CAKACAKA 9

1Ia e a sega ni cegu ko Saula e na nona tauca tiko ga na vosa ni via veivakararawataki kei na veivakamatei vei ira na tisaipeli ni Turaga. E a mani lako vua na Bete Levu, 2ka la'ki kerea kina e so na i vola ki na soqo vaka lotu mai na koro ko Tamasiko, me rawa ni kauti ira kina vakavesu ki Jerusalemi na tamata ka ra dau muria tiko na Sala ni Turaga, se ra tagane se ra yalewa. oya kevaka e mani kunea kina e so. 3Ia ni sa volekati Tamasiko yani, sa qai cila vakavolivoliti koya vakasauri e dua na rarama mai lomalagi. 4A sa bale sara ki na qele, ka sa rogoca sara e dua na domo ni kaya vua, “I Saula! I Saula! A cava ko vakacacani au tiko kina?” 5Sa qai kaya ko Saula, “'O cei ʻo kemuni, Turaga?” Sa qai kaya mai na domo koya, “'O i au ko Jisu, o koya ko sa vakacacana tiko! 6Ia tu cake, lako yani ki na koro; ka na qai tukuni kina vei iko na ka e dodonu mo cakava.” 7E ratou a tu vakadua ko iratou ka lako vata tiko kei Saula, ka sega ni cavuta rawa e dua na vosa. E ratou rogoca na domo, ia e ratou a sega ga ni raica e dua. 8Sa qai tucake mai e na qele ko Saula, ia ni sa via rai na matana, sa sega ni raica rawa e dua na ka. E ratou sa qai tubera na ligana ka kauta ki Tamasiko. 9E a mani sega tu ni rai ko Saula ka tolu na siga; ka sega tale ga ni bau kana se gunu e na gauna koya. 10E tiko mai Tamasiko e dua na tisaipeli, ka yacana ko Ananaiasa. E a vosa vua na Turaga e na dua na raivotu ka kaya, “Ananaiasa!” A sauma ko koya, ka kaya, “'O i au oqo, Turaga.” 11Sa qai kaya vua na Turaga, “Tu cake, lako mada ki na gaunisala ka vakatokai ko Dodonu. La'ki taroga e na vale nei Jutasa e dua na kai Tarisu, a yacana ko Saula. E masu tiko e na gauna oqo ko koya, 12ka sa raica oti tiko e na dua na raivotu e dua na tamata, ka yacana ko Ananaiasa, ni lako yani vua ko tabaki koya e na ligana me rai rawa tale kina” 13Ia sa qai sauma ko Ananaiasa, ka kaya, “Kemuni na Turaga, au sa rogoca mai vei ira e lewe vuqa na levu ni ka ca sa cakava oti na tamata oqo vei ira na nomuni tamata yalo savasava mai Jerusalemi. 14Ia sa lako mai ki Tamasiko ko koya e na nodra lewa na bete levu me mai vesuki ira kece ga era sa masuta tiko na yacamuni.” 15Ia sa qai kaya ga vua na Turaga, “Mo lako ga, ni'u sa digitaki koya oti me qaravi au, me na kauta na yacaqu vei ira na kai veimatanitu tani, kei ira na tui, kei ira tale ga na luve i Isireli. 16Au na qai vakatakila vua na levu ni ka e na sota kaya e na vukuqu.” 17Sa mani lako ko Ananaiasa, ka curu ki na vale ka tiko kina ko Saula. Sa tabaki koya e na ligana, ka kaya, “Na wekaqu Saula, sa talai au mai na Turaga, ko Jisu o koya ka a rairai vei iko e na sala ko a lako mai kina, mo sa mai rai rawa tale, ka mo vakasinaiti tale ga e na Yalo Tabu.” 18Sa qai lutu vakasauri mai matana e dua na ka e vaka na vari ni ika, ka sa rai rawa; sa qai tu cake ka papitaisotaki. 19Ia ni sa kana oti ko Saula, sa qai kaukauwa tale mai. Sa mani mai tiko voli yani ko koya kei ira na tisaipeli mai Tamasiko ka vica na siga. 20A sa vunautaka sara e na nodra veivalenilotu na lotu vaka-Jiu ni sa Luve ni Kalou ko Jisu. 21Era sa kurabui kece ga ko ira era rogoci koya, ka kaya, “E sega li ni ʻo la 'qo ka a dau vakacacani ira era dau masuta na yaca i Jisu mai Jerusalemi? Ka sega li ni naki sara ga ni nona lako mai ki ke me mai kauti ira vakavesu ko ira oqo vei ira na bete levu?” 22Ia sa tubu cake tiko ga mai na kaukauwa i Saula, ka ra sa veilecayaki kina na Jiu era tiko e Tamasiko, ka sega ni dua e saqata rawa na nona vakadinadinataka tiko ni sa Karisito dina sara ga ko Jisu. 23Ni sa toso tiko na gauna, era sa qai bosea na Jiu me ra sa vakamatei Saula, 24ia e a mani qai kila ko koya na nodra bukivere. Era a yadrava na veimatamata ni koro e na siga kei na bogi, me ra vakamatei koya kina. 25Ia era sa qai kauti koya na tisaipeli e na bogi, ka tukuci koya sobu e na dua na sova e na daku ni bai. 26Ni sa yaco ko Saula ki Jerusalemi, sa tovolea sara me la'ki curu vei ira na tisaipeli. Ia era sega ni vakabauta ni sa tisaipeli ko koya, ka ra sa rerevaki koya kece. 27Sa qai lako ko Panapasa ka kauti koya vei iratou na i apositolo, ka la'ki vakamacalataki koya vei iratou. E a vakamacalataka na nona a raica na Turaga e na gaunisala, na nona a vosa na Turaga vua, kei na nona a vunau vakadoudou mai Tamasiko e na yaca i Jisu. 28Sa mani tiko ko Saula ka lako vata voli kei ira mai Jerusalemi 29ka vunau voli vakadoudou e na yaca ni Turaga. E a veivosaki tale ga ka veileti kei ira na Jiu vosa Vakirisi, ka ra a tovolea me ra vakamatei koya. 30Ni ra sa kila na ka koya ko ira na vakabauta era sa qai kauti koya sobu ki na koro ko Sisaria ka vakatala sara ki na koro ko Tarisu. 31Sa mani mai mudu toka mada e kea na nodra vakacacani na i soqosoqo lewe ni lotu taucoko mai Jutia kei Kalili kei Samaria. A ra sa vakaukauwataki e na veivuke ni Yalo Tabu, ka sa tubu cake tiko ga na kedra i wiliwili, ni ra sa qarava tiko na Turaga e na vakarokoroko. 32E a lakova na veiyasana kece ga ko Pita, ka a lako sobu tale ga e na dua na gauna vei ira na tamata ni Kalou era tiko mai na koro ko Lita. 33E kea e a kunea kina e dua na tamata ka yacana ko Inia, ka sa yabaki walu na nona davo ni a tauvi koya tu na paralasi. 34Sa qai kaya vua ko Pita, “Inia, sa vakabulai iko ko Jisu Karisito. Tu cake, ka viviga na nomu i davodavo” A tu cake sara e na gauna ga koya ko koya. 35Era sa qai raici koya ko ira kece ga era tiko mai Lita kei na koro ko Saroni, ka ra sa vuki vua na Turaga. 36E a tiko mai na koro ko Jopa e dua na yalewa vakabauta. A yacana ko Tavaita, a kena vosa Vakirisi ko Tokasa (ka kena i balebale, ʻe dua na dia.ʼ) Sa dau vakaogai koya e na veicakacaka vinaka kece ga kei na noua dau vukei ira na vakaloloma. 37E a tauvi koya e dua na mate e na gauna koya ka mani mate sara. Era sa qai vakasilima na yagona ka la'ki vakotora e na dua na i taba vale e cake. 38E sega soti ni yawa ko Jopa mai Lita. Ia ni ra sa rogoca na tisaipeli ni tiko kina ko Pita, era sa mani vakatala vua e rua na tamata me rau la'ki kerea me lako mada yani vakatotolo vei ira. 39A cavu tu sara ko Pita ka lako vei ira. Ia ni sa yaco yani era sa kauti koya sara ki na i taba vale e cake. Era wavokiti koya na yada kece, ka ra tagi ka vakaraitaka vua na kote leleka kei na i sulu e so ka a cula ko Tokasa ni a sa bula ka tiko vata kei ira. 40Sa qai vakatalai ira kece ki tautuba ko Pita, ka mai tekiduru yani me masu. Sa qai goleva na yago ka kaya, “Tavaita, tu cake!” Sa mai rai sara na matana. Ia ni sa raici Pita, sa duri cake sara. 41Sa dodoka sara vua na ligana ko Pita ka tuberi koya cake. Sa qai kacivi ira kece yani na vakabauta, kei ira na yada ko Pita, ka vakaraitaki koya vei ira ni sa bula tale. 42Sa mani tetevi Jopa taucoko na kena i tukutuku, ka ra sa lewe vuqa era vakabauta kina na Turaga. 43E a mani tiko voli mai Jopa ko Pita kei Saimoni, na daucaka kulinimanumanu e na dua toka na gauna balavu.

will be added

X\