CAKACAKA 6

1Ia ni sa toso tiko na gauna ka sa levu tiko ga mai na kedra i wiliwili na tisaipeli i Jisu, era sa qai vosa kudrukudrutaki ira na Jiu i taukei ko ira na Jiu vosa Vakirisi. Era kaya ni ra sa dau guilecavi tiko na nodra yada e na votai ni yau e na veisiga. 2E ratou sa mani vakasoqoni ira vata na tisaipeli e lewe vuqa ko iratou na lewe tinikarua, ka ratou kaya vei ira, “E sega ni dodonu me keitou sa laiva na vunautaki ni vosa ni Kalou ka mai ogataka na cakacaka ni lavo. 3O koya gona oya kemuni na veiwekani, ni vakasaqara mada mai vei kemuni e vitu na tamata vinaka, ka sinai e na Yalo Tabu kei na vuku, me keitou lesi iratou ki na cakacaka oqo. 4Ia ko i keitou, keitou sa na soli keitou sara mada ga ki na masumasu kei na vunautaki ni Vosa.” 5Era a marautaka kece na vakasama oya, ka ra sa mani digitaki Sitiveni, e dua ka sinai tu e na vakabauta kei na Yalo Tabu, kei iratou ko Filipi, Pirokoro, Nikanori, Taimoni, Parimina kei Nikola, e dua ka a vuki ki na lotu vaka-Jiu mai Anitioki. 6Era sa mani vakaturi iratou oqo e matadratou na i apositolo, ka ratou sa qai masu na i apositolo ka tabaki iratou e na ligadratou. 7A sa tete tiko ga na vosa ni Kalou. Sa tubu cake vakalevu tiko ga na kedra i wiliwili na tisaipeli e Jerusalemi, ka sa lewe vuqa sara vei ira na bete era sa talairawarawa ki na vakabauta. 8E a sinai e na vakabauta kei na kaukauwa ko Sitiveni, ka a cakava na veika veivakurabuitaki kei na cakcaka mana lelevu e so e na kedra maliwa na tamata. 9Ia era a qai lako yani e so na i vavakoso ni valenilotu ka vakatokai na valenilotu ni Tamata Galala, kei ira e so na kai Kirini kei Alekisadria, kei Silisia kei Esia, ka ra veileti kei Sitiveni. 10Ia era a sega ga ni vorata rawa na vuku kei na Yalo ka a vosa tiko kina ko koya. 11Era sa qai sauma e so na tamata me ra kaya, “Keimami a rogoca na tamata oqo, ni vosa vakacacataki Mosese kei na Kalou!” 12Sa i koya na sala oqo era a vakauqeti ira rawa kina na tamata kei ira na qase kei ira na daunilawa. Era sa qai lako yani vei Sitiveni ka vesuki koya ka kauti koya vei ira na lewe ni bose. 13Era sa qai kacivi iratou yani eso na dauveibeitaki vakailasu, ka ratou sa qai kaya, “Na tamata oqo e sega ni mudu ni vosa vakacacataka tiko na noda Vale Tabu oqo kei na Lawa i Mosese. 14Keitou a rogoca ni kaya ni na vakarusa na Vale Tabu oqo, ko Jisu na kai Nasareci ka na veisautaka kece na noda i vakarau ni bula me vaka na veivakaro e a solia mai vei keda ko Mosese!” 15A sa gole kece na matadra na lewe ni Bose vei Sitiveni ka vakaraici koya matua, ka ra raica ni sa vaka na mata ni dua na agilosi na matana.

will be added

X\