CAKACAKA 8

1E a dodonu vinaka tu vei Saula na vakamatei nei Sitiveni. E a tekivu sara tale ga e na siga koya e dua na veivakacacani levu vei ira na i soqosoqo lewe ni lotu ka ra tiko mai Jerusalemi. Era a mani veiseyaki kece kina na lewe ni lotu ki na loma ni yasana ko Jutia kei Samaria, ka ratou qai vakavo ga na i apositolo. 2Era a mani buluti Sitiveni e so na tamata yalodina ka ra sa tagicaki koya vakalevu sara. 3A sa vakacacana vakalevu na i soqosoqo lewe ni lotu ko Saula. E a curuma na nodra veivale ka yarataki ira ki tuba, na tagane kei na yalewa, ka biuti ira ki na valeniveivesu. 4Era sa qai veilakoyaki voli e na veiyasana ko ira ka veiseyaki, ka vunautaka na i Tukutuku Vinaka. 5Sa mani lako sobu ko Filipi ki na koro ko Samaria, ka vunautaki Karisito kina vei ira na lewena. 6Era sa vakarogoca vakavinaka sara na lewe vuqa na ka e tukuna vei ira ko Filipi, ka sa ra raica na cakacaka mana e so e cakava. 7A ra sa vakasavi tani e lewe levu na yalo velavela, ka ra sa lako tani mai vei ira na tamata e na qoqolou; a ra sa vakabulai tale ga e lewe vuqa ka tauvi paralasi tu kei na lokiloki. 8A sa levu na marau e na koro koya. 9E tiko e na koro koya e dua na tamata, a yacana ko Saimoni. E tamata daucakaisausau, ka dau vakurabuitaki ira vakalevu na lewe i Samaria e na veika mana e cakava. Sa dau tukutukuni koya voli me sa bau dua toka na ka ko koya. 10A ra sa vakarogoci koya kece na tamata, ko ira na lewe ni vanua wale kei ira na turaga, ka ra kaya, “Na tamata oqo, sa i koya sara ga na kaukauwa ni Kalou ka dau kilai tu me Kaukauwa Vakadomobula!” 11Era vakarogoci koya tiko vakakoya baleta ni sa dede na nona dau vakurabuitaki ira tiko e na nona caka mana. 12la ni ra sa vakadinata na i tukutuku vinaka sa vunautaka ko Filipi me baleta na Matanitu ni Kalou, kei na Yaca i Jisu Karisito, era sa mani papitaisotaki kece sara, na tagane kei na yalewa. 13A mani yaco tale ga me vakabauta ko Saimoni; ia ni sa papitaisotaki oti sa qai dau tiko vata voli ga kei Filipi. Sa kurabui vakalevu ko koya ni sa vakaraica tiko na cakacaka veivakurabuitaki e so kei na veicakacaka mana lelevu e so sa vakayacora ko Filipi. 14Ia ni ratou sa rogoca ko iratou na i apositolo ka tiko mai Jerusalemi ni ra sa vakabauta na kai Samaria na vosa ni Kalou, e ratou sa qai talai Pita kei Joni vei ira. 15Ia ni rau sa yaco yani e rau sa masulaki ira na vakabauta me soli vei ira na Yalo Tabu, 16ka ni sa bera tiko ni sobuta e dua vei ira ko koya e na gauna koya. Era a sa papitaisotaki wale ga e na yaca ni Turaga ko Jisu. 17E rau sa qai tabaki ira e na ligadrau ka sa mani curumi ira sara na Yalo Tabu. 18Ia ni sa raica ko Saimoni ni sa soli na Yalo Tabu e na veitabaki ni ligadrau na i apositolo, sa qai via soli i lavo vei rau, 19ka kaya, “Drau solia tale mada ga mai vei au na kaukauwa oqori, me curu tale ga kina na Yalo Tabu vei ira yadua au na tabaka e na ligaqu.” 20Sa qai kaya vua ko Pita, “Mo drau rusa vata kei na nomu i lavo! Ko nanuma beka ni ko na rawa ni volia na i solisoli ni Kalou e na i lavo? 21E sega ni dua na nomu i tavi se i votavota e na cakacaka oqo, ka ni sega tiko ni dodonu vua na Kalou na lomamu. 22O koya gona, mo veivutunitaka mada na nomu i valavala ca oqo, ka masuta na Turaga, kevaka e rawa, me vosota na nanuma ni lomamu. 23Ni'u sa kunea rawa ni ko sa sinai tu e na yalo ca ka sa vesuki iko tu na i valavala ca.” 24Sa qai sauma ko Saimoni ka kaya, “Drau masulaki au mada vua na Turaga, me kakua kina ni yacovi au e dua na ka ko drau kaya tiko oqo.” 25Ia ni rau sa tukuna ka vunautaka oti na vosa ni Turaga, e rau sa qai lesu tale ki Jerusalemi, ka rau a vunautaka na i Tukutuku Vinaka e na vuqa na koro kei Samaria e na nodrau i lakolako lesu. 26E a vosa vei Filipi e dua na agilosi ni Turaga, ka kaya, “Tu cake, ka lako vaka ki na ceva e na sala ka lako sobu mai Jerusalemi ki Kesa” (Sa sega ni dau vakayagataki tu na sala oya e daidai.) 27A mani cavutu ko Filipi ka lako, ka rau mani sota sara kei na dua na kai Iciopea. E dua ko koya na matanivanua, ka vakailesilesi levu i Kadasi na nodra ranadi na kai Iciopea, ka nona dauniyau tale ga. E a lako ki Jerusalemi ko koya me la'ki so-kalou kina, 28ka sa lesu tale tiko ka wilika tiko na i vola i Aisea na parofita e na qiqi ka vodo tiko kina. 29Sa qai kaya vei Filipi na Yalo Tabu, “Toro yani ki na qiqi mo drau la'ki sala vata tiko.” 30Sa mani cici ko Filipi, ka rogoca sara ni wilika tiko ko koya na i vola i Aisea na parofita. Sa mani tarogi koya ko Filipi ka kaya, “Ko ni kila beka na ka ko ni wilika tiko?” 31Sa qai sauma ko koya, ka kaya, “E na rawa vaka cava vei au me'u kila kevaka e na sega ni dua e tuberi au kina?” Oti koya sa qai kerei Filipi me kaba cake yani me rau la'ki dabe vata. 32Oqo na wase ni Vola Tabu e a wilika tiko na turaga ni Iciopea koya: “Me vaka na sipi sa tuberi me la'ki vakamatei, ka vaka na lami sa galu e na mata i koya sa kotiva na vutina, sa vaka kina ko koya, ni sa sega ni tauca e dua na vosa. 33Sa vakamaduataki, ka sega ni tau vakadodonu vua na lewa. Ko cei e na bau tukuni ira na nona kawa? Ni sa kau tani mai vuravura na nona bula.” 34Sa qai vosa vei Filipi na matanivanua, ka kaya, “Tukuna mada vei au, e tukuni cei tiko na parofita e na tikina oqo, ko koya ga, se dua tale?” 35Sa qai vosa ko Filipi, ka vakatekivu mai na tiki ni Vola Tabu koya, me vunautaki Jisu vua. 36Ia ni rau sa lako tiko, e rau sa yaco sara yani ki na dua na wai. A sa kaya sara na matanivanua vei Filipi, “Raica, sa tu oqo na wai. Na cava e sega kina ni rawa me'u papitaisotaki? ^ 37Sa qai kaya vua ko Filipi, “Sa rawa ni ko papitaiso kevaka ko sa vakabauta e na lomamu taucoko” Sa qai sauma na matanivanua ka kaya, “Au sa vakabauta ni sa Luve ni Kalou ko Jisu Karisito!” 38Sa qai vakarota sara ko koya me tu mada vakadua na qiqi, ka rau sa mai sobu ruarua sara yani ki wai, ko Filipi kei na matanivanua, ka sa papitaisotaki koya ko Filipi. 39Ia ni rau sa cabe cake mai wai sa kauti Filipi tani sara na Yalo ni Turaga, ka sa sega ni raici koya tale na matanivanua; ka sa mai lako yani ko koya e na marau. 40Sa qai la'ki kune sara tale ko Filipi e na koro ko Asota; a gole tiko ki Sisaria. E a lakova na veikoro kece e kea ka vunautaka kina na i Tukutuku Vinaka.

will be added

X\