CAKACAKA 7

1Sa qai kaya na Bete Levu, “E vaka evei, e dina oya se sega?” 2Sa qai kaya ko Sitiveni, “O i kemuni na veiwekani kei kemuni na qase, mo ni rogoci au mada! E a rairai na Kalou lagilagi vei Eparaama, na noda qase, ni a sa tiko ko koya mai na vanua ko Mesopotemia, ni bera ni la'ki vakaitikotiko ki na koro ko Arana. 3E a kaya vua, ʻBiuta na nomu vanua kei ira na wekamu ka lako ki na vanua ka'u na vakatakila vei iko.ʼ 4Sa qai biuta na nodra vanua na kai Kalitia ko koya ka la'ki tiko mai Arana. Ni sa mate na tamana, sa qai kauti koya mai kea na Kalou ki na vanua ko ni sa qai mai bula tiko kina oqo. 5Ia e a se sega mada ni solia kina vua e dua na tikina me taukena, e sega mada ga ni solia vua na vanua e butuka tu. Ia e sa yalataka tu ga me na qai solia vua me taukena kei ira tale ga na nona kawa mai muri. E na gauna e yalataka kina na ka oqo na Kalou vei Eparaama e sa sega kina ni dua na luvena. 6Oqo na ka e a kaya vua na Kalou, ʻEra na tiko vulagi na nomu kawa e na dua na vanua tani, ka ra na la'ki vakabobulataki ka vakararawataki kina me va na drau na yabaki. 7Ia au na vakaitotogitaki ira na lewe ni matanitu era na vakabobulataki kina. Ni oti oya era na qai lako tani mai kina, ka mai qaravi au e na vanua oqo.ʼ 8E tarava oya ni a qai solia vei Eparaama na Kalou na veiyalayalati ni veicilivi, o koya gona koya, ni sa sucu ko Aisake na luvena, sa cilivi koya e na i ka walu ni siga. Sa qai tama i Jekope ko Aisake, ka tamadra na qase e tinikarua ko Jekope. 9“E ratou a mani vuvutaki Josefa ko iratou na qase ka volitaki koya ki Ijipita. Ia e a sega ni biuti koya na Kalou. 10E a vakabulai koya mai na nona veileqa kece sara, ka solia vua na veivakalougatataki kei na vuku e na mata ni Fero, na tui Ijipita. A mani lesi koya na Fero me kovana, me lewai Ijipita kei ira kece tale ga na lewe ni nona matavuvale. 11“E a qai tubu e dua na dausiga kei na leqa levu mai Ijipita taucoko kei Kenani, ka ra a sega ni kunea rawa e dua na kakana ko ira na noda qase. 12Ia ni sa rogoca ko Jekope ni tiko na sila mai Ijipita, sa mani talai ira kina na noda qase e na kena i matai ni gauna. 13E na kena i karua ni gauna sa qai vakatakilai koya kina ko Josefa vei iratou na tuakana, ka sa qai kilai kina vua na Fero na vuvale i Josefa. 14Sa qai talatala ko Josefa me lakovi ko Jekope na tamana kei ira tale ga na nona vuvale taucoko; era lewe vitusagavulu ka lima kece. 15Sa mani lako sobu ki ljipita ko Jekope, ka la'ki mate kina. E a mate ko koya kei ira tale ga na noda qase. 16Sa qai kau cake ki na koro ko Sikemi na yagodra ka ra la'ki vakotori e na i bulubulu ka a volia ko Eparaama e na so na tiki ni siliva mai vei ira na luve i Emori mai Sikemi. 17“Ni sa voleka mai na gauna me vakayacori kina na yalayala, ka a bubului kina na Kalou vei Eparaama, sa tubu vakalevu na kedra i wiliwili na noda mai Ijipita, 18ka yacova na gauna e buli kina e dua tale na tui kei ljipita, ka a sega ni kilai Josefa. 19E a veidabuitaki ira na noda ko koya, ka vakasaurarataki ira na noda qase me ra biuti ira na nodra gone lalai ki tautuba, me ra kakua kina ni bula. 20Sa i koya na gauna oya ka a sucu kina ko Mosese - a gone mata vinaka. A susugi tiko e na vale nei tamana ko koya ka tolu na vula. 21Ia ni sa biu ko koya ki tautuba, sa qai kauti koya na luve ni Fero yalewa, ka susuga me luvena. 22A vakatavulici Mosese e na nodra kila ka kece ga na kai Ijipita, ka sa yaco me tamata kaukauwa e na vosa kei na cakacaka. 23“Ia ni sa yabaki vasagavulu ko koya sa qai tubu mai e lomana me la'ki sikovi ira mada na wekana, na luve i Isireli. 24E a raica e dua vei ira na Isireli ko Mosese ni vakararawataki koya tiko e dua na kai Ijipita. Sa qai la'ki vukei koya ko Mosese ka sauma lesu na veivakararawataki oya ka vakamatea na kai Ijipita. 25E nanuma ga ko koya ni ra sa na kila tiko na wekana ni na vakayagataki koya na Kalou me ra sereki kina, ia era a sega ni kila. 26E na siga ka tarava, e a raica ni rau veivala tiko e rua na Isireli, ka mani via la'ki vakameautaka na nodrau leqa, ka kaya, ʻKemudrau na turaga, o i kemudrau ko drau Isireli vata ga, a cava ko drau qai veivala tiko kina?ʼ 27Sa qai biliraki Mosese tani ko koya ka a mokulaka tiko na wekana, ka kaya, ʻO cei e sa lesi iko mo i liuliu ka mai vakatau lewa vei keimami? 28Ko via vakamatei au beka me vaka ko a vakamatea na kai Ijipita koya e na noa?ʼ 29Sa qai dro ko Mosese e na vuku ni vosa koya, ka la'ki tiko vulagi voli e na vanua ko Mitiani, ka mani sucu kina e rua na luvena tagane. 30“Ni sa oti e vasagavulu na yabaki, sa qai rairai vei Mosese e dua na agilosi e na vanua lala volekata na Ulunivanua ko Saineai. E rairai vua e na yameyame ni buka e na dua na vunikau. 31E a kurabui ko Mosese e na ka e raica, ka mani lako voleka kina me vakaraica vinaka. Ia e a rogo vua na domo ni Turaga ni kaya, 32ʻKo i au na nodra Kalou na nomu qase, na Kalou i Eparaama, i Aisake, kei Jekope tale ga.ʼ A sautaninini na yago i Mosese, ka sa rere ni rai kina. 33Sa qai kaya vua na Turaga, ʻLuvata tani na nomu i vava mai na yavamu, ni sa qele tabu na vanua ko sa tu kina. 34Au sa raica, au sa raica dina sara, na nodra vakararawataki tiko na noqu tamata era tiko mai Ijipita. Au sa rogoca na nodra vutugu, ka'u sa lako yani oqo me'u vakabulai ira. Lako mai me'u na mai talai iko ki Ijipita.ʼ 35“Ko Mosese oya, ko koya era a besetaka, ka kaya, ʻKo cei sa lesi iko mo i liuliu ka mo mai vakataulewa vei keimami?ʼ sa i koya ga ka a qai talai koya na Kalou me liutaki ira ka vakabulai ira, e na veivuke ni agilosi ka a rairai vua e na vunikau kama. 36E a kauti ira tani mai Ijipita ko koya, ni sa cakava oti na veika veivakurabuitaki kei na cakacaka mana e so e na vanua ko Ijipita kei na Wasa Damudamu, kei na vanua lala e na vasagavulu na yabaki. 37Sa i Mosese ga oya ka a kaya vei ira na Isireli, ʻE na vakatubura na Kalou e dua na nomuni parofita, mai vei kemuni ga vakaikemuni, me vakataki au.ʼ 38Sa i koya ga ka a tiko kei ira na i vavakoso lewenilotu e na vanua lala vata kei na agilosi ka a vosa vua kei ira na noda qase e na Ulunivanua ko Saineai. Sa i koya tale ga ka ciqoma na i vunau bula me soli vei keda. 39“Era a bese ni muria na nona vosa ko ira na noda qase; era a biliraki koya tani ka ra gadreva me ra lesu tale ki Ijipita. 40Ia era a qai kaya vei Eroni, ʻCakava mada e so na noda kalou me ra mai liutaka na noda i lakolako. Ko Mosese oqo, o koya ka a kauti keda tani mai na vanua ko Ijipita, eda sa sega ni kila se cava sa yaco vua.ʼ 41Era sa qai cakava e dua na matakau, a i vakatakarakara ni dua na luve ni bulumakau tagane, ka ra sa vakacaboisoro kina. A ra sa qai cakava e dua na kena soqo ni marau me vakalagilagi kina na cakacaka ni ligadra. 42Sa qai vakanadakui ira kina na Kalou ka laivi ira me ra so-kalou ki na veikalokalo ni lomalagi, me vaka e a sa volai tu e na nodra i vola na parofita: ʻO i kemuni na mataqali i Isireli, na manumanu ko ni a vakamatea me ra i soro e na loma ni vasagavulu na yabaki, e na vanua lala, era a sega ni mai vakacabori vei au. 43Ia ko ni a kauta voli ga na vale laca i Moleke, kei na i vakatakarakara i Refani na nomuni kalou kalokalo; sa i iratou na matakau ko ni a cakava mo ni qarava. O koya gona oya au na vakatalai kemuni tani kina me sivia sara yani na i yalayala kei Papiloni.ʼ 44“O ira na noda qase e a tiko vei ira na valelaca ni Kalou e na loma ni vanua lala. E a caka na vale oya me vaka na ka e a vakarota na Kalou vei Mosese, koya me cakava me vaka na kena i vakatakarakara e a sa vakaraitaki oti vua. 45E muri, ni sa dewa mai na valelaca vei ira na noda qase era sa qai kauta tiko mai ni ra sa lako vata mai kei Josua e na nodra sa mai tawana na nodra vanua na veimatanitu ka a sa vakasavi ira na Kalou e na nodra sa toso tiko mai na noda qase. Ia e a mani mai tiko ga e kea me yacova na gauna i Tevita. 46E a kune loloma ko Tevita e mata ni Kalou, ka mani kerea me nona i tavi e dua na vale me i tikotiko ni Kalou i Jekope. 47Ia na vale koya e a qai tara ko Solomoni. Era Yalo Kaukauwa na Isireli me vakataki ira na Nodra Qase 48“Ia e sega ni tiko ko koya sa Cecere Sara e na veivale sa caka e na liga; me vaka e kaya na parofita: 49ʻSa noqu i tikotiko vakatui ko lomalagi, ka sa i tutu ni yavaqu ko vuravura. A mataqali vale vakacava ko ni na tara me noqu, sa kaya na Turaga? Se na vanua cava me'u na vakacegu kina? 50E sega li ni a cakava na ligaqu na veika kece ga oqori?ʼ 51“Ni yavu tamata yalo kaukauwa! Sa duatani na butobuto ni lomamuni kei na didivara ni daligamuni! Ko ni sa ucui ira vinaka sara ga na nomuni qase, e na nomuni dau vorata na Yalo Tabu! 52E a bau dua li vei ira na parofita me ra a sega ni vakacacana ko ira na nomuni qase? Era a vakamatei ira era a mai tukuna rawa tiko e liu na lako mai nei Koya Na Yalododonu, o koya ko ni a qai mai bukiveretaka ka vakamatea. 53Sa i kemuni ka soli vei kemuni na lawa ni Kalou, ka ra a mai solia na agilosi, ia ko ni a qai sega ga ni muria!” 54Ia ni ra sa rogoca na veika koya na lewe ni Bose sa rarawa vakalevu na yalodra ka ra sa vakasequruqurubati vua e na cudru. 55Ia sa sinai tu ko Sitiveni e na Yalo Tabu, ka sa qai rai matua ki lomalagi ka raica na lagilagi ni Kalou; sa raici Jisu tale ga ni tucake tu e na liga i matau ni Kalou. 56Sa qai kaya vei ira ko Sitiveni, “Au sa raica ni sa tadola na lomalagi ka raica na Luve ni Tamata ni sa tucake tu e na liga i matau ni Kalou!” 57Era sa qai qoqolou na lewe ni l^ose ka sogota na daligadra e na ligadra. Era sa qai cicivi koya kece yani vakasauri. 58Era sa qai viritaki koya ki na taudaku ni koro ka vakaviriki koya e na vatu. E ratou sa qai biuta tu na nodratou i sulu ko iratou na i vakadinadina lasulasu koya vua e dua na cauravou ka yacana ko Saula. 59Ia ni ra sa vakaviriki Sitiveni tiko e na vatu sa qai kaci ko koya vua na Turaga, ka kaya, “Turaga Jisu, ni taura yani na yaloqu!” 60Sa qai tekiduru sobu ko koya ka kaya e na domo levu, “Turaga, ni kakua ni cudruvi ira e na vuku ni valavala ca era sa cakava oqo!” la ni sa cavuta oti na vosa oya sa qai mai cavuka sara yani na nona i cegu.

will be added

X\