CAKACAKA 3

1E na dua na siga e rau a lako cake ki na Valenisoro ko Pita kei Joni ni rauta na tolu e na yakavi, na gauna ni masumasu. 2E dau kau mai ki kea e na veisiga e dua na tamata, ka a se lokiloki sara ga mai na kete i tinana. E dau la'ki vakatikori e na matamata ni Valenisoro e vakatokai ko Lagilagi, me kere ka ni loloma vei ira era curu kina. 3Ni sa raici rau ko Pita kei Joni ko koya ni rau sa vakarau curu yani, sa mani kerekere sara vei rau. 4E rau sa qai vakaraici koya matua, ka sa qai kaya vua ko Pita, “Raici keirau mai!” 5A sa vakaraici rau ko koya ka namaka me na rawata mai vei rau e dua na ka. 6Ia sa qai kaya vua ko Pita, “E sega sara vei au na i lavo, ia au na solia vei iko na ka ga e tu vei au; e na yaca i Jisu Karisito na kai Nasareci, au sa vakaroti iko, mo tu cake ka lako!” 7Sa qai taura na ligana i matau ka tubera cake, ka sa vakaukauwataki sara mai na yavana kei na nona qurulasawa. 8Sa qai lade cake, tucake sara ka vakatekivu lako. Sa curu vata sara kei rau ki na Valenisoro; a sa lako voli ka ladelade, ka vakacaucautaka na Kalou. 9A ra sa raici koya ko ira na lewe vuqa ni sa veilakoyaki tiko ka vakacaucautaka tiko na Kalou. 10Era sa qai kila ni sa i koya ga koya ka dau kere ka ni loloma tiko e na Matamata ko Lagilagi mai na Valenisoro. A sa curumi ira na rere kei na qoroqoro e na vuku ni ka sa yaco vua. 11Ni sa sobeti rau tiko ga ko Pita kei Joni na tamata koya e na varada ka vakatokai na Varada i Solomoni era sa qoroqoro na tamata kece ga ka ra cici sara vei iratou. 12Ia ni sa raici ira ko Pita, sa qai kaya vei ira, “O i kemuni na Isireli, na cava ko ni kurabuitaka kina na ka oqo, se cava ko ni vakaraici keirau matua kina? Ko ni nanuma beka ni keirau cakava me lako rawa na tamata oqo e na neirau kaukauwa ga se e na neirau dodonu? 13Na Kalou i Eparaama, kei Aisake, kei Jekope, na nodra Kalou na noda qase, sa vakalagilagi Jisu na nona tamata Dauveiqaravi. O koya ko ni a solia yani, ka cakitaka e na mata i Pailato e na nona a sa lewa me sereki koya. 14A tamata yalo savasava ka dodonu ko koya, ia ko ni a qai cakitaki koya, ka kerea ga e dua na daulaba me soli vei kemuni. 15Ko ni a qai vakamatea na Vunibula, ia sa vakaturi koya cake tale mai na mate na Kalou, ka keitou sa kena i vakadinadina ko i keitou oqo. 16Sa i koya na yacana, ni sa vakabauti sa vakaukauwataki kina na tamata oqo, o koya ko ni sa raica ka kila. Io, sa i koya na nona vakabauti Jisu sa yaco kina me bula vinaka, me vaka ko ni sa rawa ni raica kece sara ga vaka i kemuni. 17“Ia oqo, kemuni na wekaqu, au kila ni veika ko ni a cakava ko i kemuni kei ira tale ga na nomu i liuliu, ko ni a cakava tu e na nomuni sega ni kila. 18Ia e a sa vakatakila tu e liu na Kalou e na gusudra kece ga na parofita ni na sota kaya na veika rarawa na nona Karisito; ka sa i koya sa mai vakayacora sara oqo ko koya. 19O koya gona, mo ni veivutuni ka saumaki mai vua na Kalou, me bokoci kina na nomu i valavala ca. Ke ko ni na cakava oya 20e na qai yaco mai na gauna ni veivakaukauwataki mai vua na Turaga; ka me talai Jisu mai, o koya na Mesaia sa digitaka oti tu ko koya me nomuni. 21Ia sa dodonu me na tiko mada ga mai lomalagi ko koya me yacova na gauna sa na vakavoutaki kina na veika kece, me vaka e a sa vosa oti kina na Kalou e na gusudra na nona parofita yalo savasava e na gauna makawa sara. 22Ni a kaya ko Mosese, ʻE na vakatubura mai vei kemuni na Turaga na Kalou e dua na nomuni parofita, me vakataki au. Mo ni na vakarogoci koya e na ka kece ga e na tukuna vei kemuni. 23Na tamata ga e na sega ni vakarogoca na parofita koya, e na vakarusai sara mai na kedra maliwa na tamata ni Kalou.ʼ 24Ko ira kece tale ga ua parofita era sa vosa oti, mai vei Samuela kei ira era veitarataravi mai, era sa tukuna oti tu na gauna oqo. 25O i kemuni na luvedra na parofita, ka sa i kemuni ka a baleti kemuni na veiyalayalati ka a cakava na Kalou kei ira na nomuni qase, na kena ka a kaya kina vei Eparaama ko koya, ʻE na kalougata na veimataqali kece ga e vuravura e na vuku ni nomu kawa.ʼ 26O koya gona koya ni sa vakatura cake tale na Kalou na nona tamata Dauveiqaravi, sa talai koya taumada vei kemuni, me vakalougatataki kemuni e na nona vagolei kemuni yadudua tani mai na nomuni i valavala ca!”

will be added

X\