KOLOSA 2

1Ni'u vinakata mo ni kila na levu ni ka au sa cakava tiko e na vukumuni, kei ira tale ga mai Leotisea, kei ira kece tale ga era sa sega tiko ni raici au. 2Au vakaraitaka ga me'u vakayaloqaqataki ira kina, ka me ra vakaduavatataki kina e na loloma, ka me nodra kina na vinaka sara ni kila sa vakadinadinataki matua mai na vuku dina, kei na kilai m ka vuni ni Kalou, io na kilai Karisito. 3Sa vunitaki tu vua na i yau talei kece ga ni vuku kei na kila ka. 4Au tukuna tiko na ka oqo, de mani dua e temaki kemuni e na vosa veicavilaki wale ga. 5E dina ga au tiko tani vakayago, ia au sa tiko ga vakayalo kei kemuni, ka'u sa reki ni raica, na vinaka ni tovo ni nomuni tiko, kei na kaukauwa ni nomuni vakabauti Karisito. 6Ni ko ni sa vakabauti Karisito Jisu me Turaga, mo ni bula tiko vata kaya. 7Me ti sobu sara vua na wakamuni, ka tara cake tiko mai vua na nomuni bula, ka me kaukauwa cake tiko ga na nomuni vakabauta, me vaka ko ni a vakatavulici kina. Ka mo ni sinai tiko ga e na vakavinavinaka. 8Mo ni qarauni kemuni de dua e rawai kemuni e na vakasama tawa yaga ka lasu wale ni vuku vakatamata, ka vu mai na i tukuni makawa, kei na veiyalo makawa ni vuravura ka segai mai vei Karisito. 9Ni sa tiko vakayago vua na i tovo taucoko ni Kalou. 10Ka sa taucoko na nomuni bula ni ko ni tu vata kaya, o koya sa ulu ni lewa kei na kaukauwa kece ga. 11Ko ni a cilivi tale ga e na nomuni tu vua, ka sega ni a caka e na liga, oya e na nomuni sa luvata na i valavala ca ni yago e na veicilivi i Karisito. 12Ka ko ni a bulu vata kaya e na papitaiso, ka ko ni a vakaturi cake vata kaya tale ga mai kina e na nomuni vakabauta na cakacaka yaco ni Kalou, o koya ka a vakaturi koya cake tale mai na mate. 13Ko ni a mate tu e na i valavala ca, kei na nomuni a vakatawacili. Ia sa qai vakabulai kemuni vata kei Karisito na Kalou, e na nona sa bokoca oti na noda i valavala ca. 14Sa bokoca tale ga na cala eda a vauci tu kina e na kena veivakaro ni lawa. E a kauta tani sara ni sa vakota tu ki na kauveilatai. 15E a vakadrukai ira kece ga na veikaukauwa vakayalo kei vuravura kei ira na kaukauwa kece ga, na Karisito mai na kauveilatai, ka biuti ira me ra ka ni sarasara e matana levu, ka liutaki ira yani e na taqa ni qaqa me vaka era tamata vesu e na vatu. 16O koya gona me kakua ni vakalewai kemuni e dua e na ka e baleta na kakana se ka ni gunu, se ka e baleta e dua na solevu, se vula vou, se siga ni vakacecegu. 17Na veika oqo era sa i vakatakarakara wale ga ni veika dina e na qai yaco yaloyalo mai muri; ia sa i Karisito ga na ka dina. 18Me kakua ni ko ni vakuwai e na nona lewa e dua, ka dau vosataka wasoma na yalomalumalumu kei na qaravi agilosi, ka doudou voli ga e na vuku ni raivotu. Sa dokadokai koya wale ka sega na vuna dina, ia sa ka ni nona vakanananu wale ga vakatamata, 19ka sa sega ni vakarorogo matua vua na Karisito na Uluda, o koya sa vakania ka sema vata na yago taucoko e na kena veisema kei na kena veiua, ka tubu cake e na tubu vakalou. 20Kevaka ko ni a sa mate vata kei Karisito e na kedra vakabauti na veiyalo makawa ni vuravura, a cava ga ko ni sa muria tiko ga kina na veivakaro e so me vaka ko ni sa okati tu ki vuravura 21me vaka “Kakua ni taura oqo,” “Kakua ni tovolea oqori” “Kakua ni tara ko ya” ? 22Era na oti kece na veika oqo ni ra sa vakayagataki oti. Era sa vakasama ka i vakavuvuli vakatamata. 23E dina ga e vaka e rairai vuku na veika oqo e na kena vakaukauwataki na qaravi agilosi kei na yalomalumalumu, kei na vakararawataki ni yago. Ia era sega wale ga ni yaga e na kena lewai rawa na gagadre ni yago.

will be added

X\