CAKACAKA 4

1Ia ni rau sa vosa tiko ga ko Pita kei Joni vei ira na tamata, era sa lako yani vei rau ko ira na bete, kei na i liuliu ni ovisa ni Valenisoro kei ira na Setoki. 2Sa duatani na nodra cudru e na vuku ni nodrau vakatavulici ira tiko na tamata, ka vunautaka tiko na tucake tale mai na mate me vaka sa vakadinadinataki e na tucake tale i Jisu. 3Era sa qai tauri rau, ka biuti rau ki na valeniveivesu me rau waraka na siga ka tarava, me vaka ni a sa karobo sara mai na vanua. 4Ia e lewe vuqa vei ira era a rogoca na i vunau koya era vakabauta; e rauta beka e lewe lima na udolu na kedra i wiliwili na tagane. 5Ia e na siga ka tarava era sa qai soqoni vata yani ki Jerusalemi ko ira na nodra i liuliu na Jiu kei ira na qase, vata kei ira na daunilawa. 6A ra sa bose vata kei Anasa na Bete Levu, kei Kaiava, kei Joni, kei Alekisada, kei ira kece ga na mataqali ni Bete Levu. 7Era sa qai vakaturi rau e na kedra maliwa, ka kaya vei rau, “A kaukauwa cava, se e na yaca i cei, ko drau cakava kina na ka oqo?” 8Ia ni sa sinai tu ko Pita e na Yalo Tabu sa qai kaya vei ira, “O i kemuni na nodra i liuliu na tamata, kei na nodra qase na Isireli: 9kevaka keirau sa vakatarogi edaidai me baleta na cakacaka vinaka sa caka vua e dua na tamata lokiloki kei na sala cava beka e vakabulai kina, 10me kilai sara oqo vei kemuni kece kei ira kece ga na Isireli, ni sa yaca ga i Jisu Karisito na kai Nasareci, o koya ko ni a vakota ki na kauveilatai, o koya ka a vakatura cake tale mai na mate na Kalou, ia e na vukuna ga sa tucake tu kina e ke e na matamuni na tamata oqo e na bula vinaka. 11Sa i Jisu ga me vaka a kaya, ʻNa vatu ko ni a cata na matai, ka sa qai yaco me kena i vakadei e na tutu ni vale.ʼ 12Sa i koya duadua ga e rawa ni vakabulai keda, ka ni sega ni tiko tale e dua na yaca e na ruku i lomalagi e solia na Kalou vei keda na tamata me da bula rawa kina.” 13Ni ra sa raica na matabose na nodrau doudou ko Pita kei Joni, ka kila tale ga ni rau tamata sega ni vuli ka lewe ni vanua wale ga, era sa kurabui sara; ia era sa qai vakasamataka ni rau a dau tiko vata kei Jisu. 14Ia ni ra sa raica na tamata ka a vakabulai ni ratou wavu vata tu, sa sega tale na ka me ra veileti kina. 15Era sa qai vakarota me rau lako tani vakatikitiki mai e na vanua e caka tiko kina na bose, ka me ra veivosaki mada vakai ira. 16E ra sa qai kaya, “A cava me da cakava vei rau na tamata oqo? E ra sa kila kece ga na tiko e Jerusalemi na cakacaka mana vakaitamera e rau sa cakava ko i rau oqo, ka sa sega ni rawa ni da cakitaka. 17Ia me tarova na kena tete vakalevu na ka oqo e na kedra maliwa na tamata, me da vakaroti rau ga me rau kakua tale ni vosa vua e dua na tamata e na vuku ni yaca oqo.” 18Era sa qai kacivi rau, ka vakarota vei rau me rau kakua sara ni vosa se veivakatavulici tale e na yaca i Jisu. 19Ia e rau a qai sauma ko Pita kei Joni ka kaya vei ira, “Ni lewa mada ga ko i kemuni se e vei li e dodonu, me keirau vakarorogo vei kemuni se me keirau vakarorogo vua na Kalou. 20Ka ni sa sega ni rawa vei keirau me keirau sega ni tusanaka na veika keirau a raica ka rogoca” 21Era sa qai vosataki rau tale vakaukauwa, ka laivi rau me rau lako. E a sega ni rawa vei ira me ra vakatotogitaki rau e na vukudra na tamata, ka ni ra sa vakacaucautaka kece ga na Kalou e na vuku ni ka a yaco koya. 22Sa yabaki vasagavulu vakacaca na tamata ka a caka vua na cakacaka mana ni veivakabulai koya. Era sa Masulaka na Vakabauta me Soli vei ira na Yalodoudou 23Ni rau sa sereki oti, e rau sa mani lako sara vei ira na nodrau i tokani, ka la'ki talanoataka na ka kece ga era a kaya vei rau ko ira na bete levu kei ira na qase ni Isireli. 24Ia ni ra sa rogoca na ka koya, era sa qai tabalaka cake na domodra vua na Kalou e na lomavata ka kaya, “O i kemuni na Turaga Cecere, kemuni ko ni a buli lomalagi kei vuravura kei na wasawasa, kei na veika kece ga e tu kina! 25E na kaukauwa ni Yalo Tabu ko ni a vosa kina e na gusuna na nomuni dauveiqaravi, ko Tevita na neimami qase, ka kaya, ʻA cava era cudru kina na veimatanitu tani? A cava era veinaki kina na lewenivanua me ra cakava na veika mate wale? 26Era tuva i valu na tui kei vuravura, ka ra vakasoqoni vata na dauveiliutaki, me ra vala kaya na Turaga kei na nona Karisito.ʼ 27Ni rau a mai sota vata kina e na koro oqo ko Eroti kei Ponitio Pailato ka vaka kina ko ira na kai tani kei ira na lewe i Isireli me ra vala kei Jisu, na nomuni Dauveiqaravi yalo savasava, o koya ko ni a lumuta. 28Era a soqoni vata me ra cakava kece ga na veika ko ni a sa lewa tu mai liu, e na nomuni kaukauwa kei na nomuni i naki, me na vakayacori. 29la oqo, Turaga, mo ni raica mada na nodra veivakarerei; ka mo ni solia vei keimami na nomuni tamata na yalodoudou me keimami tukuna yani kina na nomuni vosa. 30Ni dodoka tiko na ligamuni me veivakabulai, ka me vakayacori tiko na veicakacaka mana kei na veika veivakurabuitaki e na yaca i Jisu na nomuni Dauveiqaravi yalo savasava.” 31Ia ni ra sa masu oti, sa qai yavavala na tiki ni vale era soqoni tiko kina, ka ra sa vakasinaiti kece e na Yalo Tabu, ka vosataka vakadoudou na vosa ni Kalou. 32Era sa lomavata ka yalovata ko ira na lewe vuqa ka ra sa vakabauta. E sega ni dua e kaya me nona duadua tiko ga na veika e tu vua; ia era sa taukena vata na veika kece ga. 33A ratou sa tukuna e na kaukauwa levu na i apositolo na tucake tale mai na mate ni Turaga ko Jisu, ka sa vakalougatataki ira vakalevu kece sara na Kalou. 34A sega ni dua vei ira me leqa e na dua na ka ni ra sa volitaka na nodra tiki ni qele ko ira na vaqele kei na nodra vale ko ira na vakavale, ka ra kauta na kedra i sau, 35ka la'ki tauca e yavadratou na i apositolo me veivotayaki vei ira kece ga me vaka na ka e dui ganiti ira. 36E a mani vaka tale ga kina vei Josefa, o koya e ratou a vakatoka na i apositolo me ko Panapasa (a kena i balebale, o koya ka dau veivakayaloqaqataki). O koya e dua na kawa i Livai, ka a sucu mai Saipurusi. 37E taukena ko koya e dua na tiki ni vanua, ia e qai volitaka, ka kauta na kena i sau ka la'ki solia vei iratou na i apositolo.

will be added

X\