KOLOSA 1

1Mai vei Paula, e dua nai i apositolo i Karisito Jisu e na lewa ni Kalou, kei Timoci tale ga na tacida. 2Vei ira na tamata ni Kalou ka veiwekani yalodina, era sa tu vata kei Karisito mai Kolosa. Me nomuni na loloma kei na vakacegu, mai vua na Kalou ko Tamada. 3Keirau sa dau vakavinavinaka tiko ga vua na Kalou na Tama i Jisu Karisito na noda Turaga, ka dau masulaki kemuni e na veisiga. 4Ka ni keirau sa mai rogoca na nomuni vakabauti Karisito Jisu, kei na nomuni dauloloma vei ira kece ga na tamata ni Kalou, 5ka vu mai na ka ko ni sa nuitaka, sa i koya sa maroroi koya tiko mai lomalagi me nomuni. Ko ni a sa rogoca na ka sa nuitaki tiko oqo mai na i tukutuku dina, oya na i Tukutuku Vinaka 6e na kena sa yaco yani vei kemuni, ka sa tete tiko yani vaka kina ki vuravura taucoko, ka sa tu na vuana, ka sa tubu tiko ga, me vaka ga sa yaco tiko vei kemuni, ka a sa vaka tiko mai kina mai na i matai ni siga ko ni a qai rogoca kina na nona yalololoma na Kalou, ka kila rawa sara na kena dina. 7Ko ni a vakatavulici kina mai vei Epafura, na neirau i tokani lomani. Sa i talatala yalodina i Karisito ko koya e na vukuda, 8ka sa mai tukuna vei keirau na nomuni loloma e na Yalo Tabu. 9O koya gona, mai na siga keirau a rogoca kina, keirau sega ni cegu ni masulaki kemuni, ka masulaka tiko me soli vei kemuni na vuku vakayalo kei na yalomatua mo ni vakasinaiti kina e na kila na loma ni Kalou. 10Ko ni na qai cakava rawa kina na i valavala e kilikili kei na Turaga, ka na vinakata sara ko koya, ka tu na vuamuni e na veicakacaka vinaka kece ga, ka tubu cake tiko ga na nomuni kila na Kalou. 11Mo ni vakaukauwataki e na kaukauwa kece ga sa taka mai ua nona kaukauwa lagilagi, mo ni colata rawa kina na veika kece ga e na vosota kei na reki. 12Ka mo ni vakavinavinaka vua na Tamada o koya sa vakarautaki kemuni me da wasei rawa e na nodra i votavota na yalosavasava e na matanitu ni rarama. 13Sa vakabulai keda ko koya mai na vakatulewa ni butobuto ka kauti keda tani ki na nona matanitu na Luvena lomani, 14o koya eda sa sereki kina, ka bokoci na noda i valavala ca. 15Ko Karisito na i yaloyalo ni Kalou tawa raici. Sa ulumatua ko koya, ka sa ulu ni veika buli kece ga. 16Ka ni a bulia ko koya na veika kece ga, mai lomalagi kei vuravura, e rairai se tawa rairai, se ra i tikotiko vakatui se ra veimatanitu se ra turaga vakaliuci se ra turaga kaukauwa; na ka kece ga, e a bulia ko koya, ka me ra nona tale ga. 17A sa bula tu ko koya ni bera na ka kece ga, ka ra vakadutaitaki vata kece vua na ka kece ga. 18Ko Karisito na ulu ni yago, na i soqosoqo lewenilotu; o koya na i vakatekivu na ulumatua ka a vakaturi cake tale mai na mate, me cecere duadua kina ko koya e na ka kece ga. 19Ni sa vinakata na Kalou me tiko vua na nona i tovo taucoko, 20ka me vakaveivinakatitaki e na vukuna na veika kecega, e vuravura se mai lomalagi, ka vakavuna na veivinakati e na nona mate e na kauveilatai. 21Ia ko i kemuni, ko ni a kaitani e liu ka meca e na yalomuni kei na nomuni cakacaka ca. 22Sa vakaveivinakatitaki kemuni e na nona a mate e na yagona me kauti kemuni rawa mai kina vua, ka ko ni sa savasava tu ka sega ni vakalewai rawa se me mai vunauci e matana. 23Ia ko ya kevaka ko ni sa dei matua ga, e na nomuni vakabauta, ka sega ni yavalati mai na vakanuinui ni tukutuku vinaka ko ni a rogoca, ka sa vunautaki vei ira na tamata kece ga e na vuku i lomalagi, ka'u sa kena i talatala tu ko i au, ko Paula. 24E ka ni marau tiko vei au oqo na noqu vakararawataki tiko e na vukumuni, ka'u vakayacora sara tiko kina e yagoqu na vo ni rarawa i Karisito e na vuku ni yagona, ko ya na i soqosoqo lewenilotu, 25ka'u sa lesi kina me'u kena i talatala me vaka na i lesilesi vakalou sa soli vei au me baleti kemuni. Sa i koya me'u vunautaka sara me macala na vosa ni Kalou. 26Sa i koya na ka vuni ka vunitaki tu mai vei ira na veitabatamata e liu, ka sa qai vakaraitaki mai ki vei ira na tamata ni Kalou. 27E a vinakata na Kalou me vakatakila vei ira na nona tamata na kena talei vakaidina na ka vuni oqo e na kedra maliwa na veimatanitu tani. Sa i koya oqo: na Karisito e na lomamuni na i nuinui ni bula lagilagi. 28Sa i koya ga keitou sa vunautaka tiko, ka vakasalataka kina na tamata yadua, ka vakatavulici kina na tamata yadua e na vuku kece ga, me keitou na solia yani kina na tamata yadua sa matua e na Karisito. 29Sa i koya oqo na i naki ni noqu cakacaka ka sasaga vagumatua tiko ga kina e na dela ni nona kaukauwa sa cakacaka yaco tiko vei au.

will be added

X\