CAKACAKA 5

1Ia e a tiko e kea e dua na tamata, a yacana ko Ananaiasa, ka watina ko Safaira. E a volitaka ko koya e dua na tiki ni qele, 2ia e a qai vunia e dua na i wase ni kena i sau, ka kauta na kena vo ka la'ki solia vei iratou na i apositolo. E a bau kila tale tiko ga na watina na ka koya. 3Sa qai kaya vua ko Pita, “Ananaiasa, a cava ko vakalaivi Setani kina me rawai iko, mo la'ki lawakitaka kina na Yalo Tabu, ka maroroya toka ga e dua na i wase ni sau ni qele? 4E sega li ni a nomu tu na qele e na gauna e se sega ni volitaki kina? Ia ni sa volitaki oti, e sega li ni a tu sara ga vei iko na lewa ni kena i lavo? A cava o qai nakita kina mo cakava e dua na ka vakaoqo? Ko sega ni lasutaki ira tiko na tamata, ko sa lasutaka sara ga na Kalou!” 5Ia ni sa rogoca na vosa koya ko Ananaiasa, sa qai mai bale yani ka mate sara; ka sa dua tani na levu ni nodra rere ko ira kece ga era rogoca na ka koya. 6A ra sa qai lako yani e so na cauravou ka solega na yagona. E ra sa qai colata ki tautuba ka ra la'ki buluta. 7Ia ni sa oti e rauta beka e tolu na aua, sa curu yani na watina, ka sega tiko ni kila na ka e sa qai yaco oti ga oya. 8Sa qai kaya vua ko Pita, “Tukuna mada mai vei au, sa i koya kece sara beka ga oqo na levu ni lavo drau a volitaka kina na qele, se sega?” “Io,” a kaya ko koya, “sa kena levu sara ga oqori.” 9Sa qai kaya tale vua ko Pita, “A cava ʻo drau nakita vata kina mo drau vakatovolea na Yalo ni Turaga? Raica, e ratou sa tu oqori e katuba ko iratou ka a la'ki buluta na watimu. E ratou na colati iko tale ga vaka kina” 10Sa qai mai bale vakasauri sara yani ko Safaira ki na vanua e duri tu kina ko Pita ka mate sara. E ratou sa qai curu yani na cauravou ka raici koya ni sa mate tu. E ratou sa qai colata ki tautuba ka la'ki buluti koya e na yasa i watina. 11A tubu vakalevu na rere e na kedra maliwa na i soqosoqo lewe ni lotu taucoko kei ira kece ga era rogoca na ka koya. 12A vuqa sara na cakacaka mana kei na veika veivakurabuitaki e ratou cakava na i apositolo vei ira na tamata. Era dau sosoqoni vata kece tiko na i apositolo kei ira na vakabauta e na Varada nei Solomoni. 13A sega ga ni dua vei ira e taudaku e doudou me la'ki curu vei ira na vakabauta, e dina ga ni ra dokai ira vakalevu ko ira na tamata. 14Ia sa qai levu cake tiko ga na tamata era vuki me ra vakabauti Jisu; e vuqa na tagane kei na yalewa. 15Ka ra sa bau la'ki kauti ira tale ga yani kina na tauvimate ki na veigaunisala, ka vakadavori ira e na i davodavo kei na ibe, me bau vakaruguta mada ga e so vei ira na i yaloyalo kei Pita e na gauna e lako siviti ira kina. 16Era lewe vuqa tale ga era lako yani ki kea mai na veikoro e vakavolivoliti Jerusalemi, ka ra kauti ira yani na tauvimate, kei ira ka vakaleqai tu mai vei ira na yalo velavela; ka ra a mani vakabulai kece sara. 17A sa sinai sara e na vuvu na Bete Levu, kei ira kece ga era dau tiko vata kaya, oya ko ira na Setoki. 18Era sa qai tauri iratou na i apositolo ka biuti iratou ki na valeniveivesu. 19Ia e na bogi koya, e a qai dolava na katuba ni valeniveivesu e dua na agilosi ni Turaga, ka kauti iratou tani mai kina, ka kaya, 20“Dou lako, dou la'ki tu e Valenisoro ka tukuna vei ira na tamata na veika kece ga baleta na bula vou oqo.” 21E ratou vakamuria na vosa koya na i apositolo, ka ratou a lako sara ki na Valenisoro ni sa kida na mataka, ka ia kina na veivakatavulici. Sa qai lako na Bete Levu kei ira era dau tiko vata kaya, ka ra vakasoqoni ira vata na matabose e cake, kei ira kece ga na nodra qase na Isireli me caka e dua na soqoni. Era sa qai talatala ki valeniveivesu me ratou kau yani na i apositolo. 22Ia ni ratou sa yaco yani na ovisa, e ratou sa sega ni kunei iratou na i apositolo e valeniveivesu. E ratou sa mani suka tale ka la'ki tukutuku, 23ka kaya, “Ni keitou yaco yani ki na valeniveivesu keitou raica ni sogo matua sara tu ga na valeniveivesu, ka ra tu e tautuba e na mata ni katuba ko ira na yadra; ia ni keitou dolava yani na katuba, keitou sega sara ga ni kunea kina e dua na tamata.” 24Ia ni ra sa rogoca na veika koya ko ira na bete levu kei koya na turaganivalu ni matayadra ni valeniveivesu, era a sega ni via vakabauta ka ra vakataroga e lomadra se cava sa yaco vei ira na i apositolo. 25Sa qai lako yani e dua na tamata ka tukuna vei ira, “Ko iratou na tamata ko ni a biuta ki na valeniveivesu e ratou sa tiko mai na Valenisoro ka vakatavulici ira tiko na tamata” 26Sa qai lako na turaganivalu kei ira na ovisa ka ra la'ki kauti iratou ki kea. Ia era a sega ga ni cakava vakaukauwa, ni ra rerevaka de ra vakaviriki ira e na vatu ko ira na tamata. 27Ia ni ratou sa yaco yani, e ratou sa qai la'ki vakaturi sara e na matadra na lewe ni Bose. Sa qai tarogi iratou na Bete Levu, 28ka kaya, “Keimami a sega beka li ni vakaroti kemudou matua sara mo dou kakua tale ni veivakatavulici e na yaca oqo? Ia oqo sa roboti Jerusalemi na nomudou i vakavuvuli, ka ko dou sa mai via beitaka tiko vei keimami na mate ni tamata oqo!” 29E ratou sa qai sauma ko Pita kei iratou na kena vo ni apositolo, ka kaya, “Sa dodonu me keitou vakarorogo vua na Kalou, ka me keitou kakua ni vakarorogo vei ira na tamata. 30E a sa vakaturi Jisu cake tale na nodra Kalou na noda qase. Sa i Jisu ko ni a vakamatea e na nomuni vakarubeca e na dua na kau. 31Sa kauti koya cake na Kalou me tiko e na ligana i matau, me i Liuliu ka i Vakabula, me solia kina na veivutuni kei na bokoci ni valavala ca vei ira na Isireli. 32Keitou sa i vakadinadina ni veika oqo, ka vaka kina na Yalo Tabu, o koya sa dau solia na Kalou vei ira era talairawarawa vua.” 33Ia ni ra sa rogoca na lewe ni Bose na ka oqo, era sa cudru vakalevu sara, ka ra sa via vakamatei iratou sara ga na i apositolo. 34Sa qai tu cake e dua vei ira na lewe ni Bose, e dua na Farisi, ka yacana ko Kamelieli, e dua na qasenivuli ni lawa, ka ra dau dokai koya kece na tamata, ka vakarota me ratou kau mada vakalailai ki tautuba na i apositolo. 35Sa qai kaya vei ira ko koya, “O i kemuni na wekaqu, na Isireli, mo ni qarauna na ka ko ni na cakava vei iratou na tamata oqo. 36E na dua na gauna sa oti, e a tubu cake mai ko Ceuta, ka dau tukuni koya voli me dua na ka; ka ra mani muri koya kina e so na tamata, ka rauta e lewe va na drau. Ia e a qai vakamatei ko koya, ka ra dui se ko ira kece era a muri koya, ka sa mani mudu kina. 37Ni oti koya, a qai tubu cake mai ko Jutasa, na kai Kalili, e na gauna ni wili lewenivanua. A rawai ira tale ga e vuqa na tamata me ra muri koya. Ia e a mani mate tale ga ko koya, ka ra sa mani veiseyaki ko ira era a dau muri koya voli. 38Io oqo, au kaya vei kemuni, mo ni kakua ni vakasagai iratou na tamata oqo; ni laivi iratou mada ga. Kevaka e ka vakatamata na ka e ratou sa nakita ka cakava tiko, e na vakarusai ga. 39Ia kevaka e ka mai vua na Kalou, ko ni na sega ni vakarusa rawa. De lakolako ga ko ni na qai kunea ni ko ni veisaqasaqa tiko kei na Kalou!” Era sa mani lomavata na lewe ni matabose kei Kamelieli. 40Era sa qai kacivi iratou tale yani na i apositolo ka vakanakuitataki iratou, ka vakarota me ratou kakua tale ni vosa e na yaca i Jisu. E ra sa qai laivi iratou me ratou lako. 41E ratou sa qai lako tani mai vei ira na lewe ni bose na i apositolo ka ratou sa reki ni sa bau okata tu na Kalou ni sa ganiti iratou me ratou vakacacani e na vuku ni yaca i Jisu. 42A ratou sa sega ni cegu e na veisiga, mai na Valenisoro kei na nodra veivale, ni veivakatavulici ka vunautaka tiko na i Tukutuku Vinaka, ni sa Karisito ko Jisu.

will be added

X\