CAKACAKA 27

1Ia ni sa lewai me keimami soko ki Itali, sa qai soli ko Paula kei ira e so tale na kai vesu ki vua e dua na turaganivalu ni mataivalu i Akusito, ka yacana ko Jiuliasi. 2Keimami a vakavodo e na dua na waqa ni koro ko Adramitiumi mai Misia ka vakarau tiko me soko ki na veivanua e so e na baravi kei Esia, ka keimami sa mai vakarewa sara ka soko yani. A lako vata tiko kei keimami ko Arisitako e dua na kai Masitonia mai na koro ko Cesalonaika. 3Keimami a curu yani ki Saitoni e na siga ka dua. A sa lomani Paula ko Jiuliasi, ka laivi koya me lako vei ira na nona i tokani ka me la'ki vakacegu kina. 4Keimami sa qai biuta e kea ka soko ravita na yasa i Saipurusi e rurugu, ka ni a saqati keimami toka mai na cagi. 5Keimami a soko kosova na wasawasa donui rau na yasana ko Silisia kei Pamifilia ka yaco ki na koro ko Maira mai na yasana ko Lisia. 6A kunea e kea na turaganivalu e dua na waqa ni koro ko Alekisadria mai Ijipita ka vakarau soko tiko ki Itali, ka sa mani vakavodoki keimami kina. 7Sa berabera dina na neimami soko e na vica vata na siga, ka sa bau dredre sara toka ga na neimami donuya yani na koro ko Nito. Ia me vaka ni a sega ni laivi keimami na cagi me keimami ia tiko ga ki na vanua keimami mua tiko kina keimami sa qai soko ravita na yasa i Kiriti e rurugu, ka soko sivita na ucuna ko Salimoni. 8Keimami sa ravita toka ga na baravi ka dredre sara toka na neimami qai yaco rawa yani ki na dua na vanua ka yacana ko Toba Vinaka, ka sega soti ni yawa mai na koro ko Lasea. 9Sa mani rui dede tale na neimami tiko e kea, ka sa na rerevaki kina na soko e na wasaliwa, ka ni sa la'ki sivi tale na nodra gauna ni Lolo ni Veivinakati na Jiu. Sa qai vakasalataki ira ko Paula, 10ka kaya, “O i kemuni na turaga, au sa raica rawa e na noda soko, mai na gauna oqo ka lako yani, ni sa na yaco kina na leqa; e levu na ka e na vakacacani kina, ka sega wale ga ni na yaco e na i usana kei na waqa, e na yali sara tale ga kina na bula.” 11Ia na turaganivalu e a vakabauti rau ga na kavetani kei na i taukei ni waqa, ka sega ni via rogoca na ka e kaya ko Paula. 12E sega tale ga ni toba vinaka me ia tu kina na kele e na vula i liliwa na toba oya. Era sa mani kaya kina e lewe vuqa vei ira me ra sa soko tani ga yani, ka nuitaka ni ra na yaco rawa ki Finiki me ra kele tu kina e na vula i liliwa. Ko Finiki e dua na toba kei Kiriti ka qara vaka ki na ceva i ra kei na vua i ra. 13A liwa malua toka na ceva, ka ra sa nanuma sara ni sa na rawa na nodra i naki. Era sa cavuikelekele sara ka keimami sa mai soko sara yani, ia keimami a soko ravita toka ga na baravi kei Kiriti. 14Ia e sega ga ni dede, sa laba mai e dua na cava levu mai vanua, ka yacana na “Vua-i-cake .” 15Sa qai tabaka na cagi ki na waqa, sa lebuka na kena laca ka sa sega ni rawa ni sokota cake tiko ga na mata ni cagi, keimami sa mani laiva me sa savu tu ga yani. 16Keimami a bau via vakaruru vakalailai ni keimami sokota na ceva ni yanuyanu lailai ko Kuta ka a vovoleka sara ni keimami sega ni vesuka rawa na velovelo. 17Era sa qai vakarewataka cake ki waqa na velovelo ka vakadretaka matua e na dali. Ia ni ra sa rere de keimami kasa e na nuku cere ko Siratisi, era sa qai uruca na laca ni waqa, ka keimami sa qai savu muria tu ga na cagi. 18E na siga ka tarava ni sa kaukauwa vakalevu sara na cava era sa tekivu biuta na i usana ki wai. 19E na i katolu ni siga keimami sa talaca ki wai na i yaya ni waqa. 20E vica vata na siga keimami sega tu kina ni raica na matanisiga se na kalokalo. Sa kaukauwa tiko ga na cagi, ka sa oti mai vei keimami na vakanuinui ni keimami na bula. 21Ni sa dede na nodra sega tu ni kana na kaiwaqa, sa qai tu cake ko Paula e na kedra maliwa ka kaya, “O i kemuni na turaga, e dodonu mo ni a rogoca na noqu vosa ka a kakua ni biuti Kiriti mai. Ke ko ni a vakarorogo vei au, ke a sega ni yacovi keda na leqa oqo, ka sega tale ga ni vakacacani na i usana. 22Ia oqo au sa kerei kemuni mo ni yalodei, ni na sega ni dua vei kemuni e na yali na nona bula, ia se sa na ca ga na waqa. 23E na bogi e a tu voleka vei au e dua na agilosi ni Kalou, na Kalou au sa nona tamata, ka'u sa dau qarava. 24E a kaya vei au ko koya, ʻKakua ni rere, Paula, ko na la'ki tu sara e na matana na Sisa, ka sa maroroya tale ga na Kalou na nodra bula na tamata kece era soko vata tiko kei iko e na vukumu.ʼ 25'O koya gona oya, kemuni na turaga, ni yalodei tiko! Ni'u sa vakabauta na Kalou, ni na yaco dina, me vaka sa tukuni vei au. 26Ia eda sa na la'ki kasa ga e na dua na yanuyanu.” 27Sa yacova yani na i katinikava ni bogi na neimami veisavuyaki voli e na Wasawasa e Loma. Ni rauta na lomaloma ni bogi, era sa vakila na kaimua ni keimami sa volekata e dua na vanua. 28Era sa mani vakarautaka na wai ka ra kunea ni katu ruasagavulu; ia vakalailai tale ki liu era a vakarautaka tale na wai ka ra kunea ni sa katu tinikalima. 29Ia ni ra sa rere de keimami kasa e na dua na baravi veivatu, era sa qai biuta e va na i kelekele e na muaimuri, ka gadreva me siga totolo na vanua. 30Era sa qai via tovolea me ra dro tani mai waqa ko ira na kaimua; ka ra sa tukuca sobu na velovelo ki wai, ka vakalasulasutaka me vaka e ra vakarau la'ki biuta na i kelekele ki muailiu. 31Sa qai tukuna ko Paula vua na turaganivalu kei ira na sotia, “Kevaka era na sega ni tiko ga e waqa ko ira na kaimua, ko ni sa na sega ni bula.” 32Era sa qai tagutuva na dali ni velovelo ko ira na sotia, ka biuta me ciri yani. 33Ni sa voleka mai na siga, sa cikevi ira kece ga ko Paula me ra bau kana mada, ka kaya, “E daidai sa i katinikava ni siga ko ni wawa tu ga kina ka lolo; ko ni sega ni bau kania e dua na ka. 34Au sa vakamasuti kemuni gona kina mo ni kana mada; mo ni na bulabula kina. Mo ni kila ni ko ni na vakabulai kece ka na sega ni bau dua na drau ni uluna e dua vei kemuni me na yali .” 35Ni sa kaya oti oya, sa qai taura e dua na i buli madrai ka vakavinavinakataka vua na Kalou e na matadra kece ga, ka dovia ka vakatekivu me kana. 36Era sa vakayaloqaqataki kece e na ka koya ka ra sa qai kana tale ga. 37Keimami lewe rua na drau vitusagavulu ka ono taucoko na tamata ka tiko e waqa. 38Ia ni ra sa kana ka mamau, era sa qai vakatekivu me ra vakamamadataka na waqa, ka ra sa biuta na witi ki wasawasa. 39Ni sa siga mai na vanua, era a sega ni kiIa na kaiwaqa na vanua koya, ia era a raica ga e dua na toba e vakamatasawa, ka ra lewa me ra sa na tovolea me ra vakasa kina na waqa. 40Era sa qai tagutuva na i kelekele, ka laiva na waqa me savu yani; era a sereka tale ga na i vesu ni uli, ka vakarewataka na laca levu me rawa ni yaco kina na waqa ki matasawa. 41Era sa mani ciri yani ki na dua na vanua e sota vata kina e rua na kui, ka ra vakasara kina na waqa. A coba sara ki na nuku na muailiu ka mai sega tu yani ni yavalati rawa, ia na muaimuri e a qai kasere tiko ga vakamalua e na kaukauwa ni ua. 42Era sa qai nakita na sotia me ra vakamatei ira na kaivesu, de ra na qai qalo e so ka dro bula. 43Ia ni vinakata na turaganivalu me vakabulai Paula, sa mani tarovi ira kina na sotia mai na ka era via cakava, ka a vakarota ga me ra rika e liu ki wai ko ira era rawa ni qalo, me ra liu ki vanua. 44Ia ko ira na kena vo, me ra na qai vakayagataka na kau ni waqa raraba e so kei na so tale na gacagaca ni waqa me nodra i qaloqalo ki vanua. E a vaka koya na neimami cabe bula ki vanua.

will be added

X\