na liga i matau ni Kalou. 2Mo ni dau vakananuma tu ga na veika mai cake, kakua ga na veika e vuravura. 3Ni ko ni sa mate tu, ka sa vuni tu na nomuni bula vata kei Karisito vua na Kalou. 4Ia ni sa rairai mai na Karisito sa i koya na noda bula, ko ni na qai rairai vata kaya e na nona i serau. 5O koya gona, mo ni vakamatea sara na veika vakavuravura ka tu vei kemuni: na veibutakoci, na i valavala dukadukali, na garogaro ca, na dodomo tawa dodonu, kei na kocokoco, sa i koya e dua na i tovo ni qaravi kalou lasu. 6E na vuku ni veika oqo sa na yaco mai kina na cudru ni Kalou vei ira era sega ni talairawarawa vua. 7E a dau nomuni i valavala tu na veika oqo e liu, ni ko ni a sa dau matau tu kina. 8Ia oqo mo ni sa luvata tani kece sara: na daucudru, na dauleva, na lomaca. Me kakua na veivosacataki kei na vosa dukadukali mai na gusumuni. 9Kakua na dauveilasutaki, ka ni ko ni sa luvata tani na tamata makawa kei na nona i valavala, 10ka ko ni sa vakaisulu tu e na tamata vou, o koya sa vakavoui tiko e na vuku, me veiucui kina kei koya ka a buli koya. 11Sa sega kina ni nanumi tiko eso me ra Jiu ka so me kai Kirisi, e so me ra cili ka so me tawa cili, e so me ra matauvata ka so me kila ka, e so me ra bobula ka so me galala ia sa bibi duadua vei ira kece ga na Karisito, ka sa tiko e na ka kece ga na Karisito. 12O koya gona, mo ni vakaisulu e na dauloloma, e na yalovinaka e na yalomalumalumu, e na yalomalua kei na dauvosota vakadede, ko i kemuni na nona digitaki na Kalou yalosavasava ka daulomani. 13Mo ni dauveivukei, ka dauveivosoti ga kevaka e dua sa rarawa vua e dua vei kemuni. Me vaka sa dauvosoti kemuni na Karisito, mo ni veivosoti vaka tale ga kina. 14Ia me kena i lutua ni ka kece ga oqo na dauloloma, sa i koya sa dau vauca vata na ka kece ga me duavata vinaka sara. 15Ia me vakataulewa tiko e na lomamuni na vakacegu i Karisito, sa i koya na vakacegu ko ni a kacivi kina, e na dua bau na yago. Ka mo ni vakavinavinaka tiko ga. 16Me vutuniyau tiko na lomamuni e na vosa i Karisito. Ni veivakatavulici tiko ka veivakadreti e na vuku kece ga; ni laga same kei na sere ni lotu, kei na sere vakayalo ki vua na Kalou ni sa sinai na lomamuni e na vakavinavinaka. 17Ia na ka kece ga ko ni cakava se cavuta me caka kece ga e na yaca ni Turaga ko Jisu, ka vakavinavinaka kina vua na Kalou na Tamada e na yacana. 18O i kemuni na yalewa vakawati, ni dau talairawarawa vei ira na watimuni, me vaka sa kilikili ni ko ni tu vata kei na Turaga. 19O i kemuni na tagane vakawati, mo ni dau lomani ira na watimuni, ka kakua ni dau voravora vei ira. 20O i kemuni na gone, mo ni dau talairawarawa tiko ga vei ira na nomuni i tubutubu, ni vinaka sara oqori vua na Turaga. 21O i kemuni na i tubutubu, mo ni kakua ni dau vakacudrui ira na luvemuni, de ra na qai dadatuvu kina. 22O i kemuni na bobula, mo ni dau talairawarawa vei ira na nomuni turaga vakayago e na ka kece ga, ka kakua ni caka ga ni ra sa wanono tiko, me ka ga mo ni vinakati kina vakatamata, ia me ka ni lomamuni dina, e na nomuni rerevaka na Kalou. 23Na ka kece ga ko ni cakava, cakava sara mai na vu ni yalomuni, me vaka e caka vua na Turaga, ka segai vei ira na tamata. 24Ka nanuma tiko ni ko ni na taura ga mai vua na Turaga na i votavota me kena i sau. Ni sa i Karisito na Turaga ko ni qarava tiko. 25Ka na saumi lesu vua na daucaka ca na cala ka cakava, ni sa sega ni dau veivakaduiduitaki na Kalou.

will be added

X\