CAKACAKA 26

1Sa qai kaya vei Paula ko Akariva, ʻSa rawa ni ko vakamacalataki iko mai e na gauna oqo.” Sa qai dodoka na ligana ko Paula ka vakatekivu me tukuni koya: 2“Au nanuma ni'u sa kalougata ko i au, kemuni Akariva na tui, ni'u sa na tukuni au e daidai e matamuni e na vuku ni veika kece ga era beitaki au kina na Jiu, 3vakabibi ni ko ni sa rui kila vinaka kece sara na nodra i valavala na Jiu kei na veika era dau veiletitaka. Au sa kerei kemuni kina mo ni rogoci au e na yalo vosota. 4“Era sa kila kece sara na Jiu na i tovo ni noqu bula mai na gauna ni noqu gone ka yacova mai oqo. Era kila ni'u a dau tu ga e liu mai na noqu vanua, ka vaka kina na noqu bula mai Jerusalemi. 5E ra sa kila makawa tu mai, kevaka e lomadra, sa rawa ni ra vakadinadinataka vei kemuni, ni'u a bula tu mai e na i vakarau ni bula vaka-Farisi, koya na taba ni neimami lotu ka dau muria vakamatailalai sara na kena lawa. 6Ia au sa mai tu oqo me'u lewai e na vuku ni noqu nuitaka na vosa ni yalayala ka a solia na Kalou vei ira na neimami qase, 7sa i koya oqo na ka sara ga era a nuitaka me ra na taukena ko ira na neimami yavusa e tinikarua e na nodra dau qarava tiko na Kalou e na siga kei na bogi. Ia sa i koya na vakanuinui oqo kemuni na tui, era sa vakacalai au tiko kina na Jiu. 8A cava soti beka e dredre kina vei kemuni na tiko oqo mo ni vakabauta ni sa rawa vua na Kalou me vakaturi ira cake tale na mate? 9“Ko i au vakai au, au a nanuma ni sa dodonu me'u cakava na veika kece ga au rawata me'u saqata kina na yaca i Jisu na kai Nasareci. 10Ka sa i koya sara ga na ka koya au a cakava mai Jerusalemi. A soli vei au na kaukauwa mai vei ira na bete levu, ka'u a biuti ira kina e lewe vuqa na tamata ni Kalou ki na valeniveivesu; ia ni sa lewai me ra vakamatei, au a tokona na lewa oya. 11Au a dau vakaitotogitaki ira vakavuqa e na veivalenilotu, ka vakasaurarataki ira me ra cakitaka na nodra vakabauta. Na kena levu na noqu rarawataki ira, au a lako sara kina ki na veikoro lelevu e so mai na veimatanitu tani ka la'ki vakacacani ira kina” 12“Sa i koya sara tale ga na i naki oya au a lako tiko kina ki Tamasiko. Au a lako tiko e na nodra lewa kei na nodra veitalai na bete levu mai Jerusalemi. 13Ia ni keimami sa lako tiko e na gaunisala ni rauta na sigalevu tutu, kemuni na tui, au a qai raica e dua na rarama mai lomalagi, e kaukauwa cake na kena i serau mai na i serau ni matanisiga, ni sa cila vakavolivoliti au kei ira keimami lako vata tiko. 14Keimami a bale kece ki na qele, ka'u a qai rogoca e dua na domo ni kaya mai vei au e na vosa vaka-Iperiu, ʻI Saula, I Saula! A cava ko vakacacani au tiko kina? Me vaka ni na mavoa na manumanu e tekea na matanimoto, na kena i uso, e na vaka tale ga kina vei iko; na levu ga ni nomu vakacacani au, na levu ni nomu mavoa!' 15Au sa qai kaya, ʻ'O cei o kemuni, Turaga?ʼ Sa qai kaya na Turaga, ʻ'O i au ko Jisu, o koya ko sa vakacacana tiko. 16Ia duri cake ka tu e yavamu. Au sa rairai oqo vei iko me'u lesi iko mo noqu dauveiqaravi ka mo na dautukuna na veika ko sa raica e daidai kei na veika au na vakaraitaka vei iko e muri. 17Au na vakabulai iko mai vei ira na Isireli kei ira na kai veimatanitu tani, ko ira au sa na talai iko kina. 18Mo la'ki dolava na matadra, me ra saumaki mai na butobuto ki na rarama, mai na kaukauwa i Setani ki vua na Kalou; me bokoci kina na nodra i valavala ca, ka ra okati vata kei ira era sa vakasavasavataki me ra nona na Kalou e na nodra sa vakabauti au.ʼ 19“'O koya oqo, kemuni Akariva, na tui, au a sega ni talaidredre kina ki na raivotu sa vakaraitaki vei au mai lomalagi. 20Au a tekivu vei ira mai Tamasiko, ka qai tarava ko Jerusalemi kei na loma ni yasana kece ko Jutia, ka vaka kina vei ira tale ga na kai veimatanitu tani. Au a vunautaka kina me ra veivutuni ka saumaki mai vua na Kalou, ka cakava na cakacaka e vakaraitaki kina ni ra sa veivutuni. 21Oya na vuna era a tauri au kina na Jiu mai na Valenisoro ka saga me ra vakamatei au. 22Ia sa vukei au tiko ga na Kalou me yacova mai na siga oqo, ka'u sa tu kina oqo me'u vakadinadinataka vei kemuni kece, se ko ni tamata lalai se ko ni ka lelevu. E sega ni dua na ka tani au kaya tiko oqo, na ka ga era a tukuna na parofita kei Mosese ni na yaco e muri: 23koya ni sa dodonu ga me mate na Karisito, me i sevu ni tu cake tale mai na mate, ka me vakatakila na rarama ni veivakabulai vei ira na Isireli, kei ira tale ga na kai veimatanitu tani.” 24Ni sa tukuni koya tiko ga vaka oya ko Paula, sa kaya mai ko Vesito e na domo levu, “Sa ca na ulumu ko iko, Paula. Sa vakalialiataki iko na levu ni nomu kilaka!” 25Sa qai kaya ko Paula, “Au sega ni lialia, kemuni, Vesito, na turaga dokai, ia au sa cavuta ga na vosa dina ka dodonu. 26E kila tu na tui na veika oqo, ka'u sa vosa doudou tiko kina e matana; ni'u sa kila dina ni sega na ka e vuni vua, ni a sega ni caka na ka oqo e na dua na yasana vuni. 27I kemuni Akariva, na tui, ko ni vakabauti ira li na parofita se sega? Au kila ni ko ni vakabauti ira!” 28Sa qai kaya vei Paula ko Akariva, “E na gauna lekaleka wale ga ko nanuma ni sa rawa ni ko rawai au kina me'u lotu va-Karisito?” 29Sa qai kaya ko Paula, “Se gauna lekaleka se gauna balavu, au sa masu vua na Kalou, e sega e na vukumuni ga, ia e na vukudra kece tale ga era vakarogoci au tiko e daidai, mo ni yaco mo ni vakataki au, ia me kakua ga ni ko ni vesu tu e na sinucodo me vaka oqo!” 30E ratou sa qai tu cake na tui, na kovana kei Verenaisi kei ira ka dabe vata tiko kei iratou, 31ka ra sa qai lako vakatikitiki ka veivosakitaka vakai ira na ka koya ka kaya, “E sega ni dua na ka e cakava na tamata oqo e dodonu me mate kina se me vesu tiko kina.” 32Sa qai kaya vei Vesito ko Akariva, “Kevaka e a sega ni cavuta na Sisa na tamata oqo me lai lewai vua ke a sa rawa sara ga ni sereki oqo.”

will be added

X\